Ìshøt ìgvn vl kà(8) lòng svng zíò we

1 February 26, Nár (4), A Nø’ng

Shvngbe svng Pamvra!
Gvray gvsangí kùpgar we jèjú vdòng taq Mongzøl dø cúnshì lúnì nø, Rvtø v-rvm, lvban vrvm Gvray móngkà taqkèní Pvlàcè kvmnønt nònggùn kūnga lùshì lúnì we, Noqngømì we í shvring shvta oqa wá lúnì we gø Gvray gvsangò jèjú gønpaq íe.

Ya lvban nø (A) nø’ng Angwa Nár (4) lvban wà lvban svng gòng bø’shà. Ya lvban nø lvmboqrì kaq Ìshøt ìgvn vl kà(8) lòng svng zíò we lvban gø íe.

Ya lvban Rø lvm Gvray móngkà ciqrì:-

Zehpani 2:3, 3:12-13
1Korinhtu 1:26-31
Mahte 5:1-12

Vpø’ íwe pèmè vnvmchvngmaq,
Zehpani 2:3, 3:12-13 ….. Ngàí nàmaq dvhø̀ taq, nøt kø̄n nø cipshì we bashà tiq mvdò làng rángò nø, angmaq gø Gvray bø̀ng taq máshìrà wáshì longe. Wekvt Israel dvcì kèní mvzā vdv̄ng mvdòí gø vléshì we pàgø mvwà lú:ngò; vyákà gø mvshø̀n long. Angmaq nònggøp taq gø yùmvm we pvlè mvyv́ngshi long. Kadø íe wani angmaq svng svre dvku:tnò we tiq gǿ gø màvl dø, pànøt mànøt angmaq nø v̄m aq nø v́l lúnshi longe,” wae.

1Korinhtu 1:26-31 ……..

Dvzvr Polo í dvshat we móngkà taq nø,.. Vnvm vchvng rìé, Gvrayí ègō yv̀ngshà dvgvp namaq tvrà kadø í we svng èdaknø̀ng: shagóng dāng kèní shánøt zitnøt v̄l vsvng kādv́ngte mvluq; vmíng vkv́ng lú:nò rì nvng gōrīng dvgø̀ng kèní gø, goò we kadv́ngte màvl. Wedø ínìgø, zitnøt v̄l rì svng shvraqshi dvzv́rlv́m rvtnø, rvgaq tø̀m angdál rì svng Gvray gvsangí nø rvcv̀ng daqà. Gvray gvsang ínø, Namaq svng Yesu Kristuò shagóng wáshì dvzvr bø’ì. Wervt Mongkà taq vbá dø tiqdvchá Vming vkvng lún mvyø’ rì nø Vkangpè vdòng taq ìshøt ìgvn laqlúnò wàe.

Mahte 5:1-12 …….
Vkangpè Yesuí nø, lvmboqrì svng shvngøt dvtúò taqsórí, ” Ìshøt ìgvn vl Dvrá vshvt” dang svng shø’nò nø, Jø’ngjøngni Døngman we, dvbù nønt shø’m lúnlvm ang lvjøm rì svng pø’:nàoe.

Mvre yv’ng svng ngāng á:mì nø dvshangò we Vkangpèo Mongkà taq:-

Yesuí nø vsvng loksok kaq svng yv’ng bø’à jàng, Mvre yv’ng svng ngāng á:mì. Íwe Vsvng loksok ínø Yesu Kristu kaq yv’ng lúnlvm dvpvt nvng Angò Mongkà svng táshì lúnlvm rvt dì ráì. Wè yv’ng àng Nvmrúng dvgvp, Dvzvr rì àng shvnvngø vnvpshì nø kúrshì lúngì. Wekvt Yesuí àngmaq svng shvngøt dvtúò sórí shø’n we taq, ” Ìshøt ìgvn vl kà (8) lòng svng Dènio Gvray Dvbùshang móngkà taq vrá tiqkvt tálúnìe.

Vpø’ íwe pèmè vnvmchvngmaq, Mvdvm taq tálúnì we” Ìshøt ìgvn vl kà (8)” lòng nø, Mvre yv’ng ngāng á:mì shigung mvdvmø Vkangpè Yesuí, shvngøt dvtú yv’ngkèní Yesuí cvnà we Ìshøt ìgvn vl we Dvrá me rì íē. Vkangpè Yesu mèpvng cvnì we rvzvngcerì gø’ vrvm taqgø vl ra we Nønt mvsøn, vjang laqyà rì svng zv’ngà lòng gø íe. Dvzvr rì àngmaq lvpat taqkèní cvndvgøm sórí Gvray móngdàn Sasvna bvnlì svng dvnúng nø wáshì lùng dvgvp, Dvzvr wàwe vjang laqyà taq Kømzøp lúnlvm dvpvt Nønt mvsøn rì svng dvcøp vdv’ngà lòng gø íe.
Angde í dvshàngshì we Mongkà nvng vbóng vtuk lúnlvm rvt shvngøt dvtú dvkv’m dang gø íe. Beatitudes wàwe ‘Ìshøt ìgvn vl kà’ àng lvjøm svng ‘ Mongzøle, dvbùe, ìshøt vle, Shvmán jèjú lúne’ wā vtv’nà Kà íe.

Ìshøt ìgvn vl kà rì, wàwe taq:-

Mati dvbùshang Mongkà 5:3-10 ciq vdòng taq, shø’n we Kà rì nø:-
(1) “Pvlàcè dang mvshámhoq dvshá dǿmshirì nø ìshøt ìgv̀n v̄le; kadø íe wani muqlàng móngdàn nø angmaqò íāòe.
(2) Rvyù rvyúng vsvngrì nø ìshøt ìgv̀n v̄le; kadø íe wani angmaqí nø nøt shvlø̀m we lún lú:ngòe. (3) Nøt cipshì vsvngrì nø ìshøt ìgv̀n v̄le; kadø íe wani rvgaq nø angmaq vpvt longe.
(4) Døngman lòng svng mvrøt nø bál vsvngrì nø ìshøt ìgv̀n v̄le; kadø íe wani angmaq nø bál mvsø̀n shø̀mlv́m íe.
(5) Vsvng kaq dvsházā sháò vsvngrì nø ìshøt ìgv̀n v̄le; kadø íe wani angmaqí nø dvsházā we lún lú:ngòe.
(6) Nøt mv́ngshèr vsvngrì nø ìshøt ìgv̀n v̄le; kadø íe wani angmaqí nø Gvray kaq yv́ng lún lú:ngòe.
(7) Vsvng kaq shvrv́m shvráò vsvngrì nø ìshøt ìgv̀n v̄le; kadø íe wani angmaq svng nø Gvray angcèrì, wā tǿ lú:ngòe. (8) Døngman tvrà rvtnø dvki vrèlv́m vhǿ:mò vsvngrì nø ìshøt ìgv̀n v̄le; kadø íe wani muqlàng móngdàn nø angmaqò íāòe, wàe.

Vpø’ íwe pèmè vnvmchvngmaq, Yarì nø ìshøt ìgvn vl kà rì íē. Vkangpè Yesuí shvngøt dvtú we Mvre shigung mvdvm kèní shø’n we Kà(Sermon on the Mount)nø, Vlømshìlvm lòng svng zí lúnè. Vkangpè Yesu Kristu bøng kèní, Shànshér Pvlàcè taq cúnshì lún kvtwa, Vkangpèo dvkv’m Kà rì svng Kvmnønt shóngnøntní cvndvgømì nø Tiqdvng vsvngrì kaq svng gø shóngshì lúnlvm íe. “Ìshøt ìgvn” vlē walòng nø, Gvray gvsangò jèjú Gønpaqni ínø, Kvmnønt vl we dvzvrì kaq svng zíò we Jèjú gønpaq me gø íe.

Vrá nø,
Shéí wàò we Dvrá hang

‘ Ìshøt ìgvn ‘vl lòng nø, Vshéí wàò we Dvrá hang (golden rule)nì íe, wànø gø shø’n yangà. Nøngmaqí Kømzøp dø síngràl mvlúnshì. Dvtut tiqyv’ngø rø lúnshì we taq, Vkangpè Yesuí shvngøt we ‘ ìshøt ìgvn vl dang ‘ nø Nønt cipshì we nvng dvsházā we(humility & mercy) taq vbáè, wànø gø shø’nè. Wervt ìshøt ìgvn vl Dvrá lòng svng cvndvgøm lúnlvm dvpvt nø, Nønt cipshì ra we nvng dvsházā Nønt mvsøn gø gvzà vchvkngè walòng svng yv’nglúnshìe. Yalòng Ìshøt ìgvn vl Dvrá rì svng cvndvgøm shì we í, Nøngmaqò mèpvng lvpat dvpvt wa mø-í, vkvt cúnshàì we lvpat taq gø shvla we bvnlìrì svng wàì yv’ngkèní, Gvray Shvmv’n jèjú ìshøt ìgvn rì téwa mvzv’n mvzv’n vtoshìlúnlvm vlē walòng shvngøt dvtú nø shèdømì lòng gø íē.

” Namaq nø shaqshaq wa dèbùnøng; kadø íe wani namaqò zìbè nø muqlàng taqlapmø gvzà luqe..”(Mt 5:12).

Vpø’ íwe pèmè vnvmchvngmaq,
Mongkà kèní shvdøm dø tiqdvchá Døngman we tvrà taq Cìpshì Nønt, Dvsházā Nønt, Kvmnønt í Cvndvgømì nø cúnshì taqsórí Muqlang zaqshøp gvlshì lashì laqlúnì shvngbe svng oqā.