“Kadøwa vjúrøtlv́m”
Erøtnøng; wekvt namaq svng èzí daqnø̀nge. Elánøng; wekvt lá èlún daqnø̀nge. Nàkoqnøng; wekvt namaq svng ètánā daqnø̀nge. Kadø íe wani røt gǿí nø lú:nòe. Láò gǿí gø, lá lú:nòe. Vkoqò gǿ svng gø tánā daqòe. Nvcè zidòng røtshì ra ke, lóng èzínøng we namaq kagǿ èv̀lnønge ma? Ngā røt rā ke, ang svng bø̀ èzínø̀nge ma? Vsvng mvgv́mrì namaqí dv́ng nvcèrì kaq gønpaq shvlá zí èshánøng kèní nø, muqlàng taqlap v̄l pè namaq Nvpèí nø, Ang kaq røt rārì svng wemvdv̀mø té mvzv́n gønpaq shvlári zí mvsháòni ma? Wervtnø̀, vsa:ngí namaq svng kadø wáalv́m èshòngnøng nìnø, namaqí gø angmaq svng wedø tiqdvchá èwáānøng. Pàwá wani yalòng nø Dvrá lòng nvng Kàdvtutshú kàrurì taq shvngøt we mvshǿl shvniq íe, wàe.
Vpø’ íwe pèmè vnvmchvngmaq, Dènio Mati Dvbùshang móngkà taq, Gvray gvsang ínø nøngmaqò Vjúrøt Kà rì svng táā nø nøngmaq zø’m dv’ngì lòng svng natv’nàì dang shvláwace røtnímshì lvm, lá lúnlvm, vkok mvn lvm rvt nøngmaq kaq svng Vkangpè Yesu í nø vkvtdø dvkv’mè. Vrá nø Kà shvbóng taqkèní gø shengøt íe. Rvgaqtøm nvng sing we angpè angmèmaqí dv’ng angdèo angcø angcèrì kaq svng gønpaq shvlá zílún i nìnø, Muqlang taqlvp vl Vpè Gvray ínø we mvdvm téwa nøngmaq dvpvt dvgø’à lvm, Shvmv’nà lvm vlē walòng svng vkvtdø Vkangpè Yesuí shóngnønt kèní dèkv’mìe.
Nøngmaqò ni vrvm lvpat taq yalòng Mongkà nø, vjúrøt we taq Kv’m ra lòng nvng Dø’ngvng lòngò mvdøng vchvk lòng svng vpø’shì lúnlvm rvt dvtá:nòe. Vrá nø, Nøngmaq taq tvlø:t gvzam lòng (mø-í ni) bø’n mvdaq dø í rì, Nøntbùm Nønt dvshà lvm rì vhø’mshì ra dvgvp Gvray gvsang ínø nøngmaq kaq svng tvrà shøl nø tùbùm dvbvngè walòng svng Ká:mì nø vlømshàì. Nøngmaqò lvpat nvng Tiqdvng Vsvngrì kaq svng gø shvla dø vjú zílún lòng svng vshò Nøntní lá we, gùndvtøp cvndvgøm mvyø’ we Nønt, Døngman lòngò àngmvtú rì svng lá nø vtoshì lúnlvm dvpvt, shèdømì we ègō ì we móngkà gø íe. Wervt vpø’ íwe pèmè vnvmchvngmaq, nøngmaq taq zø’m dv’ng íwe Døngman lòng nvng Jèjú ìshøt ìgvn rì svng Gvray Shvrúng we vdòng taq lá lún nø oqā wá lúnlvm Kvmnøntní røtnímtvleshì laqlúnì.Shvngbeí Gvray ìshøt, mongzøl lòng vtoshì laqlúnì! shvngbe svng oqā.
