Shóngshø̀ngwe vnvm, vchvng maq mòngzø̀lwe àngni laqí dvr
Yesu Kristu mònggv̀n svng tuqráì mèpvng 2 lvbán wawe rvtø̀ lvngcha vdòngø shvngbe kaqsvng pàmvrà wàng sórí dvtú mòngkà kèní vtoq shø̀nge.
Dèniò rvtø̀ taqnø St. Peter Basilica noqngø̀m tø̀ngnø taqø Holy Door shv̀nshér we bv́ngkà svng cøt lv́m íwe nvng (Jubilee of hope) Kristuò 2025 wawe Jubilee svng dvtøm lv́m rvtø̀ tuq ráì we íe.
Christmas wawe rvtø̀ lvngcha svng vle lúnbǿshà nø nøngmaqò dòng nøt taq køqzøl rà íwe Kangpè Yesu vsvng góng lushiwe nvng chutcháng we tvrà íe. Yohan 1:14 taq Yesu Gvray nø vsvng góng lushì nø nøngmaq nvng tiqdø vl bǿì wedang vtán shaq íe.
Rvcángcèrì ò lvpat tvrà wawe nø tiqgǿ wa lvpat tvrà svng diwe mǿí nø̀ Gvray nvng tiqdø lvpat tvrà svng dílún lv́m Gvray àngí dvkám we íe.
Yesu Kristu nø Gvray ínø̀ nøngmaq nvng gø tiq shagóng íámshà. Vránø nøngmaq nvng tiqdø vlwe Gvray Emmanuel ílv́m àng shóngwám shìwe gø íe.
Yalòng nø Gvrayí nøng maq svng cv́m dvgøm ràwe tvrà 2 dang svng dvtú we tvrà gø íe. 1 dang wawe taq Kàngpè Gvrayí gv́l shaq kàciqrì ínø̀ 2 dang taqnø vsvngrì dvhø̀ gv́lshì ràwe kàciqrì ílonge.
Lòngzàpè Gvray vsvng shagóng svng lushì bǿì bǿì wervt nøngmaq nø Gvray àng mvdàmø gv́l shàì we nøt mvsø̀nrì shvngbe nø we lòngzàpè Gvray tuqráì we yv́ngkèní pv́ngshàì nø nøt cun dvtøp shìlv́m vchvk we íe. Wervt nøngmaqò pvlàcè dang nvng kámnøt tvràrì nø vpǿ ringnø chvpdvp taqgø cv́n dvgøm lv́m dvzaqshì ràì we íe.
Gvray àngnø nøngmaq nvng vsvr we muqlàng móngdàn shvrà taq rúngnv̀m we mǿí nøngmaq dvhø̀ø nøngmaq nvng tiqdø vlwe Gvray íe. Ni vrv̀mò nøngmaq lvpat tvrà taq ngór dvgùng kèní vlwe Gvray íe. Nøngmaq tiqgǿ vrv̀m taq Gvray àngò shvmv́n jejú Gvray àngò dvsháza shóngnøt luqtàm dø èzíì nø vtoshì lúnì wegø íe.
Welòng døni nøngmaq tiqgø nvng tiqgǿ taqgø we jejú, shóngnøtrì vdòng vzø̀m vzvplv́m dvkám we íe. Wervt Gvray kaq kám we kámnøt walòng nø vsv̀ngrì dvhø̀ kèní kashì nø døngmvn we kámnøt tvrà wawe nø kadøgø bǿndaq longwe mǿí.
Shóngshø̀ngwe vnvm vchvng maq Christmas ò mòngzø̀l long jejú nø nøngmaq shvngbeò lvpat tvrà dvpvt kù:ngà tiqlòng ku laq ngàng dvr. Nøngmaq mvdàm Gvary nvng vsvngrì mvdàmø dvzv́r shvlá wáshì lúnlv́m tvlú dvgǿ shì lúnlv́m àngmè Mari yv́ng svng gø dvtit tvle vjúrøt shàì.
