“Yesu vtv́ng daq we”
Wedvgvp nv̀m, shvlá nvng kurniprì taq gø shálv́m dvtánshì daqe. Rvgaq tø̀m taq nø, nvmukdvra nvng timārì vhoshi we shaq kèní, nøt bùm weí, vsvngrì nø shvrāng mvrà:lò dø nøt shok longe. Vrá vsvngrì nø, móng døngtáng taq bø̀nlv́m dv́nshì rì svng dvdv̄m dvshà nø svre weí nøt vmv́ng lú:ngòe. Pàwálv́m wani muqlàng rāmò jórnònggùn rì nø angmaq tvríshì we tvrà kení vshøtnvme. Wekvt Vsvng Angcè Pè nø jórnònggùn nvng brimbrim shór dvgùng vtv̄ng nvngnvng, rvmøt tiq pù taq lāshì daq we svng angmaqí yv̀ng lú:ngòe.Yadv́ng pv̀n vhø̄m pv́ngshi long dvgvp nø, namaq gø̀nshaq chutchv́ng lunlv́m angni tvp níshì ráì rvtnø namaq nø vgo èngángshìnøng nø shaqshaq wa èca dánøng,” a:lòe.
Vpø’ íwe vnvmchvngmaq,
Dènila rvtø Asia taq Philippines móngdàn, Nvmløp móngdàn rì íwe American móngdàn rì taq nø (Thanksgiving Day) Oqā wàwe bóy angni svng móngdàn vdòng taqø gvzà shvring nø ngør dø wàòe. Oqā wà bóy svng Døngku chè:pm ku kèní gø, tiqgø’ che:pm ku kèní gø, Dvci dvgø’ng ku gø wáshì we vtóng vle. Téwa jèjú vtoshì lúnì, Gvray gvsang Jèjú svng gø téwa shvgùn shvring oqā wàe. Pà rvt, Gvray gvsang kaq oqā wàe mà? Lvpat taqø ni v-rvm, rvtø vrvm vtoshì lún we Jèjú ìshøt rì svng vrá tiqkvt gùn dvtøp dvdvm vjáng ì.
Dèni Mongkà tiqciq (Daniel 6:12-28)Gvray gvsangí roqgār we í Kangki nònggùp kèní Daniela lutshì yangì tvrà Mongkà taq tá lúnshìe. Gvray gvsang ínø Na, Ngà kaq mvhøt yvklvm rì angpvnpvn yv’ngkèní chut èchvng ínø, Vkangpè Gvray kaq oqā wàì nø jèjú vtv’ng shàì lòng pà ínø, mèpvng tiqkvt oqā wà jèjú shvgùn shvring lúnlvm rvt, dvshà mvhøt vhø’mshì rvtø taq gø í v-duè. Shø’n mvyø’ we nø, Dvbùshang Mongkà taq Vkangpè Yesu Kristu v-ní baq wà baq shini mvtuq vzàng kaq vsvngrì taqkèní vhø’m v-du we Shiwvt yvklvm rì svng dvtánòe. Íni gø, Vkangpè ínø mèserénøngnì ” Namaqò chutchvng lòng nø tuq mv’nshì ráì” wā dvkv’mòe. Dvshà mvhøt yvklvm pvnrì svng tønzv’n lúnlvm nònggùn kūnga vzàm zì rvt Gvray gvsang kaq oqā wàì. Vkvt gø, mèpvng gø lvpat taq vhø’m v-du we dvshà mvhøt yvklvm rì svng Gvray gvsangí nø Nønt shvløm dvbvng ràe, wàì nø Daq vduq Kv’mì taqsórí Gvray jèjú svng rvtø vrvm shvgùn shvring shvta laqlúnì.
