Scotland móngdàn kèní lvpat cv́m vtang íwe Catholic Shvrúngshú tiqgǿ
Scotland móngdàn kèní lvpat cv́m vtang íwe Catholic Shvrúngshú tiqgǿ àngbø̀ng nø Elgin-born Aidan Matheson íe. Àngò vsvk lvpat nø 27 nǿng íá:mì nø 2025 June shvlá taq shvrúngshú vya svng kámshì bǿì wegø íe. Àngnø Gvray paqzí svng Italy móngdàn, Rome taqø cvnshì ráì wegø íe.
Àngò àngnvm lvngà shvdang 3 gø vlwe ínø̀ cv̀m lvpat taq àngò lvpat shø̀ngran nø Pilot mǿíni zùng shvngøt shú svra tiqgǿ bǿnlún lv́m shóngshì nø shø̀nran gv́lshì yv̀:ngì we tiqgǿ íwe svng gø shálún shìe. Àngò vsvk 15 nǿng taq nø Gvray dvbùshvng tvrà svng nøt vyuq ráì weí shvrúngshú zùng svng gòng bǿì we íe. Àngnø cv̀m lvpat kèní Gvray kámnøt tvrà taq dvzaqshì nø̀ v́lsháò we tiqgǿ ínø̀ vjúrøt dvzaqshì we tiqgǿ gø íe. Gvray dvbùshvng bv̀nlì tvrà dvpvt Inverness myuq taqø gø apnúng shìwe nvng Gvray bv̀nlì wà yv̀:ngì we svng gø shálún shìe.
Àngnø 2017 nǿng taq shvrúngshú zùng svng gòng bǿì mèpvng mònggv̀n tvrà, nøt laqyà rì svng shvngbe chutshì nø Gvray dvbùshvng bv̀nlì dvpvt nvng tiqdv́ng vsv̀ngrì kaq mvrà chutá we tvrà taq nøt løpshì nø dvzaq dvkángshì ráì we tiqgǿ gø íe.
Àngò lvpat tvrà dvpvt nøt shø̀ngran mvtú nø àngò pvlàcè tiqgóng shvngbe chutcháng lúnwe jejú vtoshì lúnlv́m dvpvt nvng Gvray tvrà kèní vsvr we tiqdv́ng vsvngrì dvpvt gø Gvray tvrà shvngøt dvtú lúnlv́m wawe shø̀ngràn kèní yadø shvrúngshú lvpat svng tuqráì we dang vtàn bǿà we íe.
Àngnø Catholic shvngø̀mré vdòng taq lvpat cv́m vtang we shvrúngshú shìpvng taqgø vbánø̀ mvshǿl shøp ráà we shvrúngshú tiqgǿ gø íráì wanø̀ shvngkà dvprì taqkèní gø vtàn ráà we íe. Àng taqkèní shvngø̀mré vsvngrì kaq mvrà vroqā we bv̀nli, Gvray dvbùshvng mòngkà dvshvngwe nvng tìløp kámā we bv̀nli tvrà rì taq dvzaqshì ráì we shvrúngshú tiqgǿ íwe svng shálún shìe.
