vm-aq Vnatshi Nár (2)

Shóngshø’ng we pèmè vnvmchvngmaq, Ya lvban nø Vmpà màv’m vnatshi we lvban (2) ban wà lvban svng gòng bø’shà.

Ya lvban taq rø v-du we Gvray móngkà jømciqrì:-
(1) Nvmlat pvngshì 12:1-4
(2) 2 Timoti 1;8-10
(3) Mati 17:1-9

Shóngshø’ng we pèmè vnvm vchvngmaq, Vmpà màv’m vnatshi rvtø lvngcha taq nøngmaq Catholic shvngømré rvzvngcerì taqkèní cvndvgøm nø dvnúng lvm mvtú rì vlē. Wè mvtú rì nø (1) Angdèí wá vléì we Mvra rì svng dvdvm vjáng nø Nønt vwángshì lúnlvm dang íe. (2) Ra vchvk gø’, Tiqdvng vsvng kaq dvshá zā tùbùm dvbvng lvm dang íē. (3) Gvray tiqpè svng wa ká:mìe, wàì nø Tìløp kámshàì dvgvp zí shàì we Ka shvdiq lòng svng vrá tiqkvt dvdvm vjáng nø angdè góng kaq svng vrá røtshàì we, tvrà íe. Vrá nø, Nøngmaq taq Vmpà màv’m, vm-aq vnatshi nø vjúrøt shàì we, dvshá zā jèjú bvnlìrì svng wáshì we.. Yarì nø Gvray móngdàn dvpvt gvzà vpø’ nø ring we tvrà íē. Nøngmaq vjúrøt shàì lòng ínø Gvray gvsang nvng tiqdø rvtø vrvm nitvp dvzvr nø, Pvlàcè kvmnønt nònggùn kūnga svng lú:n dvzvrè, vrá nø vjú røt taqsórí nøngmaq shvnvng yv’ngø vl vsvngrì dvpvt mv’ngsher we dòngnønt mvsøní dvnùng nø cúnshì we í Shvkse wáshì dvzvrè.

Vpø’ íwe pèmè vnvmchvngmaq, Ya lvban taq tálúnì we Mati dvbùshang Mongkà nø, Vmpà màv’m, vm-aq vnatshi we vní lvban wà lvban taqø rø shì we Gvray Mongkà jømciq íe. Yalòng Mongkà mvshøl nø Mati, Marko nvng Luka dvbùshang Mongkà vshøm lòng taq vbá lòng íe. Yesu nø rvgaq mvgūng móng taqø Sataní dvløt we vhø’m bø’à mèpvng, shigung mvdvmø dvzvr rì Vshøm pè mvrdvng yv’ngø Ang góng shø’ngshàng vmvtná:mì nø, jór pòngbang dvtánòe. Wè mèpvng, angí vtoshì lvm íwe dvshà mvhøt yvklvm lòng svng vzv’ng kaq tvlú shá dvzvr we í dvshvngò tvrà gø íē. Vrá nø, Vkangpè Yesuò góng Shø’ngshàng vmvt á:mì lòng nø vrá cun á:mì lòng nvng jór pòngbang gømlā lòng dvpvt ká:m ra lvmik gømlā ni íē.

“Petru, Yaku nvng Yohan”

Yalòng nø, dvzvr vshøm pè íwe Piter, Yaku nvng Yohan àngmaq vshøm pè taqø bø’n bung bø’ì we mvbøn lvmik gømlā íe. Moshi nvng Elia gø Yesu nvng Kà shøn we dang dvzvrì í yangòe, wàe. Àng lvjøm nø, Moshi nø øp kv’ng we Dvrá ( law)ò tvle ínø, Elia nø Kàdvtutshúrì(the prophets) shvngbeò tvle íe walòng svng shø’n mvyø’ we íe. Jøm Mongkà taq ” Dvrá & Kàdvtutshú rì”(The Law & the Prophets) wā nø, Jøm Mongkà køp svng shø’n we íe. Yesu nvng tiqdø àngmaq svng Gvray Mongkà nø Kømzøpmè walòng svng dvtánò tvrà gø íe. Wè mèpvng rvmøt vdòng yv’ngkèní shaqme í shø’n Kà svng tálúnshìe. Wè Kà nø, ” ya pè nø Ngà Shvrúng we, Ngà ce pè íe; àng Kà svng ètánøng,” wā Vpè Gvray gvsang àng tiqgóng kèní shøn we Kà, dvkv’m we Kà íe. Shø’n mvyø’ we taq, Angce pè Yesu Kristuò dvkv’m Kà svng Kvmnøntní cvndvgømshì lòng nø Vpè, angce pè, Shànshér Pvlàcè vshøm gø’ tiqgóng Gvray gvsangò Kà svng Vpø’ shvring nø Kv’mì lòng, vtoshàì lòng íe.

Jor pòngbang svng dvtánòe

Vrá nø, Vkangpè Yesu Mvrshvm shø’ngshàng vmvt á:mì (transfiguration)we í, Jór Pòngbang svng dvtánòe. Vkvtdø jór pòngbang dvtánò lòng nø, Dvzvrìò Kvmnønt nònggùn kūnga svng zíò nø, Kvmnønt dvtø’ngào lòng gø íe. Wè jór pòngbang lòng ínø, Kà shvdiq Dø’ngvng lú:nì, Brimbrim shór we Gvray móngdàn svng yv’nglúnlvm, góng lúnlvm, nøngmaq angkang wáshì lúnlvm vlē walòng svng shvngøt dvtú we Kà, mvshøl gø íe. Wervt yalòng jór pòngbang taqkèní, Gvray ínø, nøngmaq kaq svng Pvlàcè kvmnønt nònggùn dvkvngè. Vrá nø, Vmpà màv’m, vm-aq vnatshi rvtø lvngcha køpmè taqø, nøngmaq svng Nønt mvsøn Pvlàcè nònggùn kūnga vzàm vl we rvzvngcerì wáshì lúnlvm, vjú røt tvleshì nø cúnshì lúnlvm rvt dèkv’mì we rvtø lvngcha gø íe.

Vrá nø, Vkangpè Yesu Mvrshvm shø’ngshàng vmvt á:mì tvrà mvbø’n yalòng nø, Tabor shigung mvdvm taq bø’n yangì we tvrà íe. Mongkà taq gømlā ku shigung mvdvm yv’ngø vrùo nø lv’ngòe. Gvray nvng Bāsha Svngzāce Kømzøp we shvra, wā shø’n mvyø’ lòng yv’nglúnshìe. Wervt Dvrá me (10) lòng svng shigung mvdvm kèní lúnshìe. Vkangpè Yesu Kristu ínø Angò Mongkà svng shigung mvdvm yv’ngkèní dvshvng pvngòe. Vkangpè Yesu ínø tiqni zø’ngdø Dvrá Mongkà svng dvshvngò nø Zā yvng dvsheròe, Dālvm lvmik gømlā rì svng gø dvtánò sórí, dørøm tut taq shøm wàce shvra yv’ngø vjú røt shìe. Vrá nø, Calvary shigung Wurgang mvdvm yv’ngø a:tàqò nø shì yangì. Wervt vpø’ íwe pèmè vnvmchvngmaq, vkvtdø dvzvrì vshøm gø’í Yesuò Jór Pòngbang svng yv’nglúnò lòng nø lvklaí we Gvray gvsangò Shvmv’n jèjú ìshøt vming vkvng íe, walòng svng yv’nglúnshìe.

Shóngshø’ng we pèmè vnvmchvngmaq, Dèni Na,Nga nøngmaq gø’ vrvm kaq svng gø Vkangpè Yesuò Brimbrim shór we Jór Pòngbang, Gvray móngdàn svng yv’ng lúnlvm rvt ègō íē. Gvray gvsangò Kømzøp we Pvlàcè jèjú gønpaq jór kūnga svng vtoshì lúnlvm dvpvt Vkangpè Yesu Kristu Vmpà màv’m vnatshi nø Satan kaq jór lún yangà pàdø nøngmaq gø’ vrvm gø ya rvtø taq Vmpà màv’m, vm-aq vnatshi taqsórí vjúrøt tvleshì nø cvndvgøm we í Pvlàcè kvmnønt nònggùn kūnga lùshì laqlúni.

(1)Mongkà;-
Nvmlat Nvmpvng 12:1-4….
Gvray gvsangí nø Abraham svng ‘Kà shvdiq’ zíò we taq,
Nà svng nø Ngàí ring we dvcì í dvzv́r nø, nà svng shvmán dvgǿng lvm íe. Nà bø̀ng gø ring we í dvzv́rlv́m íe, wā dvkv’m yangà tvrà svng yv’nglúnshìe. Wè mvdvm Gvray gvsangò dvkv’m Kà svng Abrahamì Kvmnøntní cvndvgømò nø Jø’ngjøngni Gvray gvsangò Shvmv’n dvgø’ng Jèjú ìshøt ìgvn svng vtoshì lún yangà.

(2)Mongkà;-2 Timohti 1:8-10 .
Dvzvr Poloò Mongkà taq yadø wàe, ya lvpatnò yvklvm rì svng tønshì we í, chutchvng lòng svng vtoshì lúnlvm rvt shvngøt dvtúè. Nøngmaqò shagóng Nønt mvsønò nē taqkèní mvyv’ngshì lòng svng nøngmaqò Kvmnønt nē taqkèní yv’nglúnshìe. Gvray gvsangí nø nøngmaqò bvnlìrì rvt wa mø-í, Gvray àng Nønt shvrúng dø tiqdvchá, Angò shóngnøntní nøngmaq kaq svng chut èchvng ínø, Sher we rvzvngce vsvngrì wáshì lúnlvm rvt, Angí nø nøngmaq svng ègō íē. Vkangpè Yesuí nø, shì lòng nvng cúnlvm lòngò jór kūnga svng dvshérò nø , wè dvbùshang Mongkà taqkèní gønshaq cúnshì lúnlvm lòng svng gø, dvciq lvpat Dø’ngvng lúnlvm lòng svng gø angí dvtàn bø’à.

Angò Mvkok dvdí shóngnøntní nøngmaq svng Mvra vdòng yv’ngkèní chut èchvng bø’shà nø sher we rvzvngcerì wáshì lúnlvm dvpvt angí nøngmaq kaq svng ègō bø’shà we íē, wā Dvzvr Polo ígø Kristuò shóngnøntní vkvtdø shèdømìe.(Mt 17:5b)
“Yapè nø, Ngà vtv̄ngshaq nøtshø̀m nø Ngà shóngshøng we Ngàcè pè íe. Ang kà svng ètánøng,” wàdø tiqdvchá Vmpà màv’m, vm-aq vnatshì rvtø lvngcha taqø Shiwvt Mvra vdòng yv’ngkèní chut èchvng bø’shà we nøngmaqò Pvlàcè tiqgóng shvngbe svng Kvmnøntní sher dø dvcøp vdv’ngshì nø cúnshì we í Gvray dvgùng svng shvring shvta laqlúni wvng dvshat nø nònggùn zí mvyø’è. Shvngbe svng oqā.