Noqngøm chøm angshvr shvmán Bóy, Kàngpè Angmè Mari lúngdøng shvmán Bóy nvng Kàngpèò Kàgvp svng Vjúrøt Noqngøm Chøm Shvmán Bóy
Myitkyina Svrado Sasvna, Njàng Dung Jaò Gørwang Rada Kawng Svra Vsing Rada Kawng taq Gvray jèjú taqkení Rada Kawng shvngømré vsvngrì nvng nøtløm nøtshò vlu zàngshìrì dvzaqshì weí vrangshì dáng bø’à we Kristu koqkvm noqngøm chøm, Muqlàng koqkám Mè Mari lúngdøng shvmán Bóy nvng Kàngpèò Kàgvp svng Noqngøm Vjúrøt shvrà angshvr shvmán bóy svng 10/12/2025 yaq vsháng 10:00am rvtø taq wálúnshì bø’ì we íe.
Kristu koqkvm noqngøm chøm angshvr shvmán bóy nvng Muqlàng koqkám Mè Mari lúngdøng shvmán bóy nvng Kàngpèò Kàgvp svng vjúrøt noqngøm shvrà angshvr shvmán bóy taq Myitkyina Sasvna Svrado gvbà John Mung Ngawn La Sam ò, ralē Svrado Francis Daw Tang (Nvr) nvng Shvrúngshú Jaù rì (35) gø’ kømngøm nø vjúrøt shmánshì bø’ì we íe.
Ya bóy taq Sister mvdò vrvm kení MaMa rì, Brother rì, Mòngkà Svra/ Mè rì, nøtløm vluzangshìrì nvng shvngømré vsvngrì (1000) ján kømráì we íe.
Kristu koqkvm noqngøm chøm, Muqlvng koqkvm mè Mari lúngdøng nvng Kàngpèò Kàgvp svng vjúrøt noqngømlvm shvrà chøm svng Njàng Jaò Gørwang øp Fr. Patrick Zinwa Brang Di í, tvrà shøl nvnggùn zì we nvng Svrarì, shvngømré vsvngrì nøtløm vluzangshìrì shvngbe (3) nøng tøp dvzaqshì bø’ì we svng shálúnshìe.
Rada Kawng Svra vsing nø Myitkyina Sasvna vdùng taq vlwe rvtø, Myitkyina gørwang øp Fr. Dr. Peter Hka Awng Tu (VG) taqkení shvmánò nø Kristu koqkvm noqngøm chøm wanø bøng zí yvngà we íe.
Rada kawng Svra Vsing taq Rada kawng (A), Rada kawng (B), Tìwín, Ngoq Cháng nvng Charapati (B) mvring rì vbá weí, shvngømré vsvng (276) Chøm nvng Shvngømré vsvngrì (1000) ján vl we Rada kawng Svra gvbà Bosco Dvlam Htum Zau Doi í, shønò rvt shálúnshìe.
