Rvcángcè rìò kámnøt tvrà nø tóng laqyà tiqlòng ku mǿí nø tiqnøt tiq mvyù:ng taq vzø̀m we lvpat tvrà íwe
Svrabín koqkv́m taqkèní tiqnøt tiq mvyu:ng wáshì we nø rvnaq we vpǿ ring we tvrà íwe dang vtàn bǿà we íe. Shvngø̀mré ò døngmvn we tvrà nø 3 gǿ 1 góng Gvray yv́ng kèní tuqráì nø ngàngdøng we vzø̀m vzvp tvrà gø íwe dang vtàn ráà we íe. Welòng nø bashàrì dvhø̀ taq àngnvm àngchvng mvdø̀ng rì ku vzø̀m vzvp lv́m tvrà svng tóngā we ínø̀ màbóng we kámnøt tvrà rì dvhø̀ vdòng rì taqgø vzø̀m lv́m tvrà svng dvhángā wegø íe.
Tìløp kámshì bøwe kagø taq ínìgø dvbùshvng tvrà svng diwe wa ívme. Wedø íwe tvrà taqkèní dvbùshvng mòngkà nø mònggv̀n svng vsher dvzv́rā wegø íe. Tìløp kámshì bøwe kagǿ ínì gø kámnøt tvrà dvbùshvng bv̀nlì tvrà taq dvzaqshì ràwe bv̀nlì døngjá vlwe wa ívme.
Yadang rìnvng singnø Svrabín koqkv́mpè Leo XIV taqkèní àngboq boq dvkám we mvtaq kámnøt tvrà, dvbùshvng bv̀nlì tvrà taq Synodal dvtú kàru taq vtánshaq íwe dø tiqdvchá wáshì lv́m dvkám wegø íe. Dvbùshvng bv̀nlì tvrà dvpvt vchvk mvdø̀ng nø shóngnøt ínø̀ vrv́m vrá we tvrà nø we dvbùshvng bv̀nlì tvrà dvpvt màv́l mvdaq we vchvk mvdø̀ng tiqlòng gø íe.
Àngyá mvzuq nøngrì høqshaq rvcángcè rì kámnøt tvrà taq lvpat gø̀nshaqrì zíshì bǿì we nø rø mvtǿm shì bǿì, welòng tvrà nø shóngnøt wawe svng mònggv̀n svng vtán lv́m dvpvt dvzaq shìwe tvrà tiqlòng ni íe.
Mònggv̀n yachàng dvpvt Kristuò shvkse wáshì lv́m laqni vchvk wegø íe. Wervt nøngmaq tiqgǿ vrv̀m nø kàngpè Gvray yv́ng svng rvtø̀ vrv̀m vjúrøt dvzaqshì lv́m gø vchvk we íe wanø Svrabín koqkv́m pè taqkèní dvtú mòngkà vrìng bǿà we íe.
