“Noqshi bø̀ng wa ríò rì”
Ngà svng, ‘Kàngpèá, Kàngpèá, wa go vsvng shvngbeí muqlàng móngdàn góng lún lú:ngò we mø̀í. Muqlàng taqlap yv́ngò Vpè Ang nøt cà:nò rìí wa góng lún lú:ngòe.’ wàe.
“Chø̀m wáshú vní pv̀n”
24 Wervtnø̀ Ngà kà yarì táò nø cv́n dø̄ng vsvng kagǿ ínìgø, lóngtv́ng mvdv̀m taq chø̀m vrv̄ngshì we, zitnøt v̄l vsvng nvng vbónge. p 25 Shø̄ zaq nø, tì tø̀ng nø, nv̀mbø̀ng mvrù mut ra weí chø̀m wechø̀m svng vtøp ra nìgø, we chø̀m mvpv̀ng angké nø lóngtv́ng mvdv̀m taq vrv̄ngshaq í rvtnø màtūngv̄m. 26 Ngà kà yarì táò dá:ngí mvcà:nò gǿ nø, zishìl mvdv̀mø chø̀m vrv̄ngshì we svngdál nvng vbónge. 27 Shø zaq nø, tì tø̀ng nø, nv̀mbø̀ng mvrù mut rā weí chø̀m wechø̀m svng vtit rā kvt, vtūngv̄m nø angshí vrø̀mv̄me,” a:lòe.
Vpø’ íwe pèmè vnvmchvngmaq, Dènio dvbùshang Mongkà taqkèní Vkangpè Yesu Kristu í shedø’:mìe.
Tì tø’ng nø Chøm rì lé:mkéò weí vràl vcat nø vtì í lángkèo tvrà rì svng Shvngkà rì taq mvmè yv’nglúnshìe. Mvpvng vrvngshì lòng shvla we Chøm, Dø’ngvng we longtvng mvdvmø vrvngshì Chøm rì nø Toniò lvngcha angpvnpvn dàm svng jór lún nø Dø’ngvng lòng svng yv’nglúnshìe. ” Gvray gvsang nø mà ràl mà cat we Dvciq lvpat Dø’ngvng we longtvng, mvpvng” íe. Wervt Dø’ngvng we longtvng , mvpvng mvdvmø vrvngshì lúnlvm nònggùn kūnga zìe. Shvdømè. Pvn vrvm shvngbe nø angò ‘Dvtdán’ vlē. Angò Dvtdán lvpat bēvm nìnø tin gvyaq sháòe. Gvray gvsangò Dvtdán lvpat nø Dvciq lvpat íe. Dvciq lvpat Dø’ngvng we Gvray wàwe longtvng mvdvmø angdèo lvpat svng vrvngshì ràe. Kristu Gvrayí vrvngò we shvngømré, Kristu Gvray í shvngøt dvtú we tvrà, Dvla vl dø tiqdvchá wè vdòng taq cvndvgøm nø cúnshì rà íe. Nøngmaqò lvpat nø Gvray gvsang yv’ngkèní pvngshìe. Gvray gvsang taqø angdèo lvpat svng vrvngshì nø, Gvray gvsang vdòng angdèo lvpat svng dvjø’ngshì ràe. Wè kvtwā nøngmaq gø’ vrvm, Døngku vrvm, mvdò vrvmì vhø’m v-du we Shiwvt yvklvm banchvk rì svng shvlá vtv’ng rvdoq rvwan nø parvn lúnlvm vlē. St. John Damascene í gø,” Nøngmaq Bāsha vsvngrì Dvciq lvpat longtvng wàwe Kristu Gvray mvdvmø angdèo lvpat rì svng vrvngshì lvm, Gvray vdòng taq Dø’ngvng lúnlvm, rvgaqtøm tvrà í øp we taq vlín we mø-í dø, dø vdòng yv’ngkèní lutshì lúnlvm” rvt vjúrøt dèbvng yangshà.
Vpø’ íwe pèmè vnvmchvngmaq, Dø’ngvng we Kristu Gvray longtvng mvdvmø, Vkangpè Yesu Àng íni lvmboqri mvdvmø vrvng yangà we shvngømré, dvkv’m Kà vdòng taq, lvmboqri nvng, Kv’m vsvng, Shànshér vsvngrì nvng tiqdø angdèo lvpat svng, nøngmaqò lvpat svng vzaqshì we Nøntní, Kvmnøntní vrvngshì laqlúnì, wvng dvshat mvyøngè. Shvngbeí Kristu Gvrayò Mongzøl lòng vtoshì laqlúnì, shvngbe svng oqā.
