Mòngzø̀l lv́m tvrà nø vchvk mvdø̀ng tvrà tiqlòng íráì nø̀ bv̀nlì tvrà dang rì nvng singnø̀ kàciqrì gv́l ràwe dang dvtú we
Pope Leo XIV taqkèní shvnvt, lvknvk rì láng nø̀ mvjàn gvsat we, mvjàn dvbu:ngò we tvrà rì nvrnø̀ mòngzø̀l we tvrà rì svng cvn cvn vrang dvzaqshì lv́m àngboq boq dvtú mòngkà kèní vrì:ngò we íe. Ukraine mvjàn bø̀n we 4 nǿng vhøm bǿì we nvng singnø̀ Svrabín koqkv́mpè nø̀ “We mvjàn rì cvn cvn nvr lv́m èwànø̀ng, cø̀msaq mòngzø̀l lv́m tvrà rì kèní vzø̀m lv́m dvpvt vrashì lv́m laqni vchvk bǿì” wanø̀ dvtú bǿà we íe. Mvjàn wawe nø svngpv̀n dvcì shvngbe svng vtøp dvzv́r we tvrà tiqlòng gø íe. We tvrà nø vsvngrìò lvpat rì svng shí dvzv́r we, gvyaqshì nø vrǿl dvzv́r we nvng dvcì dvgø̀ng mvshǿl rì høqshaq zá vtøp dvzv́r we tvrà gø íwe dang shvdǿm we íe.
“Shvnvt shaqrì laq zø̀mvm, bùmrì wvpmì we bv̀nlì rì shvngbe nvr vdu á:mì, mvjàn lòng svng cvn cvn nvr lv́m wàì, we dang nvng singnø mvngu shì weí mvtú lá laq lúnì”. Yanilaò mònggv̀n dvjà taq mvjàn rì rvt dvshà mvhøt lv́m vhǿ:mò we vsvngrì yv̀:ngì nø gvzà nøt dvshà lv́m vl we dang dvtú mòngkà vrìng bǿà we íe. Mvjàn rvt mvdø̀ng zá vtøp dvzv́r we nø̀ móng vsvngrì ínø̀ we mvjàn rvt svngpv̀n dvcì mvdàm dvshà mvhøt dvzv́r we svng síngshá lv́m, mvjàn rì cvn cvn nvr vdu bǿì wanø̀ dvtú we íe.
Yalòng nø nøngmaq tiqgǿ vrv̀m rìò dòng nøt mvsø̀n rì taq síngshá lv́m, vchvk we tvrà tiqlòng ku vshøp shì lúnlv́m dvkám we íe. Pope Leo XIV taqkèní vjúrøtā we tvyø rì taq Ukraine móngdàn vsvngrì nvng mvjàn rvt mònggv̀n taq dvshá mvhøt vhǿ:mò vsvngrì dvpvt vjúrøt dvbangā we ínø̀ shvngbeí hø vjúrøt dvbangā lv́m dvkám nø̀ dvtú bǿà we íe.
