Chángkàngpè Gvray nø mvshǿlshøp nøt dammá rìsvng vlíng vpo dvzv́rā lúne

v́m-aq vnvtshìwe lvngcha 2 lvbán vdòng taq Svrabín koqkv́m Leo XIV taqkèní (Transfiguration) vlíng vpo we tvràò rvnaqwe àng lvjøm dang vchà:ng nø̀ dvtú bǿà we íe.

Welòng nø shìlòng nvng zunlòng, dø lòng nvng gálòng rìò àng dvjà ínø̀ Kristu nø shvnip shvnvr wervt mvhøt lv́m tvrà vhǿ:mò vsvngrì mvdàm we gálòng svng dvshó:rā we íe. Yesu mèpvng cvnwe dvzv́r rì nø Yesuò àng ngór dvgùng rì svng chvpdvp yv̀:ngaráà we ínìgø welòng tvrà svng síngshálún lv́m dvpvt rvtø̀ gvza lúshì vdu yv̀:ngì.

Yodan tì taq tìlop kv́mshì yv̀:ngì we àngni døni “Yapè nø ngàshóng shø̀ngwe ngàcè gǿ íe” wanø̀ kàshaqí vtà:nò we svng táshì yv̀:ngì nø̀ “gánø̀ shórwe rvmøtí rvdu:lò we dang Svrabín koqkv́mpè Leo XIV taqkèní vtàn ráà we íe.

We tvrà rì shvngbe nø vsvng loksok rì kaq vwadø dvtanwe tvrà mǿí nø̀ vháng vtang we ngór dvgùng kèní shóngnøt vzø̀mwe tvrà svng dvtanā we íe wanø̀ vtàn bǿà we íe. Rvgaq mvdàmø màshvla we tvrà rì dànzø̀ng we ínìgø Yesu Kristuò shagóng nø “Gvray ngór dvgùng kèní” gálòng shór dvzv́r we ínø̀ chutcháng shú Gvray nø mvshǿlshøp dammá rì svng vlíng vpo dvzv́rā we íe. Gvrayò shvngøt dvtú we tvrà shvngbe nø chutcháng we ìshøt jejú rì wani íe.

Svrabín koqkv́m Leo XIV nø “yadang rì shvngbe nø nøngmaq svng jø̀ngjǿng ni kám vlǿm dèzv́:rì we ímá? Gvray àng svng nøngmaq taqkèní shóngnøt kèní yv́nglúnìe má? wanø̀ røtkà kèní èrøtì we íe.

Shv̀nshér pvlàcè Gvray nø nøngmaqò dvciq lvpat gø̀nshaq dvpvt ìshøt jejúrì svng tvleā nø Gvray àngnvng vzø̀m lv́m tvrà rì svng ètóngāì we ínø̀ Gvray vlwe, mv-vl we tvrà walòng (Agnosticism) kèní shèlút:ì we íe.

Nøngmaq kaqsvng kù:ngà vnǿnwe tvrà, kámnøt tvrà dvpvt mèpvng lvpat shìlòng kèn[ zunwe chutcháng tvrà svng vtánā we íe.