Tiqcé vní pè dvzv́r bǿà we

Yesuí nø tiqcé vní pè svng Ang yv́ng goa:tnà dá:ngí, vní gǿ vní gǿ dvzá:ròe. Mvmv́ng cáng kaq lúng dv́nglv́m vmíng vkv́ng gø A:ngí angmaq svng zíòe. de Tvrà dvpvt dvrv̀ng wa mø̀í nìnø, mvzv́ng gø, tòngzv̀n gø, juqnv́m taq gv̀msùng gø, dvgá kapà gø mvlv́nglv́m, A:ngí angmaq svng dvká:mòe. Híshvnam nø gweshì dv̀ng íe, ínìgø bèlaq vní dùng mvgwashìlv́m dvká:mòe.

Vrá angmaq svng, “Kayv́ng ètuqv́mnøng nìgø, namaq kachø̀m svng ègòngv́mnø̀ng nìnø, we mvrìng kèní mèbúngnøng dv́ngte nø wechø̀m taq v́ldv̀ng èwànø̀ng. Kayv́ng namaq svng mènàtovtnøng nø, namaq kà rì svng gø mètáanø̀ng we vl nìnø, weyv́ng kèní èbúng daqnø̀ng kvt, angmaq svng vchaqlv́m shvkse wáshìlv́m dvpvt, namaq hípvng vyin we dvtø̀l nàchaqshi ránøng,” a:lòe. Wekvt wepèla búngá:mì nø, nøt língshì rà we mvshǿl dvsha:ngòe. Angmaqí cáng gø mvme lùng bǿà nø, za we mvme gǿ svng zanlún yøtìí ma:tnò nø dvbānaòe.

Vpø’ íwe vnvmchvngmaq, Dènio Dvbùshang móngkà taq Gvray kaq vlømshì lvm nvng àngmaqí Dvrá mongkào vchvk lòng svng vpø’ shvringò nø lvmboqrì kaq svng dvzvr bø’à. Lvmboqrì nø Yesu í dvtú lòng svng tønzv’n lúnlvm, Vkangpèo vming vkvng lòng svng cvndvgøm lúnlvm nvng za yv’ng dvban we, Cang Satan dvchøp rì kaq svng dvshérà lvm, vkvtdø í rì vbá nø àngmaq taqkèní dvsha:ngò we, vjú lúnlvm lòng svng dvtánòe. Dvzvr rì svng angmvdo angmvdò wáshì dvzvrò we taq tāsvng tālè tùbùm dvbvng ké lvm gø gvzà vchvk, gvl ra dø tiqdvchá, nøngmaq lvpat taqgø angmvdò lvpat vdòng taqgø (ကိုင်းကျွန်းမှီ၊ ကျွန်းကိုင်းမှီ) wa pàdø, tiqgø’ nvng tiqgø’ tāsvng tālè tùbùm dvbvng ké taqsórí Gvray Shvrúng lòng svng zvndvtut lá lúnlvm rvt jèjú ìshøt rì svng røtnímshì laqlúnì.