Mvgàm pè nvng Lazaru
Tiq kvt nø mvgàm tiq pè v̄le. Ang nø shvmoq laqtūn nvng vzī shv́nàng belaq wā gwashi nø, tiq ni nø tiq ni v́m aq nø dòshúcè v̄le. Vrá, góngkøp zøt zøt nø, Lazaru tǿò we røtnv̄m vsvng tiq gǿ nø, mvgàm pè bv́ngkà chit yv́ng shvrú:ngòe. Ang nø mvgàm pè v́mjv̀m kèní vjā we v́mpàshi rì v́m mvyǿe. Vrá vgī rì dì rā weí gø, ang zøt rì lēò høq íe. Mèpvng røtnv̄m vsvng wegǿ shìá:mì nø, Abraham pøtpúm yv́ng svng muqlàng dvzv́r rìí vbūn bǿà. Vrá, mvgàm pè gø shìá:mì nø kǿm bǿà.
Shóngshø’ng we pèmè vnvmchvngmaq, Nøngmaq Shvngømré rvzvngcerì í dvdvm lvm nø, Lazaru nvng mvgàmpèo mvshøl svng nø nøngmaqí tøpni tøprang sháì rì dvchøng wa í shàe. Mvgàmpèo lvpat taq vléshì nø Mvra wàò dang mvyv’ngshì. Íni gø Angdèo Chøm shvnvng yv’ng vl we, tuq rá í we zaqle dvshá hoq Lazaru svng yv’ng mvtvm á:mō, angdèo pø zaqshøp rì taqwa byō byōce rvtø vrvm vl mvyø’ gø’ í dang vkvtdø yv’nglúnshìe. Dèni Mongkà tiqciq taq gø vsvngrì nvng pø zaqshøp rì mvdvm Nønt vdønshì we mà-vl lvm rvt dvkv’m lòng svng yv’nglúnshìe. Dvkv’m Kào mvdøng angké nø, Gvray gvsang kaq Shú:ngwàmshì lvm nvng Tiqdvng Vsvngrì kaq shóngwámshì lvm lòng, í dø tiqdvchá Tiqdvng vsvngò Ra vchvk dang rì svng mvsháò gø’, Mvré zā shóngnønt mà-vl gø’, sháò nigø mvsháò dø wáshì vsvngrì nø dvkv’m Kà mè svng mvcvn gø’, mà tōò gø’ íe. Wervt lvngdøm angni taq Mvra kv’ng ngé we svng vhø’m lvm íe, wà Kà íe.
Wervt vpø’ íwe pèmè vnvmchvngmaq, nøngmaq shvngbe nø àngde Tiqdvng Vsvngrìo Nønt mvsøn vdòng taq Ra vchvk lòng, Shagóng lvp taq zø’m dv’ng ra vchvk rì svng v-ná we mø-í lvm rvt, Àngmaq kaq svng dvshá zā tùbùm dvbvng gø’ wáshì lúnlvm dvpvt dvzaq dvkvngshì laqlúnì. Vmpà màv’m, vm-aq vnatshi rvtø lvngcha taqø Vlu vdán zv’ng dvzaqshì nø vjúrøt shì taqsórí Shvmv’n jèjú ìshøt rì svng kvmnoy røtnímshì laqlúnì.
