Gvrayí nø nøngmaq kaqsvng kadvgvp gø ègur lú:ngì we mǿí
Svrabín koqkv́mpè Leo XIV taqkèní dvtú we taq Kàngpè Yesuí dvkám ráà we mòngkà rì svng dvtøp cv́n dvgøm nø̀ àng nvng vzøm we mòngzø̀l we lvpat tvrà nø gálòng svng ezíì we dang dvtú mòngkà vtàn bǿà we íe.
St. Peter noqngø̀m tø̀mø mvngushì ráì we shìwà vsv̀ngrì kaq Kristu nø Jejú tvrà 8 dang svng dvtú ráà we mvtaq we tvrà svng cv́n dvgøm we vsvngrì rvt mònggv̀n rvgaq nø mòngzø̀l we tvrà svng vtán longwe dang dvkám we íe.
Vdèò nøt mvsø̀n laqyà rì svng cipshì nø vdu vbóng we dvrá tvrà rì kaq cv́n dvgøm we vsvng rì nø mòngzø̀l nø lvpat vháng we tvrà svng tuq lún we nvng ngànshàpè ò tvrà rì nvng àngò mvhøt lv́m tvrà rì svng gø vle lúnwe tvrà rì svng dvtú we íe. Wedø mònggv̀nò màdvrá we tvrà rì svng vle lúnwe tvrà nø svríshì we vsvngrì kaq shvám shvaq we, dvshá mvhoq vsvngrì nvng dvgørà chø̀m màdá vsvngrì kaq mvkok dvdí we góng gwá bèlaq màdá vsvngrì kaq góng gwá rì dvcøp dvgǿā we tvrà íwe dang dvkám bǿà we íe.
Wedø shvla we bv̀nlì tvrà rì taqkèní mònggv̀n svng gálòng kèní dvshóā lúnwe tvrà íwedang shvdǿm we íe. Mònggv̀n rvgaq yachà:ng nø dø lòng nvng gálòng wawe 2 tvrà kèní vrang shaq íwe taq rvcángcèrì nø gálòng tvrà mvdàmø kadvgvp gø rip ràwe dang dvkám we íe.
Kàngpè Gvrayí nø nøngmaq shvngbe tiqgǿ vrv̀m svng èsháì we ínø̀ àng kà táì we àngcǿ àngcè rì bǿnlún lv́m dvzaq shì ràwe dang dvkám we íe. Nøngmaq shvngbe nø mònggv̀nò shvlaq dø wáshì lún lv́m àng taqkèní shvdǿm we íe.
Vdè góng vdè nø dvpǿ mv-vl wanø̀ dvdut shìwe vsvngrì nø gálòng svng dvgø shì nø dølòng vdòngø kǿrshì we vsvng nvng bónge. Wervt Kàngpè Yesuò dvkám mòngkà taq àng taqkèní bashà vsvngrì kaq kadvgvp gø mègu:rì nø shóng nøt èzíì we dang tiqgǿ vrv̀mò dvshà mvhøt tvrà rì, nøt dammá rì svng shvzǿmā we dang dvtú we íe. Wervt Yesu Kristuò gálòng vdòngø mvngu shì ràwe dang dvtú we íe.
