Jurøt chø̀m taq Yesuí Shanshér kàru rø̄ò we

Mèpvng Yesu nø Shànshér Pvlàcè jórnònggùn zø̀ng taqsórí, Galili rvgaq svng vtv́ngá:mì. Ang mòng nø wervgaq gùrhø̄m kayv́ng màyv́ng dvshvng bǿà. A:ngí angmaq júrøt chø̀m rì taq shvngø:tnò yv́ng kèní, shvngbebeí Ang svng shvrī:ngòe.

Vpø’ íwe pèmè vnvmchvngmaq,
Vkangpè Yesu Kristu nø rvgaq mvgung móng taqø (40)ni vmaq vnatshi nø Shànshér Pvlàcè jórnònggùn zøng sórí Galilee rvgaq svng vrá vtv’ng ráì. Nazareth myoqò Dvrá zong taqø Kàdvtutshú Esaya Mongkà rvdūl svng rø dvzvrò dvgvp Àng Nønt hángshì lòng nvng Chutchvng tvrà svng dvnúnglvm mvtú rì svng angí shàngshàng dvkv’mò nø Vsvngrì mvrdvng yv’ng dvshvngòe. Kristu Gvray rvgaqtøm kaq dì daqì lòng mvnggá nø ” Dvshà vsvngrì svng dvbùshvngkà dvshvng lvm dvpvt, Vróngshaqrì svng nø shvláng lúnlv́m mvshǿl, nemànrì svng nø vrá yv̄ngshì lúnlv́m shv̀ngkà dvshv̄nglv́m dvpvt nvng Shvnv̄lshaqrì svng gø shvlutlv́m rvt Ngà svng dezvr dakngà wā tøpni tøprang shá dvza:ròe. Jø’ngjøngni Kristu àng tiqlvpat gø dvshà mvhøt vhø’mò rì dvpvt dvbùshvngkà í yangì.

Vpø’ íwe pèmè vnvmchvngmaq, Kristu nø Angò Sasvna bvnlì Nvmlat pvngshì yv’ngkèní ni Shànshér Pvlàcè kūnga dvnzøng nø Mònggvn vsvng mvmè svng vjú zílún dø, chutchvng dø, nøngmaq gø’ vrvm gø Shànshér Pvlàcè kūnga dvnzøngì we í vsvng mvmè dvpvt vjú zílún we Shvngkà shvlá wáshì laqlúni wvng dvshat nø nònggùn zí mvyøngè. Shvngbeí Gvray mongzøl lòng vtoshì laqlúnì.