Yesu gà:lò we dang
Shvngbe svng pàmvra. Gvray Jèjú kaqsvng nvmlat oqà waì. Ya lvbvn nø Advent dvgø’shì we nár (4) lvbán wa nár svng gòng bø’shà.
(1) Esaya 7:10-14, namaq svng mvshv́lpvrá tiq lòng èzí daqnø̀nge. Eyv̀ngnøng, chø̀myoré vjø̀ng tiq mèí angcè tiq pè rí lú:ngòe. Ang bø̀ng nø Immanuel wa tǿ lú:ngòe.
(2) Roma 1:1:7, Ang bø̀ng dvpvt rvtnø, dvcì vrv̀m dvhø̀ taq kèní kv́mnøt tvrà svng vtoò nø cv̀n we vsvng làvl long dø shvngøtlv́m rvt, Ang taq kèní jejú nvng dvzv́r bv̀nlì vya nøngmaqí lún bǿshà.
(3) Mati 1:18-24, Yesu gà:lò we dang,
Messiah svng dvbū nøtí shvlávtvng vtolvm
Deni mòngkà tiqtut taq Vhazi koqkámpè mvshø’l taqkení cvnshìlvm shvdúm we dang íe. Vháng vtvngpè Gvray gønshaq angkang tvciqciq cúnshì we pongbang Ngòrdvgùng vlwe Gvray kaqsvng vlø’mshìlvm mvdvm vsvngrìò shánøt svng vlømshì we dang nø gønshaq vmánglvm íe. Krismat rvtø Kàngpè Yesu Kristu rvgaq mvdvmø tuqrā we ínìgø nøngmaq dvpvt lvjøm mv-vl.
Solomon koqkámpè Shi bø’ì mepvng angò móngdàn vní kà tìn gvayq gvránshì bø’ì. Yerusalem wamà taq cìl vtùá:mà we í nìgø mvdv́ngkéò we írvt Yerusalem svng ngang nø Gvrayí dvbvng røtshìlvm dvtúòe. Vhazi koqkámpè nvng basharì gvza sere nø vle. Dawi ra:pmí, “Siria cìlcèrì nø Efraim cìlcèrì nvng tiqmvnúl wáshìe,” wakà tá bǿà kvt, Ahazi nvng ang bashàrì nøt nø, nv̀mbø̀:ngí mvlø̀ng shǿngrì vdā:rò padø vdv̄rkéòe (Esaya 7:2).
Gvrayí Esaya svng yadø a:lòe. “Nvcè pè Shear-yashub nvng èdìshì sórí, laqtūn zv́lshú pè rvmá hv́ng svng dī tvrà shvnv̄ng mvdv̀m tìdøm kèní vyø̄ we tikùng mvtú yv́ng Ahazi svng nàhǿmv́mshò nø, ang svng yadø èv̄lshò: ‘Nàyáshì nø shoq màwá èv̄l, mèsèreni. Mvyǿ wā dǿ we svmitø̄m vní tut wa í we, Siria vsvng Rezin nvng Remalia angcè pè vhv́rshi we shv̀mná høp lòng rvt nøt mènàmv́ngni. Kagø’ svng gø dvbvng røtshìlvm mewanøngni. Na nvng nà bashàrì shvlutlvm íe. Gvray kaq vlø’mshìlvm kámnøt tvrà shvdøngshì nøng alòe. Íwe Vhazi koqkámpè nø Namaq kv́mnøt taq ngv̀ngdøng dø̄ mèripnøng kvt kèní, namaqí mèzán lóngnøng wae,” (Esaya 7:9). Vhazi koqkámpè nø Gvray kaqsvng vlø’mshì we mví, Siria svngle dvbang røtshìe.
Namaq kv́mnøt taq ngv̀ngdøng dø̄ mèripnøng kvt kèní, namaqí mèzán lóngnøng Vhazi koqkámpè yadø shøn we nø Gvray kaq shvyúm we dang íe. Yawé Gvray gø ang dang ang tvrà laqdi. kà dvtutshúrì gø ang tvrà ang laqdi. Ngà gø ngà dang ngà tvrà dìlvm íe wa kà íe. Ang nø Siria nvng vrashì shaq írvt wa we íe.
Kà dvtutshú Esaya nø nøt gvza mvbyò bø’ì Esayaí yadø a:lòe. “Dawi ra:pmé, ètánøng! namaqí vsvngrì tø̄nnøt kaq naløtnø̀ng lòng màrv̄m ma? Gvray tø̄nnøt svng gø namaqí naløtnø̀ngni ma? Ang vdèí ni namaq svng mvshv́lpvrá tiq lòng èzí daqnø̀nge. Gvrayí Eyv̀ngnøng, chø̀myoré vjø̀ng tiq mèí angcè tiq pè rí lú:ngòe. Ang bø̀ng nø Immanuel wa tǿ lú:ngòe. (Esaya 7:14)
Deni Mati dvbū shvng mòngkà taq Vkàngpè Ang dvzv́r tiq gǿ nø yøpnv́ng taq ang svng dvtánshì nø yadø a:lòe. “Dawi pvlí pvlaq Yosepmé, nà svng vdv́nshishaq mè Mari nø nvchø̀mmè washìlv́m lòng dang mèdètiqshìni. Pàwálv́m wani ang góng taq cv̀mré ríò lòng nø, Shànshér Pvlàcè taqkèní íe. Yosep nvng Mari svng chvng Kàngpè svng vtolvm ang mvtú svng dvtvn bø’à. Mari nø cøpnøt ní Gvray nøt dø laqí daq wanø vtoòe.
Deni mòngkà taq Yosep nø døngman vsvng íe wanø shvngøte. Yudarìò dvrá taq chø̀myoré vjø̀ng í we zangkwè lá lā mvlú:nò kèní nø, angmaqí wemè svng angpè chø̀m bv́ngkà yv́ng shø̄la:tnò nø angmaq mvrìng lvngàré rìí ang svng lú:ngí cùngshí wvp ràe. Pàwálv́m wani ang nø angpè chø̀m taq vl dvgvp góngnv̄m mè wáshì weí Israel vsvngrì vdòng taq shvraq màchaq bv̀nlì wà bǿà. Mvgv̄m we yalòng svng nø namaq vdòng kèní yadøni dvshér ràe (Dvrá dvshvt 22:20-21).
Mari nø Yosep svng dv́nshi bǿì mèpvng, angní shini màshvzøngshì dvgvp, ang nø Shànshér Pvlàcè taqkèní góngshvng mø̀í we svng dǿm bǿà.
Yosep nø døngman vsvng í nø, ang svng shvraq chaq màmvyǿ rvt, mvyø̀:ní ang svng gurlv́m dvdv̄m lú:ngà. Yadø dvdvmò nø gvza nøtshut we rvtø taq Vkàngpè Ang dvzv́r tiq gǿ nø yøpnv́ng taq ang svng dvtánshì nø yadø a:lòe. “Dawi pvlí pvlaq Yosepmé, nà svng vdv́nshishaq mè Mari nø nvchø̀mmè washìlv́m lòng dang mèdètiqshìni. Pàwálv́m wani ang góng taq cv̀mré ríò lòng nø, Shànshér Pvlàcè taqkèní íe. Yosep nø Mari døni vdè dvdvmò we dang svng gùrò nø Kàngpè dvtú we kaqsvng vtoòe.
Mòngkà vní tut taq dvzvr Poloí Roma shvngømré vsvngrì kaq dvshvt dvtú shvngøt we íe. Dvbùshv̀ngkà wa lòng nø Gvray Angcè pè kaq wa we í nø, Angò shagóng dang ègù:nò nìnø, shøn mvtø’mshì høq rvnaqe. Shànshér we Pvlàcè dang taq, Ang nø shì yv́ng kení jór nònggùn vl dø zun lú:ngì pè í rvt Ang nø Gvray Angcè pè í we dvtan daqà pè, nøngmaq Vkàngpè Yesu Kristu ni èíaìe.
