Shvnip shvnvr kéò we rvcángcè rìnø døngmvn tvrà, vdu vbóng we dvrá dvpvt køqzøl rà svkse íe
November 16 ni taq wá vdu we mònggvn mvshámhoq vsvngrì ò àngni lvmvng tvyø taq Pope Leo XIV taqkèní mònggvn taq mvshvmhoq vhø:mò vsvngrì nvng shvnip shvnvr vhø:mò vsvng rì nø Yesu Kristu ò lvpat tvrà nvng vbóngwe tvrà taq rip vdu we ínø we kámnøt taq zøm shvngángshì lvm shvla we nvng svrenø nøt cvm lvm mv-vl we dang nòngwòn zi mòngkà dvtú bøà we íe.
Mònggvn taq màdvrá we tvrà ku shvnip shvnvr vhø:mò we vsvngrì gvzà vlwe íe. Wedø shìwvt døng vdòng mvhøt lvm vhø:mò vsvngrì dvpvt Yesu Kristu nø àngmaq yvng svng tvpní shìnø nøt shvløm we, chutcháng we tvrà dvpvt tvlú dvgø shìe. Yesu Kristu nø àng rvgaq mvdàm taq naqciq riqwe dvshà mvhøt lvm tvrà svng vto shì yv:ngì nø chutcháng we tvrà svng tóngā ráshà we døni àngdø kámnøt tvrà taqø shvnip shvnvr vhø:mò vsvngrì dvpvt àng kadvgvp gø shvnvngø nøt shvløm nø chutcháng tvrà dvpvt tvlú vlwe dang shvnshér karu taq yvnglún shìe.
Wedø íwe shìwvt tvrà taq vl vdu we vsvngrì nø mòngzøl nø vdu vbóng we dvrá tvrà dvpvt svkse bønlvm, Gvray àng shóngwám shìwe tvrà gø íe.
Naqciqriq we mònggvn ò shìwvt tvrà wawe nø tiq rvtø cètaq vdá:vm we wa íe. We shìwvt døng kèní lutshì bøwe mèpvng mvng dvciq lvpat mòngzøl we tvrà svng tuqlún dvzvr we íe wanø shvdøm mòngkà kèní dvtú bøà.
Mònggvn taq Yesu Kristu ò tvrà, kámnøt vdòngø shvnip shvnvr vhø:mò vsvng tiqgø vrvm dvpvt àngmè Mari taqkèní gø roqgvr we nvng dvtit tvle vjúrøt dvbangā we íe wanø dvtú mòngkà vtàn bøà we íe.
News- Vatican News
