(60 )Baq Mònggvn V-toq V-tip Angni Dvpvt Dvkvng we Svrabín Koqkvm Leo (14)ò Kàru

Níbvnya Paqzi í Vsvng kaq mvdøng gvl we Dvdvm v-tiqra AI ( Nyan a:tùq) lv’ngshì lú:ngì lòng nø níbvnya nvng singdang dvtdvt mø-í nø Vsvng Toniò mèpvng lòng mvdvm taq, Dvdvm vtiq ra tiqlòng í dang Svrabín Koqkvm taqkèní mvdøng dvkv’m nø shø’n bø’ì.

• kagø’ íe walòng (Identity)sing we banchvk rì -Vsvngrìo shaq, Mvrshvm nvng Nønt mvsøn taq vl lòng svng AI í pvnmvn shì lú:ngì lòng nø Døngman dø Vsvng bø’n lòng nvng Mvdìng lòng (A:tuq) shvgaq lúnlvm rvzaq lú:ngì.
• Dvdvm vjáng w mà-vl lúngì lòng – Dakdvdvm rvwvn lvm lòng mvdvm Nønt mvsøn vlømshì lòng svng nvmlat zíshì we Algorithm rì svng rvdoq rvwvn Nønt vzàm svng vnø’n dvzvr nø, Vsvng mvngpòng dvhø taq nønt vtøp lvm rì í dvzvrè.
• Kūnga vzàm rì vnø’n we – Kàciq rvt we nvng gvsvt vjø’n mv’nshì rì taq AI mvdvm taqø gvzà vlømshì lòng nø vsvng rì taq Bvnlì døngja lùshì we Nønt, Dvdvm Nønt mvnggá, Rvdoq rvwvn nønt vzàm rì svng vcip dvzvrè.

Chaqdvp lvpat, a:tuq mv’nshì lòng nvng Vsvng mvngpòng vtoq vtip tvrà taq tuqlòng Digital lvpat téwa shuklú:ngì dø tiqdvchá Døngman Dvrá nvng mv’nshì nø wáshì rì svng rvwvn lvm rvt rvzaq lúngì lòng svng Svrabín Koqkvm í dvkv’m bø’ì.

• Chatbot rìo øpshì lòng – vkvtdø lv’ngshì we Chatbot rì nø Vsvngrìo vtoq vtip dvmvn lòng svng A:tuq lùshì nø Vsvng mvmèo vtoq vtip dvmvn lòng nvng tiqgø’ chì:pm ku rvzvngshì lvm rì svng yùm vm lòng í øp sháòe.
• Vsvng mvdò mvngpòng vlíng vpō we – vkvtdø A:tuq mv’nshì rì nø vsvng gø’ vrvm kaq wa mvtaq vsvng mvdò nvng Tong laqya tiqlòng kaq svng gø vlíng vpō dvzvr we nònggùn vzàm vlē.

Bvnlì døngja lùshì lòng, muqhøm dvnúng lvm lòng nvng Paqzi zi rì nø Vsvng mvngpòng svng øp we mø-í nø lv’ng v-du we lvknvk tiqlòng ku wa vl lvm rvt vkvtdø dvtàn nø dvkv’mè.

• Cvndvgøm lvm Dvrá me rì – Paqzi vde rì, Móng lvmvng Paqzi vde rì nvng Shvngkà gùndvtøp langlì rì nø Døngman dø wálún lvm rvt nvng Vsvngrìo dvgùng svng vpø’ shvring lúnlvm rvt ra vchvkngè.
• Muqhøm vjú vra – níbvnya paqzi àngshvr rì nø Vsvngrìo vjú vra svng tùbùm lúnlvm rvt dang v-rvm kèní bóngzùp wáshì nø dvnúng taqsórí tvrà dvtú lún ràe.

Media, digital nvng sing we dvtøp Paqzi vshvt lvm digital lvpat taqø Paqzi zi lòng nø mvdøng kùpgar ra dang dvtan taqsórí Kà dvtø’m bø’à.

• Rvdoq rvwvn lún we Nønt mvsøn – Toni angdèo talen svng roqgar lúnlvm dvpvt AI nvng Shvngkà ang mvtú dang nvng singdø mvkø’m mvtøp Paqzi rì téwa gwā dø vl lvm rvt gvzà vchvkngè.
• Vsvng kaq mvdøng gvl nø vháng vlúnlvm – Vsvng gø’ vrvmò ring we gømlā rì íwe ” Mvrshvm nvng Shaq” svng mvdøng gvlshì weí Níbvnya Paqzi vháng lòng nø Vsvng vtoq vtip tvrà svng tvle zv’ng lvm rvt mø-í, tùbùm dvbvng lvm rvt wa íe.