Ngv̀nshà kaq shóngshì rà we
‘Nà tiqdv́ng vsvng kaq èshóngshi nø, nà nvng ngv̀nshà gǿ kaq shèngoshì,’ wa yà:ngì kà namaqí vtáshaq íe. Iwe, Ngàí namaq svng v̄la:tnìni; namaq nvng ngv̀nshàrì svng èshóngshinø̀ng. Namaq kaq vrè dvki rā vsvng dvpvt vjú èrøtnanøng. Namaqí yadø èwànø̀ng kvtnø muqlàng taqlap vl pè namaq Nvpè angcèrì èí lóngnønge. Kadø íe wani Gvrayí Ang nv̀m nø, svng mvgv́mrì svng gø, svng shvlári svng gø dvsv̄rāò nø; shø̄ gø, døngmanrì nvng mvdø̄ng mvmānrì svng dvchá dvzaqāòe.
Namaq nø namaq svng shóngshì rā rì kaq wā èshóngshinø̀ng kvt nø, zìbè pà gø mèv́lānøng. Kùyà gúnrì gø wedø nø wáshì we mø̀í ma? Namaq nø nvnvm nvchvngrì kaq wā shèwéshìnøng nìnø, vsvng mvdv̀m mvzv́n pà èwànø̀nge? Wv́ngzà rìí gø* wedø nø wàò we mø̀í ma? Wedø í rvtnø muqlàng taqlap namaq Nvpè nø kø̀mgøm tétǿng dø tiqdvchá, namaq gø kø̀mgøm tétǿng ràe, wàe.
Vpø’ íwe pèmè vnvmchvngmaq, Yesu ínø nøngmaqò ngvnsha rì svng shóngshì lvm nvng nøngmaq kaq svng vtu vre dvki vsvngrì dvpvt vjúrøtnà lvm dvpvt røtnímshì yangì. Døngman we shóngnønt vjø’ng nø nøngmaqò rvm nvng rvmchvng rì nvng døngku mvdvm Mvré zā we te lòng svng shvngøt dvtúè. Yvklvm vhø’mò vsvngrì kaq gø Mvré zā shóngnønt dvtán lúnlvm rvt nøngmaq svng ègō íē. Vkvtdø Mvre zā dvnúngshì lòng í, nøngmaq nø Vsvng shvngbe svng rvweng lvm mà-vl, Gvray gvsangò àng nønt í lòng svng dvtán lúnè.
Nøngmaqò ni vrvm cúnshàì we lvpat taqø yalòng Mongkàciq í nø nøngmaq kaq svng banchvk (mø-í nìnø) mà shvla dø yv’ng we Nønt svng kadøwā vta:nshàì dang dvdvm lvm rvt ègō íē, shèdømì. Nøngmaq nø Ngà wàwe Nønt, í dømshì lòng svng zø’m nø mvnvknìe mà? mø-í ni nøngmaq kaq svng Nønt zá dvzvr we vsvngrì kaq dvshér nø shv’mná rí lòng svng dvtán mvyø’ íe mà? dvdvm vjáng nø, nøngmaq cúnshàì we lvpat shvlá vtv’ng vnvp dø cúnshì lúnlvm rvt vjúrøt tvleshì nø Pvlàcè kvmnønt nònggùn kūnga lùshì laqlúni shvngbe svng oqā.
