“Jep we Dvrá nvng kàdvtutshú kàrurì”(The Law and the Prophets)
Vkangpè Yesu mvdøng shvngøt dvkv’m we taq Nga døng dakngà lòng nø”Jep we Dvrá nvng Kàdvtutshú rìo Kà” svng catlvm rvt døng dakngà we mø-í, welòng svng le vrá shvdø’ng shvngvng lvm rvt døng dakngà wā shvngøt dvtú we Nár ni gø íe.
Ya lvban Rø v-du we Jøm Mongkàciqrì;-
(1) Sirak 15:15-20
(2)1Korinhtu 2:6-10
(3) Mati 5:17-37 vdòng taqkèní íē.
Sirak 15:15-20 ……. Gvray gvsangí nø ídv’ngte pvn vrvm shvngbe svng shálúnò we nvng shvngbe svng yv’nglúnòe. Angí pv’nmvn bø’à we Bāsha vsvng vrvm kaq svng gø yv’ngò nø, vsvng í wáshì we bvnlìrì shvngbe kaq svng gø angí mvsøngòe, shvdømè.
1Korinhtu ….2:6-10 …… Gvray gvsang ínø, Pvlàcèo Wur taqkèní Paqzi paqrvt svng nøngmaq yv’ngø shvzōò nø dvtánòe, wā shvdømè.
Mahte 5:17-37 …….. Vkangpè Yesu shøn we taq, “Jep we Dvrá nvng Kàdvtutshú rìo Kà” svng catlvm rvt døng dakngà we mø-í, welòng svng le vrá shvdø’ng shvngvng lvm rvt mv’ng, døng dakngà, wàe.
“Jep we Dvrá nvng kàdvtutshú kàrurì”(The Law and the Prophets)
Vpø’ íwe pèmè vnvmchvngmaq,
Mvdvm kaq shø’nshì bø’ì we Kà yalòng nø, Jøm Mongkà ciqrì shvngbe svng tvnù nø, shø’nshì we tvrà íē. Vkangpè Yesu ínø yalòng svng shvdø’ng shvngvng lvm rvt dì lú:ngì tvrà svng shvngshvngwace shøn sórí dvkv’mè. Ya lvban taq Rø í we Jømciq nø, Vkangpè Yesuí shigung mvdvm yv’ng dvshvngò we móngkà rì (Sermon on the mount) taqkèní nvmlat wál íe. Ya lvbanò móngkàciq taq, mvtú (4) dang taqkèní gø dvkv’m we vbáè. Wè rì nø:-
(i) Vsvng shvt we, Shvmná rí we tvrà nvng singè.(murder & anger),
(ii) Svma, lvngà dvchap we tvrà nvng singè.(adultery),
(iii) Døngku vbàl vkvng we nvng singè.divorce),
(iv) Mvdìng mvman we dvgv’m Kà shø’n we nvng singè (oaths)…yari íe.
Nàmaq taq, Døngman lòng nø Dvrá svrarì nvng Farisirìmvdv̀m mvzv́n døngman ràe, wàe.
Kangpè Yesu Ang dvzvrì kaq svng shø’n we nø,” Dvrá svrarì nvng Farisirì angmaq døngman lòng mvdv̀m mvzv́n mèdøngmannøng kvt kèní nø, kadø ínìgø namaqí muqlàng móngdàn góng mèlúnnøng.” Mt5:20).“Namàqo Kà nø, ‘Í lòng nø íe; mø̀í lòng nø, mø̀í,’ wa mv̀ng shǿn ràe. Yakà ní mvdv̀m mvzv́n èshø̀:nò we kapà ínìgø, mvgv̄m vnaq pè kèní būng we íe.”(Mt 5:37).
Vrá nø,Kangpè Yesu Shvrúng we Tvrà
Vkangpè Yesu ínø, lvmboqrì Dòng Nønt mvsøn mv’ngsher we døngman vsvngrì wáshì lúnlvm rvt shvrúngè. Dvtut Vkangpè Yesu Àngmaq svng shø’n we taq, angdèí èshø’nò Kà vpø’ nø ring lvm dvpvt døngman we vl ràe, wàe. Wekvt wā Pà dvgv’m Kà gø shø’n mvra. (Kà shvbóng) Døngku shvzøngshì dvgvp gvlshì we kà shvdiq svng vpø’ shvring nø gvl ràe. Vkvtdø cvndvgøm lòng í, Gvray gvsangí kùpgar we Shvmv’n jèjú svng vtoshì we lvmboqrì, dvzømshú rì wáshì lúnlvm íe, wàkà íe.
Wervt vpø’ íwe pèmè vnvmchvngmaq, Vkangpè Yesu Kristu Shvrúng we taq, dvbú lúnlvm lvmboqrì kaq svng
shvngøt dvtú dvkv’mò pàdø, dèni nøngmaq shvngbe kaq svng gø Dòng Nønt mv’ngsher we rvzvngcerì, Vkangpè Yesu vdòng taq Gvray Dvrá svng cvndvgøm we, Dø’ngvng we shvngømré, Gvray dvzømshú rì, Kvmnønt vl we rvzvngcerì wáshì lúnlvm dvpvt ègō íē, dèkv’mì we móngkà íe.
Vpø’ íwe pèmè vnvmchvngmaq Jøm Mongkà (1)ciq;-
Sirak lega taq,” Gønshaq cúnshì lvm lòng nvng Shìlvm lòng svng, Vsvngrìo mvrdvngø v-gvlshaq ínø, Àng rvzvngshì lòng svng àng svng ni zí lú:ngòe” wàe. Vkangpèo Paqzi Nyan Bvnya nø vtvng rvnaqe. Angí nø pvn vrvm ídv’ngte shvngbe svng sháò nø, yv’ng lúnòe. Vsvng kagø’ svng gø Mvra vléshì dvzvr we mà-vl; Dvrá lòng svng cat lvm rvt gø Vming vkvng zi we ma-vl.
Jøm Mongkà (2)ciq;-
Dvzvr Polo í Korinhtu shvngømré vsvngrì kaq svng dvshvngò we móngkà taq, yadø wàe. Gvray gvsangò ring vtv’ng Paqzi Nyan Bønya Kà í Namaq svng shø’nie. Yalòng Paqzi svng Rvgaqtømò Du gamzø kagø’ ígø, shá mvlúnò. Jøm Mongkà taq vrù yangà dø tiqdvchá,
” Nē í mvyvngò , V-na í gø tá mvlúnò nø, vsvng Nøntní mvsíng mvràlshì dang, Gvray gvsang ínø ang kaq shóngshì rì dvpvt dvgø’àe,” wā shø’n yangì. Vrá nø, Gvray gvsang í nø, Pvlàcè Wur taqkèní yadang svng nøngmaq yv’ng dvtánòe, wā Dvzvr Polo taqkèní gø vkvtdø Gvray gvsang Nyan Bønya Paqzi, Gvray ang Nønt shvrúng lòng svng shvngøt dvtú nø shèdø’mì tvrà íē.
(But let your ‘Yes’ be ‘Yes’, and your ‘No, ‘No.’)(Mt 5:37)
” Nào Kà nø, ‘Í lòng nø íe; mø̀í lòng nø, mø̀í,’ wa mv̀ng shǿn ràe.” wā (Mt 5:37) taq Vkangpè Yesu angí shvngøt dvtú yangì dø tiqdvchá Døngman we Kvmnønt Tvrà taq dòng nønt mvsøn tiqgóng shvngbe taqkèní vchàng nø Vkangpè Yesu shvrúng we taq, shvkse wáshì nø cúnshì laqlúnì.. wvng dvshat nø nònggùn zí mvyøngè. Shvngbeí Vkangpè Yesu Gvray mongzøl lòng vtoshì laqlúnì shvngbe svng oqā. Pamvra.
