“Yerusalem dvpvt Yesu ngø̄ we”
Yesu nø Yerusalem svng tuqlvm wáshì la:ngí, wamà svng yv̀ng bǿà ke, wamà dvpvt Ang ngǿ lú:ngì nø, yadø wae; “Wamà naé, dèni nà svng mòngzø̀l lòng èlv́ngaa:tnì pè svng nàí èsháò pà í nìnø shvla we! Iwe akvt nø nà nē taqkèní dvkøqshaq íá:mì. Nà ngv̀nshà rìí nà gùr hømhøm cìlzóng vra:ngò nø èwangvt we angni tuq rae. Gvrayí ètìn daq we rvtø̀ svng nàí mèmèshá:lò rvtnø nà nvng nvcèrì svng nø vba tø̀m høq shènv̄lnøng nø èshvt bǿnø̀nge. Nà svng nàrvng yà:ngì we lóng werì gø màrǿlshaq tiq chv̀ng gø màmvza ráò,” wae.
Kristu vdòng taq Vpø’ íwe pèmè vnvmchvngmaq,
Rvtø wàwe nø Nāyi tiqchvng mvdvm dvríshì we seconds angdàmrì mvdvmø téwa luqè. Rvtø wàwe nø dvcv’mà lòng í mà?, mø-í ni dvbéà lòng í mà wàwe taq mvdøng nø nøngmaq cúnshàì, dì íwe mvdvm taqø gvzà vchvkngè. Wè mvdvmø nøngmaqò lvpat yv’ng mvkøm mvtøp rì, Rvtø rì nøngmaqò lvpat yv’ng Gvray gvsang kadv’ngte vle mà? walòng gø gvzà ni vbá we íe. Dìngman we móngkà taqkèní gø rvtø svng ( Chronos nvng Kairos) wā v-ní lòng vwálshìe. Chronos nø bé a:mì we angwa angni rvtø nvng Nāyi rì ínø, Kairos nø ” Gvray gvsang shvrúng we rvtø, chutchvng lòngò angni rì” ( 2kor6:2) Gvray gvsangò chutchvng lòng tvrà rvmvngcøng taqø dì nø cúnshì we rvtø angni rì íē. Nøngmaq ínø Angwa Nár rvtø angni rì svng dvja angpvnpvn taqkèní yvngì pàdø, Gvray gvsangò jèjú rvtø angni rì svng gø dvdvm vshat nø vpø’ shvring v-duè. Vkangpè Yesu nø Vsvng mvmè dvpvt dvdvm vshat nø Nēci vla yangà.
Wervt, angí nø, ” Gvray gvsang Tuqlvm rvtø angni rì svng àngmaq í mvsháò rvt íe, wā dvkv’m nø shø’n yangì. Kristu Yesu gvl yangà dang nvng tiqdø tuq ra we chutchvng lòngò nvmlat Gá lòng svng vsvngrì í dvdvm mvrøn mvsíng lúngò. Chutchvng we Mesia Gvrayò rvtø angni rì nø lvngdøm rvtø kaq gòng a:mì, vhø’m ráì dang svng Vsvng mvmè ínø mvsíng mvràl yangò, tvrà svng vkvtdø Mongkà taqkèní nøngmaqí tálúnìe, shálúnshìe. Wervt Vkangpè Gvray gvsang shvrúng we Jèjú angni rì taq Døngman dø cúnshì nø shvkse wáshì laqlúni shvngbe svng oqā.
