Yesuí Farisi pè nvng kùyà gún pè níò Cìpshì Nønt
Shóngshø’ng we pèmè vnvmchvngmaq, dèni rø v-du we Gvray móngkà nø Lk 18:9-14 vdòng taqkèní ínø, Vkangpè Yesuí Farisi pè nvng kùyà gún pè níò Cìpshì Nønt vl kàshvbóng mvshøl taqkèní íē.
Vpø’ íwe pèmè vnvmchvngmaq,
Nøngmaq gø’ vrvm taq vl we síngràl Nyan Bønya jór kūnga vzàm svng nøngmaqí tiqkvt lakvt dvdvm vnáshì bø’ì kvt nøngmaqò Nønt mvsøn vjang laqyàrì hángshì dvzvrè. Tiqdvng vsvng kaq yv’ng mvtvmvm we nønt, Pàtimvlvn we nønt, Tiqdvng vsvng kūngashaqcvm nø vnø’n nø vléshì lòng svng mà roqà we, màtōà we bø’n sháòe. Dìngmānè wàwe Cìpshì lòng ínø, Angdèo lvpat angdvja rì svng àngde íni vtoshì lún dø tiqdvchá Tiqdvng vsvngò angdvja lvpat rì svng gø dvdvmà nø síngà we í vtōa lòng íe.
Vkangpè Yesu Kristu ínø Dèni nøngmaqò dòngnønt mvsøn Dìngman lòng svng nøngmaqí dø’mshá lúnlvm rvt ègō íē, shèdømìe. Tiqdvng vsvng kaq Mvra shvri nø Kà rvt we mvwàlvm, mà-vl lvm, Gvray gvsang mvrdvng yv’ngø Døngman we tiqgø’ ku rvzvngce wáshì lúnlvm rvt dvkv’m nø shvngøt dètú íe.
Wervt vpø’ íwe pèmè vnvmchvngmaq, Vpè Gvray gvsang mvrdvng yv’ngø Døngman we, Cìpshì Nønt dvnzøng we rvzvngce tiqgø’ ku cúnshì lún we, vl lún we jèjú ìshøt rì svng mvng Kvmnøntní røtnímshì laqlúnì.
Lk 18:9-14 ciq taq;-
Vdè nø døngmāne, wa dvdv̄mshi nø, dvgá vsvng kaq yv́ng mvtv̀mv̄m rì svng gø Yesuí kàshvbóng yadø shø̀:nòe. 10 “Vsvng vní gǿ nø júrøtshìlv́m rvt noqngø̀m Tø̀ngnø svng ngāngá:mì. Tiq pè nø Farisi, tiq pè nø kùyà gún vsvng íe. 11 Farisi pè nø rip sórí yadø vjú røtshìe. ‘Gvrayé, ngà nø dvgá vsvngrì dø, tø̄lv̄m vsvng, màdøngman vsvng nvng dvchap vsvng mvǿngà. Kùyà gún pè yapè dø gø mvǿngà rvtnø Nà svng oqà. c 12 Ngà nø tiq nár taq vní kvt v́mpà màv́m vnatshø̀nge. Ngàí lúnò we shvngbe kèní gø tiqcé wál tiq wál vtv̀ngòe,’ wae. d 13 Iwe kùyà gún pè nø, vrúm yv́ngø rip nø ang nē gø muqlàng kaq màdvjaqshaq, gv̀ng lè vnv́lshì taqsórí, ‘Gvrayé, mvrà v̄l pè ngà svng dvshá èzāng dakngà,’ wae. e 14 Ngàí namaq svng v̄la:tnìni, ang chø̀m svng loá:mì kvt, kùyà gún pè svng nø Farisi pè mvdv̀mø døngman we dvdut bǿà. Kadø íe wani vdè svng shvringshì vsvng gǿ vrà:mí nø shvyǿm we vhǿm lú:ngòe; vdè cipshì gǿ svng mv̀ng nø shvrīng lú:ngòe,” a:lòe.
Mongkà ètashìnøng we pèmè vnvmchvngmaq Shvngbeí Gvray gvsangò mongzøl lòng nvng Gvray Mvkok dvdí shóngnønt svng vtoshì leqlúnøng!
