Yesu dvløt vhø’mò we
Vpø’ íwe pèmè vnvmchvngmaq, Ya lvban taqkèní Vm-aq Vnatshi Nár (1) lvban wà lvban svng gòng bø’shà.
(1) Bungam 2:7-9, 3:1-7
(2) Roma 5:12-19or 12,17-19.
(3) Mt 4:1-11
Vpø’ íwe pèmè vnvmchvngmaq, Jøm Mongkà:-
Ningpawt Ninghpang 2:7-9, 3:1-7 vdòng taq, Adam nvng Ewa ní ínø, Gvray gvsangí vm mvdaq wa dvkv’mò nvmsi svng rø:pvmō tvrà yv’nglúnshìe.Roma 5:12-19 … Yesu Kristu àng í cvndvgømò lòng í, Vsvng shvngbe nø Døngman lún nø, gønshaq chutchvng lòng lún bø’à.Vsvng mvmè nø Døngman vsvngrì í lú:ngè, wàe.
Dènio Mahte 4:1-11 …… Vkangpè Yesu nø rvgaq mvgūng móngø, Vbícéni (40)ni vm-aq Vnatshi vjúrøtshì sórí Dvrá shvdiqshì dvgvp, Santaní dvløt we vhø’mò tvrà yv’nglúnshìe.
Yesu dvløt vhø’mò we
Vpø’ íwe pèmè vnvmchvngmaq,
Vkangpè Yesu dvløt vhø’mò tvrà taq, vshøm dang vl lòng svng Mati, Marko nvng Luka dvbùshang Mongkà taq vrù yangà dang yv’nglúnshìe. Yesu nø Tìløp zíshú Yohan(baptisma) wur taqkèní Tìløp vtoshì bø’ì mèpvng, rvgaq mvgūng móng svng dì nø vm-aq vnatshi we í Vbícéni (40)ni døp vjúrøtshì nø vl yangì. Wè dvgvp àng taqø shagóng nònggùn kūnga vnø’n nø yúm lú:ngì. Vkvtdø íwe rvtø taq, Santan pè nø tuq lúngì nø Vshøm (3) dang taqkèní Yesu kaq dvløtnòe. Wè Vshøm dang nø;-
(1) “Nà nø Gvray Angcè pè èí kvt kèní nø, lóng yarì svng zidòng lví lōng dø dèká:mò,” shø’n dvzvròe.
(2) Shànshér tø̀ngnø zòngmuq yv́ng shvri:pmò dá:ngí, “Nà nø Gvray Angcè pè èí kvt kèní nø, pv̄ngkaq dègupshi, wā dvzvròe.
(3) “Nà køt èngǿmshì nø ngà svng ènokngà kvt kèní, yarì shv̄ngbe nø ngàí Nà svng zílv́m íe,” wā noq dvzvròe.
Vrá nø, Satan pè í nø Yesu kaq àng svríshì bál lòng svng ba:n lúnlvm dvpvt, Angò vming vkvng jór pòngbang lòng svng lv’ng dvzvròe. Vrá nø, Gvray gvsangí kùpgar lòng svng vløt lúnlvm dvpvt dvløtnòe. Móng dø̄ngtáng móngdànri í dv́ngte nvng werìò ngø̀r dvgùng svng shvyā:ngò sórí, Nà køt èngǿmshì nø ngà svng ènokngà, wā á:lòe.
Wekvt Yesu vtá:nshì Kà rì nø;-
“Vsvng nø zidòng kèní wā cúnshì we mø̀í, Gvray nònggøp kèní būng we Mòngkà, kà vrv̀m kèní mv̀ng cúnshì lún we íe, ” wā nø̀ vrūshaq íe,” a:lòe. “Nào Gvray kaq nà í vløt lúnlvm mø-í, ” wā nø̀ gø vrūshaq íe,” a:lòe.” Nào Gvray kaq svng wā nà í noqngøm ràe, wā nø̀ gø vrūshaq íe,” wā vtánshì ke wèlvngí Satan pè nø àng yv’ngkèní yílshì á:mì nø, jór lún bø’à.
Vpø’ íwe pèmè vnvmchvngmaq yadang svng dvdvmì taqsórí
Bāsha rì shvrúng i Tvrà
(1) Du gamzø (power),
(2) Dvgùng gùnshang lvm (prestige),
(3) Dvgùng vyā taqkèní byōlvm lòng svng shvrúng we (pleasure).. yadø í rì íē.
Vrá nø, Nøngmaq cúnshàì we lvpat taq Dvshà mvhøtlvm, yvklvm rì vhø’mshì lúng dvgvp vm-lvm, aq-lvm, lv’ng lvm, gwalvm, ja gvmsung angpvnpvn taqkèní tiqdvng í vtu vre vl sháòe. Vkvtdø vhø’mshì ra dvgvp Vkangpè Yesu vtá:nshì yangì pàdø Vkangpè kaq svng vlømshì Kvmnøntní vtánshì lúnlvm, Kvmnønt shvdø’ng shvngvngshì nø Shvkse wáshì lúnlvm gvzà vchvkngè. Vmvng sháò we vm-lvm, aq-lvm, ja gvmsung rì í Ring nø vpø’ we Døngman we angdèo Kvmnønt tvrà svng mà tvlevmlvm rvt shvngøt dètú íwe, dèkv’mì we móngkà, lvpat mvshøl gø íe.
Nvmlat nvmpvng Mongkà taq:-
Adam nvng Ewa nø Gvray gvsangí øp kv’ng we dvkv’m Kà lòng svng mvcv’nò nø, àngníò shagóng Nønt shvrúng lòng svng cvnshì rvt Mvra wà bø’à. Vkangpè Yesuí nø Gvray Kà svng cvndvgømò weí, vsvngrì kaq svng chutchvng we í Døngman dvzvr bø’ì. Satanò dvløt lòng svng jór lún bø’à. Dvløt gvzam lòng nø vløt we(Test) tiqlòng gø íē. Angdèo cúnshì lvpat angdèo àngdvja kadø bøn lòng svng shálún lvm rvt, dvdvm vshat dvzvr dang gø íe. Yalòng vm-aq vnatshi rvtø taq nøngmaq kaq svng vjúrøt shì lvm (prayer),’ Vm-aq vnatshi we í cúnshì nø dvshá zā bvnlì rì, Mvré zā bvnlì rì dvnúng taqsórí, Pvlàcè nònggùn kūnga Jèjú ìshøt rì svng vtoshì dvzvrè.
Vkangpè Yesu nø satanò bvnlì íwe dvløt gvzam lòng svng jór a:mì nø, nøngmaq kaq svng chut èchvng bø’shà. Àng taqø jór nònggùn pòngbang nvng jór dvgùng gùngshang lòng nø dvciq lvpat Dø’ngvng á:mì. Vpø’ íwe pèmè vnvmchvngmaq, Nøngmaq lvpat taq gø satanò dvløt gvzam lòng vhø’mshì ra dvgvp Jór lúnlvm cúnshì we Gvray móngkà svng dvdvm vjángì taqsórí kvmnønt nònggùn kūnga lùshì laqlúni shvngbe svng oqā.
