Mònggv̀n rvgaq svmare rì ò àngni taq tasvng tubúm dvbangā kelv́m dang nvng singnø̀ Pope Leo XIV taqkèní dvtú bǿà
St. Peter noqngø̀m tø̀m taqø vjúrøt shìnvng mvngu shìráì we shìwà vsvngrì 15000 rì kaqsvng March 3 ni taq wáshì bǿì we mònggv̀n Svmaré rìò àngni dang mòngkà dvtú bǿà nø̀ we mòngkà taq svmaré nvng lvngàré rì dvhø̀ vdu vbóngwe ngór dvgùng rì kèní vpǿ shvring lv́m mvdø̀ng dvkám bǿà we íe.
Svmarérì wawe nø cv̀m dvgvp kèní ni rvwìngwe tvrà rì svng vhǿ:mò we ínø̀ mònggv̀n shvrà vrv̀m taq shvnip shvnvr we gø vhǿ:mò we dang vtà:nò dá:ngí we tvrà rì svng vgám nø̀ àngmaq svng tubúm dvbangā lv́m vchvk we dang dvtú mòngkà vrìng bǿà we íe. We dvtú mòngkà svng Piazza San Pietro shvngkà dvp kèní vrìng vtnà.
We shvngkà taq svmarérì mvdàm shvnip shvnvr rvwìng we tvrà rì nvng singnø̀ shòlaqrérì dvhø̀ taq vpǿ shvring kewe tóng laqyà svng dvhàng lv́m paqzí zùngrì, vsv̀ng mv̀ngpòng vdòngrì nvng shvngø̀mré vrv̀mrì vdòng taqø gø vzø̀m nø̀ bv̀nlì wárà we dang dvtú mòngkà kèní dvkám bǿà we íe.
Mònggv̀n svmaré rìò àngni svng March shvlá 8 ni taq wáshìwe ínø̀ svmaré lvngàré rì vdu vbóng we vko vkáng, lún vkáng rì dang shvdøngā lv́m svmaré rìò svngpv̀n cúnshì lv́m tvrà, wulaq tvrà rì nvng móng lvmang tvrà rì jorlún lv́m tvnùng we àngni gø íe. We àngni svng 20 àngyá mvzuq nǿngrì kèní wápv́ngshì ráì we ínø̀ we àngni taq svmaré rìò vko vkáng rì svng vháng vlún lv́m dvpvt kù:ngà ziwe nvng ālu pø̀ rì lawe àngni tiqni gø íe.
