Christmas rvtø lvngcha vdòng mònggvn svng dvtú bøà we Pope Leo XIV ò mòngkà
Pope Leo XIV taqkèní Roma dvcìrì nvng mònggvn vsvngrì dvpvt dvtú we mòngkà taq Svrabín koqkvm pè ò àngwà mòngkà íwe mònggvn svng mòngzøl lòng vrang dvzaqshì ràwe tvrà, tasvng vhøm nø mvngushì vrashì ràwe, mvrà mv-vl we móng vsvngrì kaq kopgvr lvm tvrà rì dvtú bøà we íe.
Vjúrøt dvbangā we tvrà taq Lebanon, Seria, Palestine, Israel móngdàn rì taq mvjàn rvt dvshà mvhøt lvm tvrà rì dvpvt vdu vbóng we mòngzøl lvm tvrà rì dvrá tvrà rì cvn cvn bønlún lvm dang vjúrøt dvbangā we íe.
Vránø mònggvn taq dèni vbatò mvjàn rvt mvhøt lvm vhømò we móngdàn rì dvpvt gø gvzà nøt bùmnø svngpvn dvsháza tubúm dvbangā lvm tvrà rì wá dvzaqshì ràwe dang kèní dvkám ráà we íe.
Mònggvn móngdànrì dvhø tiq móngdàn nvng tiqmóng dàn dvhø mòngzøl we kønmvn vtoq vtip shì lvm tvrà rì mòngzøl we tvtà kèní vzøm vzvp lvm tvrà rì tóng dvzaqshì ràwe dang zaq zaq dvkám we íe.
Asia móngdàn rì vdòng taq bøn we móng lvmang shìwvt rì dang gø vná mvdaq we vchvk tvrà tiqlòng ínø shvrvm shvrá shì ràwe dangrì, svngpvn dvsháza bvnlì rì wàlvm laqni vchvk we shvrà íwe svng nøt taq záng shìnø chvpdvp bvnlì tvrà kèní gø wá dvzaqshì lvm dvtú bøà we íe.
Kàngpè Yesu tuqráì we lvngcha taq Yesu Kristu nø mònggvn svng dvsháza shóngnøt kèní chutcháng we bvnlì tvrà rì wádvzashì lvm dvpvt vsvng shagóng lushì bøì we tvrà svng yv:ngì nø nøngmaq dvhø taq gø mòngzøl long svng vto shàì nø we tvrà svng cvn dvgø dvzaq shàì wanø dvkám we íe.
Yesu Kristu nø mvrà chutā shú Gvray íwe svng nøngmaq shvngbe taqkèní vtoshàì we dø nøngmaqò lvpat tvrà taq gø tiqdvng vsvng tiqgø nvng tiqgø dvhø taq mvrà chutā kelvm wáshì ràwe svng shvdøm bøà we íe.
Kàngpè Yesuò 2025 nøng wawe Jubilee nøng nø vle mvnshì ráì we ínø yanøngò Jubilee ìshøt jèjú rì nøngmaq tiqgø vrvmí vtoshì lún bøshà we svng Gvray kaq oqà wàì taq sórí chutcháng we tvrà svng nøt mvsøn taq vshøp shàì nø nøngmaq dvhø taq gø mvrà chutā kelvm dvzaq shàì wanø dvkám mòngkà dvtú bøà we íe.
News- Vatican News
