Yesuí dvzv́r Simon Piter goò we
Lk 5:1-11
Shóngshø̀nwe Pè, Mè vnvm vchvng maq dèniò mòngkà taq Yesuí Dvzv́r Simon Piter goò we dang tálúnshì we íe. Vsvngrì dvhø̀ taq kàdøgø bǿn mvdaq, vsvngrì taqkèní yv́ngmvtàmvm we tvrà svng Kàngpè Gvray taqkèní àngò chutchv́ngwe tvrà dvpvt lánglv́m goò we dang svng yv́nglúnshì we gø íe.
Wedø vsvk lvpvt gǿng ráì høqshaq àngcǿ àngcè rì màshvzv:tnò we Abraham svng gø àngcǿ àngcèrì muqlàng kòrnip rìdø lut tàm vshøt dvzv́r lú:nò we dang svng gø (Nvmlat Nvmpvng 15:5) taq vtàn ráà we íe.
Lk 1:16 taqgø mvrà shèr we chømyo vjø̀ng tiqgǿ taqkèní cvmré lvngà shvdang shvzvt lú:ngò we dang vtàn ráà. Yoseph taqkèní we cvmré gǿò àngpè mǿí we høqshaq àngí dvkùm nø vsù:nglv́m dǿngjá svng gø dvkv́m ráà we dang yv́ng lúnshì we íe.
Dèniò mòngkà taq Nga vkwi vm vsvng íwe Simon Piter svng nvm vyv́:ngámì rvtø̀ taq shvmgún dvgøp dvzv́rò we taq shømgún rì nø dínglv́m høq nga tiq rédø̀ng gøpkéò we nvng Yesuí welòng nga vkwi we bv̀nlì døni vsvng vkwi lv́m dvkámò we dang yv́ng lúnshì we íe.
Yesu yv́ngsvng kámnøt kèní àngmèpvng cvn bǿì we dvbùshvng tvrà taq dàlv́m ishøt jejúrì àngmaqí vtoshì lú:nò we dang mòngkà taq yv́nglúnì we døni nøngmaqò lvpat tvrà taqgø wedø íwe Gvray kaq kámnøt vdòng zǿm shvngáng dvzaq shìlv́m mòngkà kèní shvdǿm we íe.
