Gvray nø rvcángcèrì shvngbe dvpvt mòngzøl lòng vl lvm shóngshìe

Pope Leo XIV taqkèní mònggvn taq mvjàn rì, tasvng shvnip shvnvr kewe tvrà rì svng nvr nø mòngzøl we tvrà scng tóng dvzaqshì lvm dvtú mòngkà vrìng bøà we íe.

Pope Leo XIV taqkèní mònggvn taq mvjàn rì shvnip shvnvr kewe shìwvt døng taq dvshà mvhøt vhø:mò vsvngrì dvpvt gvzà nøt bùmnø dvsháza shóngnøt kèní mòngzøl lvm tvrà svng cvn cvn wá dvzaqshì ràwe dang dvtú bøà we íe. Téwa mvjàn rvzaq we Bangladesh, Nigeria nvng Sudan móngdàn rì dø íwe mvjàn shìwvt vkøn we móngdàn rì yaq Gvray rvcángcèrì kaq vréshì nø shvtwe, shvnip shvnvr we bvnlì rì svng battut vto lvm mv-vl wanø dvtú bøà we íe.

Wedø vréshì we ngànshà bvnlì wa vsvngrì shèr lvm vjúrøt dvzaq shàì wanø dvkám mòngkà vtàn bøà. Yani la vdòng bøn bøì we rvcángcèrì kaq shvt nø shvnip shvnvr we North Kivu móngdàn, Gungo móng, Byambwe mvrìng noqngøm chøm taq vsvng àngcé mvdàm shvt bøà we ngàshà bvnlì rì nø kadøgø vto lúnlvm tvrà mv-vl zaq zaq vgám rà bøì wanø dvkám we íe.

Mvjàn tvrà kèní tasvng vzing we, vzi vrùng wawe bvnlì rì svng mvjàn taqkèní mvtú lá we tvrà svng laqyà tiqlòng ku lángshì lvm møí wanø vtàn bøà we íe.

Yanila vdòng Chala kèní Arequipa svng diwe zaqlè modo vkup we taq zaqlè vsvngrì 37 gø høqshaq lvpat zíshì bø we nvng sing nø àngmaq dvpvt gø vjúrøt dvbvngā we dang vtàn bøà we íe.

News- Vatican News