Mvjvn Dvjáng Bøn we Móngdanrì taq Cømsaq mòngzøllvm Dvzaqshìrì Svng Oqà wa kà Svrabín koqkámpè Leo XIV í, Shøn we
Lvbán vrvm Angelus vjúrøt dá:ngí Svrabín koqkámpè Leo XIV í, mvjvn bøn we móngdanrì taq Cømsaq mòngzøllvm dvzaqshì vsvngrì kaq oqà wa kà svng gvza ang lvjøm vl dø shøn bø’à.
We mvdvmø (Fung-wong) wawe Nvmbøng mvrumè rvt dvshàlvm vhømò we Philippines vsvngrì dvpvt vjúrøt dvbv:ngà we íe.
Vatican shvngka
Cømsaq mòngzøllvm dvpat dvzaqshìrì svng vdiqmat byuqā we dang,
Svrabín koqkámpè Leo XIV í nø, mvjvn dvjà vhø’mò we shvrà vrvm taq Cømsaq mòngzøllvm dvzaqshì vsvngrì kaq oqà wa kà svng shagunò we íe. Vleámì rvtø taq svnat làngòrì rvt Shi bø’ì vsvngrì dvpvt vjúrøt dvbvngà bø’à we dang, nøt mvbyó tàng nø vyatdárì íwe cvmrérì, vsvktē we shaqrérì, zā vsvngrì mvjvn Gvray we nvng bùm í wupmò rvt Shi Vsvng nø ya vsvngrì wa íe. Ya lòng svng vdiqmat byuq we dang nø mvjvn nvl lvm nvng vhøm nø vtoqvtip we dang taqkení jò we kàciq rvtlvm mvdøng mvdaq dvdvmlvm shøn bø’à.
Philippines móngdanò Super Nvmbøng mvrumè (Fung-wong)
Philippines móngdan taq November 9- 2025 ni taq bøn bø’ì we super tyai póng Nvmbøng mvrumè (Fung-wong) rvt vsvng dán bóng gvza loq we vsvngrì svng dvmmá lúnlvm yvng kení vser dvzvrò we Philippine vnā baìrì nvng tiqdø vl we dang Svrabín koqkámpè Leo XIV í shøn bø’à. Nvnggùn gvza zaq we Nvmbøng mvrumè nø tiq nari vdùng 185 kgm (115) Ming wa we íe wa nø matdándin shì nø, tiq nari 230 kgm (143) ming høq mvrumè gvbà gø vl yv:ngì. Shi vsvngrì, angmaqò døngkurì, dvm má lúnòrì, shvra vsershìrì dvpvt vjúrøt dvbvngàe wa Svrabín koqkámpè Leo XIV shønr.
Italyò oqà wa we angni
Italy taq nøng vrvm oqà wa we angni svng wàò nø Italy móngdan Svrado gvbà rìò nønggøm dvtú lega nvng Svrabín koqkámpè gø tiq dø vzøm we dang, We dvtú shvdøng lega taq mònggvn rvgaq svng gvl lvm døngjá vl we dang, zánat yiqkà vdú vnà mvwàlvm nvng yeshe rvtø yvng gùng kvt v’mlvm ang mvtú dangrì íe. Angmè dø íwe rvgaq nvng nøngmaqò mònggvn ju svng kvtvmlvm roq gvl mvkok we vsvngrì shvngbe dvpvt Gvray kaqsvng oqà wárà we dang gø shønòe.
