Svmarérìí Yesu dvzø:mò we
Lk 8:1-3
Dèni rø vdu we mòngkà taq Galile móng kèní Svmarérìí Yesu svng dvzø:mò we dang tálúnì we íe. Chutcháng we tvrà nvng singnø mvshǿl rì taq svmarérì nø vchvk mvdø̀ng shvrà rì dang taq vbáwe svng yv́nglún shìwe íe.
Kàgvp ànglí taq Moshi svng shøqlv́m dvzø:mòwe cì svra svmaré 2 gǿ ígø we cv̀mré gǿ svng yv́ng dvsházaò nøt rvt Paró koqkv́mpè àngcè kaq svng we cv̀mré gǿ svng zíò nø dvkúm dvzv́r:òe. Vránø dvgá svmaré rì íwe Judit, Susana, Rutaq maq gø wedø vsvng chutcháng we bv̀nlì tvrà rì taq dvzaq shì yv̀:ngì we mvshǿl rì mòngkà taq yv́nglún shìwe gø íe.
Kàgvp ànglí vbat taq gø Yesu Kristuò mv́r, ngúng, shvwi rìsvng Svmaré mè Veronicaí shøqāò we, Kàngpè Yesu kaq svng dvki vrè, shvnip shvnvr mvwà lv́m àngchø̀mpè Pilat svng dvkám yv̀:ngà we Pilat àngchø̀m mè dø íwe mvshǿlrì yv́nglún shìwe íe.
Mòngkà taq yv́nglún shìwe svmaré rì nø chutcháng we bv̀nlì tvrà rì nvng Kàngpè Yesuò wurkáng tvrà rì taq høqshaq dvzømshì we svmarérì íwe dang mòngkà taq yv́nglún shìwe íe. Kàngpè Yesu shìyv́ng kèní zun bǿì we svng nvmlat yv̀ng yv̀:nga we gø svmaré me Madalama ni íwe svng yv́nglún shìe.
Wedøni Yesu Kristò dvzv́r rì kaqsvng dvzøm dvzi we svmaré rì dang gø (dvzv́r 1:14, 1 Cor ) mòngkà tut rì taqgø yv́nglún shìwe íe.
