Svrabín koqkámpè Leo XIV ò, Nvmlat Lvga nvng Hàng Sømla svng Gvza màléwe Rvtø Taq Dvkàng shvbrálvm Dang
Svrabín koqkámpè Leo XIV nø Svrabín vya døngjá taq (6) shvla dvzaqshì ráìwe íe. Angí zàchùndo tiqgøm svng October (9) taq dvshvng lúnbø’à we íe. Wedø tiq dvchá November (21) ni taq angò Lega svng gø dvshvng shvbrálvm íe.
Svrabín koqkámpè ò dvdvmò we dang, wàlvm dang rìsvng shvngømré vsvngrì shvngbeí shá vdū, rø vdū we Lega tiq buk íe. We Lega buk taq màdvrá we dang rìsvng tønshìlvm mví. Vdámvgàm rìnø, té vdámvgàmlvm rìwa íe. Dvshà mvhøt vhømò we vsvngrì nø té dvshàlvm wa íe wanø angò Lega nvmlat taq shø’ne. We Lega svng Italy kà taqkení vrūò we ínø ‘La forza del Vangelo. La fede cristiana in 10 parole (The Power of the Gospel: The Christian Faith in 10 Words dvbùshvng mòngkà svng rvcángcèrìò kámnøt tvrà dang svng kà (10) dang taqkení shvdúme. We Lega svng Vatican bungnik Tyait yvng kení waò nø November (20) ni taq dvshvng shvbrálvm íámì.
We Lega buk svng Lorenzo Fazzini kení gún dvtøpshaq íe. Ang nø Vatican bungnik Tyait ò Editor gø íe. Angí nø Svrabín koqkámpè Leo XIV ò Lega buk svng vkán (10) kán waò nø rvcángcèrì lvpat taq gvza vchvk we Kristuí, Nønt mvcìn, shvngømré, shvngømré bvnlì, Tiq nøt tiq mvyung, cømsaq mòngzøl lvm, dvshà mvhøt we dang, nvnggùn yúmrì, dvrá we dang, kám lvm dang wanø lvjvngò we íe.
Svrabín koqkámpè nø yarvtø jòwe dang nvng dvki vrè we dang gvza køm we íe. Nønt mvbyòlvm dang mònggàn vrvm taq gvza loq we íe. Ya dang svng pvrànlvm nø nøntkøm ràwe dang íe. Vnvm vchvngrì íshàe wanø vtoràe. Vsún yok we nøt, bvnlì vrvm svng gvlràe. We Lega buk svng Italy móngdanò wamàrì taq Vatican Lega dip shvrà nvng shvngømré, Tóng laqya mvdò rìí shøl nø dvkàng shvbrálvm íámì. Lega nvmlvm tvyø lvmàng rìnø
- Nov (21) – Vicenza Cremona,
- Nov (25) – Tran city
- Dec (1) – The city of Verona
- Dec (5) – City of Genoa
- Dec (15) – The city of Cali rì íe. Svrabín koqkámpè Leo XIV ò, dang dvtøpshaq hàng sùmla svng dvtvnlvm ‘León de Perú nvng ‘Leo from Chicago ( Chicago kení Leo) svng gø tiqdø nvmlvm íbø’ì we íe. We Svrabín koqkámpè Leo XIV ò, hàng sùmla matdán mvsat svng Vatican ò vsvng vtoqvtip we mvdò kení waò we íe. Vedio matdán tiqlòng nø Svrabín koqkámpè ò Peru móngdan taq Sasvna dvzaqshì we lvpat dang, Svrabín koqkámpè ò, American lvpat dang rìsvng dvtvn we Vedio hàng sùmla matdán mvsat íe.
