Yesu tv́n tiq kvt di daq we

Tiq kvt nø Farisirìí Gvray móngdàn nø kadvgvp tuq daqe má, wa røtna:tnà rvt Yesuí vtà:ngò nø, “Gvray móngdàn nø nēí yv́ngshì dø tuq daq we mø̀í. j 21 Vsàngí, ‘Eyv̀ngnøng, yayv́ng íe;’ mø̀ínī, Kulà, kuyv́ng íe; wa nø gø mvshø̀na:tnò. Pàwálv́m wani Gvray móngdàn nø namaq dvhø̀ taqni v̄le,” a:lòe.

Vpø’ íwe vnvmchvngmaq,
Mother Cabrini nø Miwa móngdàn kaq dvbùshang Sasvna wà mvyø’ yangì. Svrabín Koqkvm kaq dvbùshang Sasvna tvrà dvpvt røtnímshì we íni gø Svrabín Koqkvm ínø American móngdàn kaq Vsérshì taqsórí bvnlì wà dvshà vsvng Italian dvcice rì dvpvt le dvzømshú wáshì v-duè, wā dvtú yangà. Wè mèpvng Svrabín Koqkvm ínø, Nvmshvr tut móngdàn mø-í ni Nvmløp móngdàn kaq svng mvng dí v-duè wā vrá dvkv’m yangà. Dvkv’m dø tiqdvchá Ang í nø, Gvray dvbùshang Mongkà svng kadv’ngte mvjór vhø’mò we í nigø dvnúng nø dvshér we wà yangà. Mother Cabrini ínø, Angò dvbùshang Sasvna bvnlì svng ” Rvgaqtøm taq Muqlang móngdàn mè dvsher nø vrvng we” wā tø’yangà. Yalòng, Dvsher nø vrvngò lòng svng ရူပလ္ခဏ, ပထဝီဝင် rvgaq dvrit Hang dvla mvdvm téwa vchédø leo nø, ” Muqlang móngdàn nø Nøngmaqò Dòngnønt mvsøn taq vl ra lòng” wà Kà íe. Gvray gvsang nø Tiqdø vl lòng nvng Roqgār lòng Jèjú ìshøt í nøngmaq kaq svng èøp ègārìe.
Nøngmaqí dvdvm la dvng v-ná í nigø, Gvray gvsang nø nøngmaq dvhø taq rvtø vrvm vlē.

Shvngømréò dvbùshang Sasvna bvnlì wá dvzaqshì lòng nø Kristu Gvrayò dvbùshang móngkà me, Gvray gvsangò Mvkok dvdí shóngnønt Dvrá, nøngmaq vdòng vl lòng svng, vsvng Shvngbeí síngràl shálún lvm dvpvt le íe. Yalòng nø, Mother Cabrini, Ang lvpat svng vpnóng tvleshì yangì we Gvray Móngdànme Dvsher vrvng we, wà Kà íe. Dvshà mvhøt vdòng yv’ngkèní lutshì lúnlvm dvpvt nvng lvpat mongzøl lúnlvm dvpvt , vrá nø Gvray gvsang móngdàn Sasvna vháng vlúnlvm dvpvt dvzaq dvkvngshì rì, Shvkse wáshì rì, angdèo móngdàn kèní léshì bø’ì rì shvngbe í gø Gvray mongzøl lòng vtoshì laqlúnò. Nøngmaq shvngbe í gø Gvray gvsang ang móngdàn Angò Mongkà, àngbøng svng vpø’ nø shvgùn shvring taqsórí Shvkse wáshì laqlúni shvngbe svng oqā.