Vmyø̀ wø̄:nò we nvng Mvngāka shí kàshvbóng
À:ngí vrá, “Gvray móngdàn nø, vsv̀ng tiqgǿí rvmá hv́ng taq vmyø̀ wø:nò we nv̀ng vbónge. Wø:nò dá:ngí àng nø yaqdø̀:ngí yøp nø̀ vyá:ngí kungshì nø̀ vl ke, kadøwa vmyø̀ mvkuq nø̀ té lú:ngì we à:ngí mvsháò. Vbaí àngwawa shvyó lúngò nø̀, nv̀mlat nø mvdùn cvp, mèpvng nø shírùng, wemèpvng nø rvkøpshì we àngshí vl longe. Mvzí dvyø̀ gong ra kvt nø shvrvt dvkøm rvtø̀ høq bǿà rvt, à:ngí shv̀mdvgoq lá:ngò nø̀ shvra:tnòe,” a:lòe.
Mvngashí kàshvbóng
Mat. 13:31-32,34; Luk. 13:18-19
À:ngí vrá, “Gvray móngdàn nø, nøngmaqí kapà nv̀ng shvbónglv́m í má? Kapà kàshvbóng nv̀ng shvbóng shvla má? Gvray móngdàn nø mvngashí tiqchv̀ng nv̀ng vbónge. Mvngashí nø, rvgaq tø̀m taq vl pv̀n dvyø̀ shvngbe taqkèní té zì pv̀n íe. Íwe ka:tnò nø̀, yo long kvtnø vyúngkvn shvngbe mvdv̀m te longe. Dvgv̀ngmèrì dvkaq long weí, vháng ram carì àngdv̀ng washì nø̀ dvkøqshì lú:nòe,” a:lòe.
Àngmaqí cíngràllv́m dvpvt À:ngí yalòng dø í we kàshvbóng mvme pv̀n kèní àngmaq sv̀ng mòngkà shvngø:tnòe. Kàshvbóng kèní wa mø̀í nìnø, À:ngí àngmaq sv̀ng pàgø mvshø̀:nò. Íwe Àng nv̀ng Àng coqcv́nrì àngmaq wa vl dvgvp nø, À:ngí mvshǿl werì shvngbe pǿnaòe.
Gvray mòngkà dvshv:ngò dang taq krisuí nø muqlàng móngdan dvyø’ svng vsvngrìò nvrøm dùng taq wøn yvngà. Gvray móngdan dang nvng sing nø nøngmaqí wàì we dang dvbùshvng mòngkà dvshv:ngò we dang, Sasvna vhánglvm dvzaqshì nìgø kvtsóm daqì dvgvp nøt vtvng dvshà daqe.
Sasvna té kømzøp té vhánglvm nø Gvrayí nì dvdu daqòe. Wedø ínìgø Sasvna ngàngdøng lvm dvpvt nøngmaq shvngbe dvzaq dvkangshàì nø nøt vlø’mshìrà, kv’mnønt tvrà nvng shóngnøt dang taqkení zvndvtut Gvray bvnlì taq dvzaqshàì.
