Vmpà màv’m vnatshi rvtø lvngcha taq Svrabín Koqkvm pè Leo (14)ò Shvngkà
Shóngshø’ng we vnvm vchvngmaq e –
Vmpà màv’m vnatshi rvtø lvngcha wàwe nø Àng mè tiqgø’ ku mvkok dvdí roqgar nø shvngømré kèní dvtú we í Nøngmaqò kvmnønt tvrà svng vrá tiqkvt àngshvr wáshì lúnlvm dvpvt nvng ni vrvm lvpat taq Nønt dvsha Nønt bùm lvm rì, dvhø taqkèní nøngmaqò Nønt mvsøn rì vnø’n we mø-í lvm dvpvt Gvray gvsangò rvnaq we dvkv’m Kà gømlā rì, nøngmaq lvpatnò mvdøng angké íwe tvrà kaq vrá shøl lúnlvm rvt go we rvtø lvngcha gø íe.
Nønt mvsøn vjang laqyà vwángshì lúnlvm lòng kaq dì we tvrà vrvm nø, Gvray gvsangò móngkà svng angdèo Nønt mvsøn vdòng kaq vkoq ā lvm vming vkvng zíshì lòng, wè móngkà lòng svng cipshì we Pvlàcè kvmnøntní vtoshàì yv’ngkèní pvngshì lòng íe. Gvray móngkà svng vtoshì lòng nvng vkvtdø vtoshì lòngí bung ra we vlíng vpō ra lòng dvhø yv’ngø vzøm we tiqlòng vlē.
Wervt Vm-aq Vnatshi rvtø lvngcha taq Gvray gvsangò Kà svng tashìlvm nvng Kristu mèpvng cvn lvm dvpvt ínø, nøngmaqò Kà shvdiq svng vrá tiqkvt vpø’ shìlvm rvt vtoshì lúnì we vming vkvng tiqlòng gø íe. Kristuò dvshà mvhøt vhø’mò, shìlvm lòng nvng cúnlvm lòngò rvnaq we mvtú dang rì Kømzøp lvm Yerusalem myoq kaq svng dì we tvrà taq Vkangpè nvng tiqdø dí laqlúnì.
Tashì lòng;- Denøng vdòng taq nøngmaq nø tāshì lòng yv’ngkèní tiqdvtang Mongkà dvpvt shvra dvgø’à lúnlvm rvt gø vchvk lòng svng nvmlat taq dvdvm vjáng dvzvr mvyø’è. Tashì mvyø’ shvrúng lòng nø tiqgø’ gø’ nvng vzøm vzap vrvngshì mvyø’ we nøngmaq shvrúngì lòng svng nvmlat dvtán we tvrà gø íē.
Vcōr we Svmi pòng vdòng kèní Moshi kaq Vpè dvtánshì we taq Gvray nø dālvm mvshvr pvrá gømlā tiqlòng i dang cvnà yangà. ” Ejip móng taq vl we ngào vsvngrì í vhø’mò we dvshà mvhøt lvm lòng svng Ngà ínø jø’ngjøngni yv’ng lún bøngà” (Búngám 3:7). Shvnip shvnar vhø’mò vsvngrìo vkiq we shaq svng tálúnshì lòng nø lutshì lòng mvshølò nvmlat pvngshì lòng ínø, wè yv’ngkèní tiqdvtang Gvray gvsang ínø Moshi kaq gōò nø vshuq ku tuq bø’ì we dvci cerì dvpvt chutchvng we tvrà svng tá:nà lúnlvm dvpvt dvzvr yangà.
Nøngmaqò Gvray gvsang nø nøngmaq kaq vnvpshì lún we rvzvngcerì wáshì lúnlvm shvrúng we Gvray íē. Dèni høqshaq Gvray gvsangò shóngnønt vdòng vl lúnì rì svng nøngmaqí dvsher lúnìe. Wervt Noqngøm shvring shvtā we taq cúnshì we Gvray móngkà svng tashì lúnì lòng nø nøngmaq lvpat yv’ng Døngman lòng tashì lúnlvm rvt shèdømì nø shengøtnìe. Nøngmaq lvpat, vsvng mvngpòng dvhø taq tálúnshì we shaq rì dvhø yv’ngø Shànshér we móngkà bok nø nønt dvshá vhø’mò rì nvng yvklvm vhø’mò vsvngrìo shøn Kà shaq rì svng rvdoq rvwvn lúnlvm dvpvt nvng vtánshì lvm nøngmaq kaq dvbvngè. Vkvtdø tálúnshì rvt Nønt mvsøn bvngka tánshì lvm lòng svng dvbúng lúnlvm rvt Gvray gvsangí nø ètáā ì pàdø nøngmaq ígø táā lúnlvm dvpvt Vkangpè yv’ngkèní cvnshì lún ra we íe. ” Dvshá hoq Vsvngrìo àngdvja nø Vsvng pvn dvci v-rvmò lvpat mvshøl yv’nggúng taq nøngmaqò lvpat rì, vsvng mvngpòng mvdò rì, Móng lvmvng nvng wurlaq tvrà rì mvdvm shvngømré kaq svng gø rvtø vrvm røt nø vkiq we shaq tiqlòng í dang” nøngmaq í shvdø’ng ra we íe.
Vmpà màv’m vnatshi; Vmpà màv’m vnatshi rvtø nø Tálvm rvt wā íni nø, vm-aq vnatshi lòng nø Gvray gvsangò móngkà svng vtoshì lvm rvt àngde tiqgóng dvcøp vdv’ngshì we vpø’ we Dvla tiqlòng íe. Vmpà màv’m vnatshi Dvla lòng nø mà-vl mvdaq we cārvmang Pvlàcè kvmnønt svng shvdø’ng shvngvng shì we Dvla tiqlòng íe. Shagóng nvng singwe í rvt vm-aq vnatshi lòng nø nøngmaq jø’ngjøngni pà svng”bálì”mà? Nøngmaq lvpat cúnshì lúnlvm rvt pà svng mvdøng mà-vl mvdaq ra íe mà, wā zúnìe mà walòng svng téwa síngràl dvzvrè. Wè mvdvmø wè lòng nø nøngmaqò ” Shvrúng we Mà:pnøt rì ” svng rvdoq rvwvn lún nø vbóng vtuk dø í lúnlvm dvbvngè, vlún vkvng dvrá rì dvpvt bál lòng taq cúnshì dvzvr nø, V-toq V-tip vrvm vrá vzøm lòng yv’ngkèní vcar dvzvrè. Wervt vjúrøt shì lòng nvng nitvp rì mvdvmø bvnlì shvlá wa dvnúng lúnlvm rvt shvngøtnè.
St. Augustine nø vkvtdø lúnshì we rvtø nvng vzàng lvp yv’ng Kømzøp dø dvkøm lúnlvm rì dvhø vl dvdòl we kūnga svng síngràl lúnlvm rvt Pvlàcè àngdvja taqkèní yv’ngshì lòng svng vkvtdø shø’nè. Cúnshàì we Mònggvn lvpat taqø vsvngrì nø rvprà we dvrá vlún vkvng lòng svng bál lvm rvt bvnlì døngja vdáì nigø, v-rvm vrá Kømzøp lvm lòng nø mèpvng lvpat taq wa bø’n sháòe. Muqlàng dvzvrì nø yalòng muk, yalòng vmpà taqkèní Nøntshøm lúnì gø, vsvng pvn dvci rì nø wèlong svng bál shàìe. Nøngmaq shvngbe nø nøngmaqò shvrúng lòngí wèlòng svng shvrúngì nø mvrøtnìe. Vkvtdø mvrøtnì lòng nø Pvlàcè svng tétøng dvzvr we ínø, wè lòngò kūnga svng shvluq shvtvm dvzvrè” wā shø’nè. Yadang kèní èyvng lúngò dvgvp Vmpà màv’m vnatshi lòng nø nøngmaqò Nønt mvsøn vdòng kèní shvrúng lòng svng øpshì lúnlvm rvt, dvsher lúnlvm nvng téwa lutshì lúnlvm rvt vming vkvng zi lòng mvdvm, Gvray gvsang kaq mvnggá gvl dí lúnlvm rvt nvng shvla we jèjú bvnlì wà lvm dvpvt wèlòng svng téwa dvtøngà nø gwà dvzvrè.
Íni gø dvbùshang mongkà Dvrá nvng vbóng vtuk dø Vmpà màv’m vnatshi lòng svng cvndvgøm lúnlvm dvpvt nvng hángshì mvyø’ lòng svng dí dvzvr mvyø’ we līn lòng svng vyáshì lúnlvm dvpvt, wè lòng svng Kvmnønt nvng cipshì lòngí øpshì nø cúnshì ràe. Wè lòng nø Gvray gvsang nvng tiqdø vl lòng mvdvm taq mvtú ra ìe. Àng mvtú nø ” Gvray gvsangò móngkà taqkèní àngde tiqgóng svng shv-ám shv-aq mvlúnò vsvngrì nø shvlá wace Vmpà màv’m vnatshi rì mø-í.” Gvray gvsangò jèjú ìshøt tùbùm dvbvng lòngí Mvra nvng màshvla pvn rì kèní dvshér lúnlvm rvt dvkv’mè.
