Gvray Shànshér we Døngku bóy angni
Shvngbe mvdvm Yesu, Maria, Joseph Gvray Shànshér we Døngkuò Mongzøl lòng vtoshì laqlúnì, shvngbe svng Pamvra.
Kristu vdòng taq Vpø’ íwe pèmè vnvmchvngmaq, dèni nø Gvray Shànshér we Døngku bóy angni íe.
Rø v-du we móngkà ciqrì nø;-
(1) Sirak 3:2-6,12-14.
(2) Koloshi 3:12-21
(3)Mati 3; 23-15,19-23
Vpø’ íwe pèmè vnvmchvngmaqè, Dèni nø Shànshér we Yesu , Maria, Joseph Gvray Shànshér Døngku bóy svng wàì we Nár ni gø íe. Rvzvngce gø’ vrvm, Døngku vrvm gø, Gvray Shànshér we Yesu Maria Joseph Døngku taqkèní cvnshì nø shvbóng shvmvtshì lúnlvm rvt shedømì we bóy gø íe.
Gvray Shànshér we Døngku taq, St Joseph, chømyo vjø’ng Medō Maria nvng Longza pè Yesu Kristu, Døngku Vsvng vshøm gø’ò lvpat mvshøl svng yv’nglúnshìe. Døngku walòng nø Vsvng gø’ vrvm dvpvt mà-vl mvdaq vl ra lòng íe, vchvk vtv’ng gø íe. Døngku wàwe nø lvpat pvngshì we shvra gø íe. ” Døngku wàwe nø Gvray gvsangí nøngmaq kaq svng shóngshì dø tiqdvchá nøngmaq taqkèní gø vsvngrì kaq svng vrá shóngshì lvm rvt cvnshì we shvra gø íe,” wā Mather Teresa í gø shøn yangà. Døngku wàwe nø lvpat shá Nønt Paqzi cvnshì ra, lvpat zong tiqlòng gø le íe, wàe.
Shànshér we Gvray Døngku taqkèní cvnà we nvmlat lòng nø nøngmaq kadø wā vshòng ké ràe walòng íe. Kadø vshòng ké lvm wàwe taq kadø íwe yvklvm rì svng tønzv’n lúnlvm, wàwe dvnu lòng le íe. Vsvngrì taq yvklvm pvnrì vhø’m shì, luqlòng dvgvp vbø’nshì we, Tiqdvng vsvng kaq Mvra shvri shì lòng wá sháshìe. Shànshér we Døngku ínø dvshà mvhøt yvklvm rì vhø’m v-du ra dvgvp Gvray kaq téwa vlømshì nø, dvzaq dvkvngshì we í pvrà:nò lòng svng yv’nglúnshìe.
V-ní lòng walòng mvkøm mv-døp Paqzi lòng nø, vroqà lòng íe. Kristu Gvrayí nø kadø wā vroqà lvm, walòng svng cvnà lúnlvm rvt Mònggvn yachang kaq svng dì lúngì. Kristu Gvray Mònggvn yachang rvgaq kaq svng dì lúngì dvgvp Cvmré gonīce lvpat kèní gønshaq nvng singdø v-tu v-re vhø’mò we, Mvra cip lá we, Ti mvlvn we, gùn dvtøp vhø’m we, banchvk angpvnpvn vhø’mò we íni gø, mvrà vléshì rì kaq svng chutnà yangà. Vpè Gvray gvsang taqkèní chutnà lvm lòng svng gø røtním dvbvng shì yangì.( Luka 23:43)
Vrá nø, Shànshér we Døngku bóy taqkèní zi we, lùshì lvm móngkà nø….
Gvray gvsang, Nøngmaqò Vpè Gvray nø dvshá zā mvkok dvdí we nvng Døngku svng Kømzøp we shóngnøntní tāsvng tālè tùbùm dvzvrè. Tāsvng tālè vsíng ké dvzvr we Nønt mvsøn nvng tāsvng tālè vpø’ ke nø, shvngōshì we, vshvt we laqyà rì svng chukgúr sórí, tiqkvt la kvt krvtcøm lvm rì vl ra dvgvp mongzøl dø Mvra vchut ké nø síngràl nònggùn lùshì dvzvrè.
Vrá nø, Shànshér we Døngkuò mvsat gømlā taq…
Shóngshìe, Kvm we shóngnønt nø, Shànshér we Døngku àng dvgùng, àng pòngbangò mvsat gømlā íe. Yalòng vlømshì Nønt nvng kùpgar lòng í dvtú we dang rì íē. Vrá nø, V-rvm vrá we í Tiqnønt tiqyung wáshì dvzvrè.
Wervt Vpø’ íwe pèmè vnvmchvngmaq, Døngku taq Gvray kaq vlømshì we Kvmnønt nø gvzà vchvkngè walòng svng shvdømè, dvshat we, shá dvzvrè we bóy angni tiqni íe.
Shvngbeí Shànshér we Yesu Maria Joseph Gvray Døngkuò Shvmv’n jèjú vtoshì laqlúnì shvngbe oqā.
