Svrabín Koqkvm í Myanmar Móngdàn dvpvt vchvk we dvkv’m Kà, Mònggvn Dø’ngtáng nvng singdø lvknvk rì tvløt dang dvkv’m kà zi
Svrabín Koqkvm Leo (14) ínø shiwa vsvngrì kaq svng Shvmv’n dvgø’ng kà zíòe( Vatican Shvngkà dvkvngdvp yv’ngkèní lùshì we íe). Móng Dø’ngtáng nvng sing kønmvng mvdò rì kaq svng chàng dvmvn we taqø Svrabín Koqkvm pè (14) ínø Myanmar Móngdàn taq vl mongzøngcerì dvpvt gvzà Nønt bøm we dang dvtan bø’à nø ” Mongzøl lòngò sing we Tvrà rì” nvng banchvk angpvnpvn vhø’mò we móngdàn taqø dvshá zā tùbùm dvbvng mvdò rì góngà lúnlvm vlún vkvng rì vtōa lvm rvt røtnímshì bø’ì.
Svrabín Koqkvmò mvsøng mvtú svng 2026 nøng, January 9 ni Nár bunga ni taq Vatican yv’ng zv’ngshì bø’ì we kønmvng rì kaq svng shø’n bø’à. Myanmar Móngdàn nvng singdø Svrabín Koqkvm pèo kønmvng Ms. Andrea Ferrante í røt Kào Kàru svng vwal nø Myanmar Móngdàn taq Téwa dvshà mvhøt yvklvm lòng svng dvtán bø’à.
” Ngào dvdvm Nønt nø téwa vlē á:mì we March shvlá taq gvzà zaq we Nvmnø’ rvt téwa yvk lúngì we Myanmar Móngdàn svng vtøp sháò we dvshá zā tùbùm lòng, roqgar lvm dang nvng singdø mvmè yvklvm lvp kaq vyuqdí mvnshìe”wā Svrabín Koqkvm í shø’n bø’à. Mongzøl lòng dvpvt vzaqshì lvm lòng nvng ” vsvng gø’ vrvm dvpvt rvtø vrvm vlún vkvng dvshá zā tùbùm lòng nvng sing we dvbvng lvm rì” svng vtoshì lúnlvm rvt ” vrá dvkvngshì we” vzaqshì Nøntní dvkv’m bø’ì.
Myanmar Móngdànò ang dvja svng Mònggvn Dø’ngtáng nvng sing, Mongzøl lòng svng vrvng we taq mvjór lvm lòng nvng singnø, Svrabín Koqkvm í nø Mongzøl lòng svng nònggùn kūnga kèní wa vgám nø wá lúnè, wā vlømshì mvtú dang taqkèní dvmvn bø’ì. ” Mvzvn wàwe nø shvtin gvyaq lòng nvng Nønt shøm we íni gø, Mongzøl lòng nø kadvgvp gø Nønt yv’nggúng èwáshìnø dvzaq dvkvngshì mvdvmø, rvtø vrvm dvdvm Nønt vshat lvm rvt ra vchvkngè”wā shø’n bø’ì.
Wè mèpvng Angò Mongkà taq lvknvk tvløt we àngshvr tiqlòng bung sháò dang dvkv’m taqsórí dvkvng lvm rvt shøn bø’ì. February shvlá taqø New START
Nuclear Nønt vrá Ka mvsøng bē lòng nvng ” Artificial intelligence method Paqzi taqkèní téwa lvpat zidvng vl we lvknvk rì” mvnò lòng Shiwvt mvdvmø téwa Nønt bùm lvm lòng svng dvtán bø’à.
Svrabín Koqkvm í ” vlún vkvng lòng nvng vsvng bvnlì døngja lùshì dang svng roqgar lvm” Upvdi Dvrá hang nvng tiqdø AI svng ” vbóng vtuk dø dvrá vdòng lvng lvm ” wáà lvm rvt røtnímshì bø’ì. Myanmar Mongzøngcerì dvpvt Svrabín Koqkvmò Kà nø Mònggvn taqø tiq nvmshá hángà nø dvbvng lvm nvng vtok vtip dvmvn lvm rvt àngmaqò ra vchvk dang svng tiqdvshaq í tùbùm dvbvng lúnlvm, Mongzøl lòng svng vrvng lúnlvm dvpvt gø téwa vjang laqyà nvng singdø røtnímshì ang mvtú tiqlòng ku hang dvtan bø’à.
