Pope Leo XIV ò Lebanon móngdàn dvbùshvng laqlè tvrà
Svrabín koqkv́mpè Leo XIV nø Turkey móngdàn taq dvbùshvng zaqlè tvrà (4) ni vriq bǿà mèpvng Lebanon móngdàn svng vrá zàn dvtut zaqlè wàng tvrà vriq bǿà we íe. Turkey móngdàn ò dvbùshvng zaqlè tvrà taq dvbùshvng (1700) nǿng gøm lìpùng gvbà svng gø Iznik taq shvngngø̀mré vrv̀m kèní shølshúrì kø̀mngǿm nø mòngzø̀l dø wálún bǿì wegø íe.
We lìpùngmè taq Otothox shvngø̀mré shølshú vgo Patriarch Bartholomew nvng dvgá shvngø̀mré vgorì, móngdàn gv̀mzø̀ shølshúrì kø̀mngǿm nø vhøm bǿì wegø íe. We lìpùng taq shvngø̀mré rì móng gv̀mzø̀ dù rì, rvcángcèrì shvngbe nø màbóngwe kámnøt tvrà rì dvhø̀ taqkèní shvngbe nø shóngnøt taq vzø̀m vzvp lv́m tvrà dvtú bǿà we íe.
Pope Leo XIV nø Turkey móngdàn kèní Lebanon móngdàn svng zv̀ndvtut dvbùshvng zaqlè wàng vriq bǿà we taq Lebanon móngdàn móng øp gv̀mzø̀ rì taqkèní gø pàmvrà vtoò nø we móngdàn taq vle á:mì we (13) nǿng taq Svrabín koqkv́mò dvbùshvng zaqlè tvrà nv̀mlat tuq bǿì mèpvng yaboq nø (2) boq waboq Svrabín koqkv́mò dvbùshvng zaqlè wàng tvrà íráì wegø íe.
Lebanon móngdàn nø wulaq tvrà, móngdànò pø̀ gv̀msùng màpǿ we móng dvjà, móng vsvngrì kaq svmi luqtàm dø zí mvlú:nò we, cì, jak sór rì yak we móng dvjà shìwvt rìí vtøp kéò we mvtaq Seria nvng Palastine mvjàn shìwvt vsvngrì vní wàn rvzé gǿrì svng gø vto shì bǿì we móngdàn íwe taq Catholic shvngø̀mré taqkèní svng pv̀n dvsháza bv̀nlì mvdø̀ng tubúmā we tiqmóng gø íwe svng shálún shìe.
Cardinal Bechara Boutros Rai shø̀nwe taq yadø Svrabín koqkv́mpèí nariq ráshà wenø móng vsvngrìò pvlàcè dang, jàng laqyàrì shvla lvpsvng wáshì dvzvr we dvbùshvng tvrà ni íráì. Móngdàn vsvngrì shvngbe gø lvpat àngshv́r svng tuqlún lv́m tvrà tiqlòng svng ètóngā ráshà. Lebanon móngdàn nø àng dang dang taq shìwvt rì vkǿn nø mvhøt lv́m tvrà rì vdòng taq móng vsv̀ngrì v́l vdu we íe.
Lebanon móngdàn nø dvgá Democracy móngdànrì ò móng dvjà rì, kámnøt tvrà rì gvzà vsháy we móngdàn tiqmóngdàn gø íe. Pope Leo XIV tuqráì we zaqlè tvrà svng President Joseph Aoun, Wunjí chuk Nawaf Salam maqí pàmvrà vtoò nø vhøm mvngu shìwe tvyø rìgø wálún bǿì wegø íe. Pope Leo XIV taqkèní gø lvbán ni taq móng gv̀mzø̀ rì nvng kámnøt tvrà angdang dang kèní shølshú rì shvngø̀mré vsvngrì kø̀mngǿm we lìpùng taq dvkám mòngkà dvtú we nvng nònggwòn zi mòngkà rì kèní dvtú bǿà wegø íe.
Vatican News
