“Zā vsvng dvbā:nò we”
Mongkà tiqciq vzàng rø shì lvm wàì.
Wemèpvng Yesu nvng Ang coqcv́nrì nø, tìnúng kaqsvng yilshìá:mì. Galili kèní dì ráì we vsvng loksu:kngí gø, Ang mèpvng cv̀n bǿà. Vsvng loksu:kngí Ang svng màshvgørlv́m rvt, kùngshícè tiq gø̀m Ang dvpvt tvlú dvgø̀lv́m Ang coqcv́nrì svng a:lòe. Pàwálv́m wani vsvng mvme svng A:ngí dvban bǿà rvtnø, dvsǿn zøtnaí zarì í dv́ngte nø Ang svng shup lúnlv́m vnvpshì ráì. Cáng dvchøp rì nø Ang svng kadvgvp yv̀ng bǿò nìnø wedvgvp Ang mv́rdv̀ngø kǿng kupshi nø, “Nà nø Gvray Angcè pè èíe,” wa vkiqe. Inìgø Ang kagǿ í we vsa:ngí shá màdvzv́rlv́m A:ngí werì svng mvgvmkaq dvká:mòe.
Vpø’ íwe pèmè vnvmchvngmaq,
Dèni Mongkà taq tálúnìe, yv’nglúnshì we àng mvtú nø, Vkangpè Yesuò dvshá zā mvkok dvdí shóngnønt lòng íe. Latin Kà taqkèní nø, dvshá zā e walòng nø tiqdvng vsvngò dvshá mvhøt vhø’mò lòng kaq svng gòng lòng íe, shø’n shì lòng íe, wàe. Vsvng loksu:kngí nø Gvray gvsang kaq svng láò dvgvp, Gvray gvsangí nø Àngmaq taq ra lòng svng dvsházā dvkø’m dvcøpmàe.
Vpø’ íwe pèmè vnvmchvngmaq, Mather Tarezaò lvpat svng e yv’ng lúngò dvgvp, dvshá mvhøt vhø’mò vsvngrì dvpvt, Mather Tareza nø àng tiqlvpat zíshì yangì. Àngò dvshá zā shóngnøntní nø shvnìp shvnar vhø’mò vsvng, gúr vhø’mò vsvng, rvweng vhø’mò vsvngrìo lvpat svng tùbùm hángà yangà. Mather Tareza nø Àngò lvpat shvngbe svng India móngdàn taqø vl we vcip we vsvngpvn dvci, dvsháhoq rì dvpvt zí shì yangì. Gvray kaq svng shóngshì we shóngnønt nvng Gvray gvsangò dvshá zā mvkok dvdí shóngnønt lòng svng chàqdvp dvnúng nø dvtan yangà we Shànshér mè gø íē.
Vpø’ íwe pèmè vnvmchvngmaq, Nøngmaqí gø Gvray gvsangò dvshá zā mvkok dvdí shóngnønt lòng svng nøngmaqò ni vrvm lvpat taq kàdøwā cvndvgøm dvnúng lúnì e mà? Kàdøwā Cúnshàì e mà? dvdvmì taqsórí “Nà nø Gvray Angcè pè èíe,” wa Kvmnøntní røtnímshì pàdø nøngmaq gø Vkangpè Yesu kaq Kvmnøntní røtním tvleshì laqlúnì shvngbe svng oqā.
