“Mòngzø̀l lòng nø nàmaq shvngbe nvng tiqdø laq vldvr”
Vpǿì we Myanmar móng gv̀mzø̀pè Mín Aung Lyain nvng móng øp shaqre shaqtang rì shvngbe nvng Myanmar móngdàn Svrabín koqkv́mpè kønmvng Msgr. Andera Ferrante shvngbe kaqsvng “Peace Be with You!” pàmvrà wange.
“Peace Be With You” mòngzø̀l long nø namaq shvngbe nvng tiqdø laq vldvr wawe pàmvrà vtoqshì kà nø rvtø̀, nǿngrì mvme mònggv̀n vsvngrì dvhø̀ vtoq vtipshì we tvrà taq lángshì ráì we kà tiqlòng gø íráì.
Dèniò rvtø̀ lvngcha taq mvrà vlwe nøngmaq mònggv̀n vsvngrì kaq mvrà chutā nø chutchángshúpè Gvray àngcè nø Betalehem mvrìngø vsvng shagóng lushìnø shøq bǿà.
Cv̀mré gònicè tiqgǿ taqnø kadø íwe dvgùng gùngshvng mònggv̀nò dvrèrì vshøpshì we mv-vl, àngnø kadvgvp gø gvyaqshì vtung vloq sháshì we kù:ngà vnǿnwe shagóng kèní tuq ráì wegø íe.
Wervt Gvray àngcèpè nø àngò Gvray wawe ngór dvgùng rì svng chutshì nø vsvng shagóng svng dvchøp shì ráì we svng shèngøtì we íe.
Kristu nø àngsvng tvplv́m wáshì ráì we vzàng kaq rvtø̀cè taq dvzv́rrì kaq dvtú ráà wenø ” ngàí namaq svng mòngzø̀l long lánga ráìe. ngà mòngzø̀l lòng namaq svng zí ráìe. ngàí namaq svng zíì we mòngzø̀l lòng nø rvgaqí zi we mòngzø̀l lòng dø mø̀í. namaq nøt mèdèshànøngni, sver gø mèsèrenøngni” (Yn 14:27) wanø̀ dvkám ráà we íe.
Yesu Kristu nø mònggv̀n dvpvt mòngzø̀l lòng tvrà wa vrìng nø shvngøt dvtú ráà we íe. Kristu svng tvpbǿà nø shvtlv́m vjønvt nà wekvt dvzv́rrì taqkèní vgámnø shvmí vgámò we taqgø ” wedø ínìgø Yesuí Piter svng, shv̀m nø ang dø̀nggàng taq èzá:ngò. vpèí ngà svng vzíshaq gwìn nø ngaí mvaqlv́m í ma? (Yn 18:11)
Yesu Kristuò shìyv̀ng kèní vrá zun lú:ngì we tvrà nø shvnvt, laknvk màbáwe mòngzø̀l tvrà ni íe. Kàngpè Yesu àngò vbat taq móng lvmang tvra, wulaq tvrà, svngpv̀n vtoq vtipwe tvrarì shvngbe nø shvnvt laknvk màbáwe vlíng vpo tvrà taq ripnø̀ dvzaq dvkáng shì ráì wegø íe.
Welòng nø nøngmaq shvngbe svng shv̀nshér we tvrà, kaq shvkse wáshì lv́m nvng mvrø we, shvnip shvnvr we, mvjàn tvà rì svng yilshì nø dvsháza shóngnøt kèní tubùm dvbangā kelv́m ègoì wegø íe.
Vsvng kagø ínìgø mòngzø̀l lòng tvrà svng shóngwám shìwe ínìgø mònggv̀n tvrà vlíng vpo ráì we dvhø̀ taq vtøp lv́m tvrà rì, mvmòngzø̀l we tvrà shìwvt rì taqkèní vtøp kébǿà wewa íráì.
Tiqmóng nvng tiqmóng gø mvjàn rì dvbu:ngò nø mònggv̀n yachv̀ng nø mvjàn tø̀m dø vpo dvzv́r bǿà. Móng vsvngrì taqkèní gø vdè móng svng shvnvt mvzørìí gvrwe wáshì lv́m vdèò móng vzúyaq svng shóng shìe. wedø shvnvt mvzøí mvroq mvgvr we vzúyaq svng àngmaq taqkèní màtoò we høqshaq bø̀n ráì.
Mònggv̀n taq gùndvtøp we tvrà svng yv̀:ngvtnì dvgvp 2024 nǿng vdòng mònggv̀n móngdàn vzúyaqrì dvhø̀ mvjàn shvnvt mvzørì dvcøp dvgǿshì we tvrà taq Dollar 2718 Billion høqshaq lángshì bǿì we svng yv́nglún shìe.
Yalòng tvrà bø̀nráì we ang mvtú nø tiqm[ng nvng tiqmóng vzø̀m we tvrà rì taq tasvng síng sháā kewe tvrà mvwáshì nø svrenøt rì, tasvng shvnip shvnvr kewe tvrà rì svng vrang dvzaq shìwe yv́ngkèní bung ráì we svng yv́nglún shìe.
We tvrà kèní mònggv̀n vsvngrì, tiqmóng nvng tiqmóng nø svre nøt rì kèní vdè móngsvng shvnvt mvzørìí gvr shìwe nvng móng mvjàn rì dvbung ráà we íe. Nøngmaq tiqgǿ vrv̀m taq mvjàn svng svre nøt v̀lì dángte nø shvnvt mvzø, rì svng dvhà:ngì nø dvgǿ dvzaq shìlv́m tvrà wani vl longe.
Dèniò mònggv̀n dvjà nø mòngzø̀l tvrà svng vrang lv́m rvt vdu vbóng we tvrà kèní wáshì we tasvng vpǿ shvring kewe, tasvng tubúm dvbangā kewe tvrà taqkèní wa we mòngzø̀l tvrà svng ngàngdøng dø vrang shvla we íe.
Wervt Svrabín koqkv́mpè taqkèní gø wedø mòngzø̀l tvrà svng vrang dvzaqshì lv́m kadvgvp gø dvtú we svng dǿmshálv́m dvkám we íe. Mòngzø̀l we tvrà walòng nø nøngmaq tuq mvyǿì we lvpat manggá taqkèní tewa vháng we shvrà tiqlòng ínø vsvng kagǿ nvng gø sing we lvpat tvà tiqlòng gø íe.
Nøngmaq tiqgǿ vrv̀m nø mòngzø̀l long tvrà nvng tasvng vzø̀:mì nø welòng svng nøngmaqò mvsø̀n nvrø̀m taq vshøp shàì we ínìnø cømcaq mòngzø̀l we tvrà puqpǿm svng shvngbe kaq vwánā lúnlv́m ílonge.
“If you wish to draw others to peace, first have it yourselves; be steadfast in peace yourself. To inflame others, you must have the flame burning within you” wanø St. Augustine taqkèní gø dèkám ráshà we íe.
mònggv̀n svng mòngzø̀l lv́m tvrà vrangā dvzaqshì ràwe nø kámnøt trà shvngø̀mré taqkèní gø mvdø̀ng tiqdang ku vchvk we íe. Nøngmaq kám shàì we tvrà rì shvngbe kámnøt tvrà vrv̀m taq wedø shvnip shvnvr kewe tvrà rì, mvjàn tvrà rì nø vl we mø̀í, Gvray àngò bø̀ng svng mvjò dø lángshàì we kámnøt tvrà ku vpo lú:ngì.
Gvrayí shvngøt dvtú ráshà wedø vjúrøt dvzaqshì lv́m tasvng shóngnøt kèní vzø̀m vzvp lv́m tvrà svng mvng wá dvzaq shì ràì we íe.
Téwa vdè Myanmar móngdàn mòngzø̀l lv́m tvrà dvpvt dang vram kèní dvzaq shìlv́m wàì. Nøngmaq shvngbeí mvrøtnì we Myanmar móngdàn mòngzø̀l lv́m tvrà nø tuqmvnshì ráì we 2026 nǿng vdòng taq Gvray shvmv́n jejú kèní mòngzø̀l lúnlv́m nvng mònggv̀n døng gø mòngzø̀l we nǿng àngni rì svng vtoshì laqlún daqì.
Móngdàn vdòngø vlwe móng vsvng rì àngmaqò mvrøt nøt, kà shaqrì svng gø táāì nø tiqmvdò nvng tiq mvdò, tiq móng nvng tiqmóng gø shóngnøt kèní vzø̀m vzvp lv́m tvrà taq dvzaq shài. dvsháza shóngnøt rì tasvng dvtanā kelv́m wáshàì.
Mòngzø̀l we tvrà dvpvt muqhǿm mvngu shàì nø vrashì lv́m dvzà rì gø vrang dvzaq shàì. Kù:ngà vnǿn we móng vsvngrì, dvshá mvhoq vsvngrì nvng mvjàn rvt yilshì, yv̀mbàn vdu we móng vsvngrì ò kaqshaq rì táā nø mvréza lv́m wàì.
Mòngzø̀l we tvrà dvpvt nv̀nggøp kà kèní wa mǿí nø chvpdvp bv̀nlì rì taqkèní wá dvzaq shàì. Gvray yv́ng svng gø kám vlǿm shàì nø vjúrøt we tvrà kèní gø wá dvzaq shàì we ínìgø Gvray àng taqkèní gø mvréza shóngnøt kèní mòngzø̀l we tvrà svng shvmv́nā lv́m wa ílònge. Shvngbe mvdàm Gvray mòngzø̀l long laq tuqdaq. Amen wanø Cardinal Charlies Bo taqkèní Christmas mòngkà dvtú bǿà we íe.
