Gvray àng mvrdàng taq nøngmaq nø vpǿ ri:ngì we íe
Pope Leo XIV taqkèní dvtú we mòngkà taq nøngmaq shvngbe svng shóngshì we Gvray àng nvng vhøm lv́m dvpvt nvng rvwvl nøt zø̀ng lv́m dvpvt vjúrøt shìlv́m dang taq rvtø̀ zíshì lv́m dvtú mòngkà vrìng bǿà we íe. Tìløp Yohan nø Yesu kristu svng chutcháng pè ínø̀ Gvrayí dvzv́r lú:ngà we dang vrìng yv̀:ngà.
Tìløp Yohan svng nø vsvng kaya shóngshì we ínø̀ Yerusalem shaqré rì høq shaq àngsvng vpø svre shì yv̀:ngì wedand we tvrà rì svng zǿmshì nø àng dvgùng svng dvhángshì shvla we ínìgø Tìløp Yohan nø Yesu Kristuò ngór dvgùng svng vpǿ shvring nø shvrà zí yv̀:ngà we dang dvtú mòngkà vtàn bǿà we íe.
Dèni nøngmaq cúnshàì we lvpat tvrà taq Gvray dang nvng singnø svkse wáshàì we tvrà nø kadangshì vpǿ nø ringwe ímá? Bashàrì nøngmaq nø vdèò shagóng lvpat tvrà mòngzø̀l byo we tvrà svng wa láì nø vsvngrìí vdè svng la vpǿ rawe svng wa shóng shàì we íe. Welòng nø vdèò dvciq lvpat tvrà dvpvt vjú vllong we mǿí. Ngàng dø̀ng we tvrà mǿí nø vdèò pvlàcè lvpat kaq svng vtøp dvzv́r we tvrà íwe dang dvkám we íe.
Muqlàng taqlvpø vl we vpè Gvrayò shóngwám shìwe tvrà kèní cúnshì lòng mv̀ngnø ngàngdøngwe lvpat tvrà íwe dang shvdǿm we íe. Kàngpè Gvray àngmv́r dang taq nøngmaqò lvpat tvrà rì nø vpǿ ringdø vl dvzaq shìlv́m vchvk we dang shvdǿm mòngkà kèní dvkám bǿà wegø íe.
Nøngmaq tiqgǿ vrv̀m dvhø̀ taq Gvray àng vlwe tvrà svng nøt laq màlé shàì. Mònggv̀n tvrà svng wa vlínì nø lvpat tvrà svng laqmaq shvleì, Tìløp Yohan ò lvpat tvrà rì svng yv̀:ngì nø cvn dvgø̀m dvzaq shì shvla we íe wanø Svrabín koqkv́mpè taqkèní dvkám we íe.
Nøngmaqò ni vrv̀m lvpat tvrà taq vjúrøt dvzaqshàì nø cúnshì lv́m wàì. Gvray àngnvng mvngu shàì nø Gvray àngmv́r taq cipshì we lvpat tvrà kèní cúnshì laqlúnì wanø dvkám mòngkà kèní vrìng bǿà we íe.
