Yesu gà:lò we
Yesu Kristu gv̀l yà:ngà dāng nø yadø íe. Angmè Mari nø Yosep svng dv́nshi bǿì mèpvng, angní shini màshvzøngshì dvgvp, ang nø Shànshér Pvlàcè taqkèní góngshvng mø̀í we svng dǿm bǿà. Ang chø̀mpè Yosep nø døngman vsvng í nø, ang svng shvraq chaq màmvyǿ rvt, mvyø̀:ní ang svng gurlv́m dvdv̄m lú:ngà. Wedø ínìgø a:ngí yarì dāng dvda:mò ke, kū, Vkàngpè Ang dvzv́r tiq gǿ nø yøpnv́ng taq ang svng dvtánshì nø yadø a:lòe. “Dawi pvlí pvlaq Yosepmé, nà svng vdv́nshishaq mè Mari nø nvchø̀mmè washìlv́m lòng dang mèdètiqshìni. Pàwálv́m wani ang góng taq cv̀mré ríò lòng nø, Shànshér Pvlàcè taqkèní íe.A:ngí nø angcè tiq pè gv̀l daqòe. Ang bø̀ng nø nàí Yesu, wa tǿ ràe. Kadø íe wani Ang dvcì cèrì svng angmaq mvrà kèní chutchv́nglv́m pè nø Ang íe,” a:lòe. Yarì shvngbe í yà:ngì we nø, Vkàngpèí kàdvtutshú pè taqkèní shø̀n yà:ngà kà dvhø̄:mò we íe. We kà nø, “Eyv̀ngnøng, chø̀myoré vjø̀ng tiq mè nø góngshvng mø̀í long nø, Angcè tiq pè gv̀l daqòe. Ang bø̀ng nø, Immanuel, tǿ lú:ngòe,” wae. Wekà nø, “Gvray nøngmaq nvng v̄le,” wa kà íe. 24 Yosep nø yøp yv́ng kèní vshat ráì kvt, Vkàngpè Ang dvzá:rí ang svng dvká:mò dø tiqdvchá cà:nò nø, wemè svng ang chø̀mmè washìlv́m lūshì yà:ngì. Inìgø, angcè mvgv̀l daqò dv́ngte ang nvng màshúshi. A:ngí cv̀mré pè bø̀ng nø Yesu, wa tǿòe.
Vpø’ íwe pèmè vnvmchvngmaq,
Gvray Svngzāce ku shvléshì lúngì mvshøl tvrà taq, St Joseph nvng Vmè Maria nø gvzà vchvk we shvra tiq shvra taq vbáè. Muqlang dvzvr Gabriel í dvbùshang Mongkà dvtáò rvtø Maria vtá:nshì lòng nø gvzà vchvkngè. Chømyo vjø’ng Medō Maria í gø vtō nø ” Ngà nø Vpè Gvray gvsangò dvzømshú vshuq me øngàe. Nà Kà vl dø tiqdvchá ngà taq laq bøn lùng” wā shø’n dvgvp kèní Mongkà nø Svngzāce shvléshì lú:ngì. Shì lvm lòng nvng Mvrào dàm rì svng lvjv’ngà lúnlvm rvt Gvray lvpat svng vsvngrì í vtoshì lúnlvm rvt Gvray gvsang nø rvgaqtøm kaq svng dì lúngì. Gvray gvsangò gvsat taqø chømyo vjø’ng Medō Maria nø àngde vjú svng mà dvdvmshì Cìpshì Nøntní tiqlvpat vpnóngshì nø cvndvgøm yangà. St Joseph í gø cvndvgøm yangà. Muqlang dvzvrò dvbùshang kà svng táò weí Kvmnøntní Medō Maria svng nítvp dø tùbùm øp gar yangà. Medō Maria í nø Longza pè svng “Yesu” wā bøng tø yangà. St.Joseph nø Longza pè Yesu Kristuò øp kvng we angpè í lúngì. Longza pè Yesu Kristu gø St Joseph ò Døngku vsvng í lúngì. Dawi ò dvci dvgø’ng shipan taqø vbá lúngì. St Joseph nø chutchvng we tvrà dang taq lúm we nø gvzà mvyv’ngshì nigø gvzà vchvk we shvra ( Gvndaq) tiq shvra taqø lúm yangì.
Vpø’ íwe pèmè vnvmchvngmaq Gvray Døngku lvpat mvshøl yadang svng dvdvmì nø, St Joseph nvng Vmè Maria ní pàdø, Gvray gvsangò gvsat vjø’n shvrúng we shvra, Døngku bvnlì taq, zø’m shàì we Sasvna bvnlìrì, chutchvng we bvnlì taq Nønt lømløm lúm laq lúnì. Shvkse wáshì laqlúni shvngbe svng oqā.
