Bìm kùlwàng kàshvbóng mvshøl

Dèni Pvlàcè nònggùn lùshì lvm Gvray Dvbùshang móngkà nø Mati 21:33-43,45-46 ciq vdòng taqkèní ínø Bìm kùlwàng kàshvbóng mvshøl taqkèní Vkangpè Yesuí nø Gvray gvsangò shóngnønt nø kadv’ngte tēè wadang svng dvtánò nø shvdøm dang tálúnshìe.

Shóngshø’ng we pèmè vnvmchvngmaq, Gvray gvsangí nø nøngmaq mvdvm taq gvlò we shóngnønt svng Dènio Gvray Dvbùshang móngkà taqkèní yv’nglúnshìe. Nøngmaq kaq svng rvgaq yachang mvdvmø vzit vzing dvzvr nø, jèjú angpvnpvn vtoshì dvzvr we í roqgar nø vzùngè. Yalòng rvnaq we Gvray gvsangò jèjú ìshøt rì svng, oqāe wàì nø jèjú vtv’ngshì we í, angdèo lvpat svng gø kùpgar nø øpshì lúnlvm gø gvzà vchvk we íe. Angdèo lvpat taq Gvray gvsangí àngde kaq svng zi we Talen bvnlì døngja rì svng gø vpø’ Nøntní rímvn nø dvnúng rà ìe. Nøngmaq taqkèní Gvray gvsang í zi we Talen bvnlìrì svng dvnúng mv-lúnì nìnø, Gvray gvsang chip kèní tv’n dvgá ni v-du we Mvra dàm svng zílvm vlē walòng íe. Yalòng Vmpà màv’m, vm-aq Vnatshi rvtø lvngcha taq nøngmaqò Pvlàcè kvmnønt tvrà svng gùndvtøpmì nø dvcøp vdv’ngshàì taqsórí nònggùn kūnga lùshì laqlúnì. Toniò Dvrá vtóng taqkèní Mònggvn yachang svng roqgar nø dvcøp vdv’ng shvnvp gø’, shvbóng shvmvtshì ra wáshì lúnlvm rvt Shvmv’n Jèjú ìshøt rì svng mv’ng røtnímshì laqlúnì.

Mati 21:33-43,45-46 ciq vdòng taq;- “Kàshvbóng vrá tiq lòng ètá dánø̀ng. Rvmá angkàng tiq gǿí bìm tiq kùlwàng ka:tnò nø wáng gùrhø̄m ha:mòe. We vdòngø bìmtì cutrà dv̀ngkø̀r gø chuq dv̀ng, zunzvng gø tiq chø̀m wa wàò nø, kùlwàng wáshúrì svng ngáò dá:ngí ang nø dvgá móng svng dìá:mì. rs 34 Angshí dvkø̄m rvtø̀ tuq ráì dvgvp, angò mvtū wál bìmshí lú nvng kùlwàng wáshúrì yv́ng svng a:ngí ang vshuqrì dvzv́r bǿà. 35 Iwe kùlwàng wáshúrìí nø ang vshuqrì svng ta:pmò nø, tiq pè svng nø vdipmò nø, tiq pè svng nø sha:tnò nø, vrá tiq pè svng nø lú:ngì wvp bǿà. 36 Vrá tiq kvt, vzv̀ng mvdv̀mø té luq dø ang vshuq dvgá tiq mvdò a:ngí dvzv́r bǿà nìgø, werì svng gø angmaqí wedø tiqdvchá wàòe. 37 Mèpvng nø, ‘Ngàcè pè svng nø angmaqí vpǿ dáò ni we íe,’ wa nø angmaq yv́ng svng angcè pè dvzv́r bǿà. 38 Wedø ínìgø kùlwàng wáshú werìí Angcè pè svng yv̀ng bǿà kvt, angmaq vrùng nø, ‘Zaqshøp vpvtlv́m pè nø yapè ni íe; ló, ang svng sha:tnì nø, ang zaqshøp nø nøngmaqí tø̄lá:mì,’ wae. t 39 Wervt angmaqí ang svng ta:pmò nø, bìm kùlwàng vdàm lap svng gūr bǿà dá:ngí shvt bǿà,wàe.

Mongkà ètashìnøng we Shvngbeí Gvray mongzøl lòng vtoshì leqlúnøng!