Noqngø̀m Tø̀ngnø dvshè:rò we
Angwa Nár (32) Sunday Homily
Shvngbe svng pàmvra. Gvray Jèjú kaqsvng nvmlat oqà waì. Ya lvbvn nø angwa nár (32) lvbán wa nár svng gòng bø’shà.
(1) Ezekiel 47:1-2, 8-9, 12,
(2) 1kor 3:8-11, 16-17,
(3) Yohan 2:13-22,
Noqngø̀m Tø̀ngnø dvshè:rò we
Dvzvr Poloí Namaq nø Gvray Gvsàngò Rvmá háng, Gvrayò chømdøngrì eínø:ngè, wàe. Vsvngrì nø Ukké nvng bilat mvdvmø té ring vpǿ nìgø nøngmaq nø Gvray kaqsvng apnúng tvleshì shaq írvt vpǿ shvringì we íe. Pàrvt wa nìnø nøngmaq shvngømré vsvngrì shvngbe tiqdø mvngūshìshàì nø Gvray kaq vjúrøtlvm noqngøm chøm íàìrvt íe. Nøngmaq shvngømré vsvngrì gø’vrvm nø shvngømré mèò UK dvchet dédvpwiq, kámnøt tvrà svng dvzøp shvdøngò we Catholic church shvngømré íshàìe.
Nøngmaq nø cúnshì we lúngrì íshà nìnø kapvní mvtin màgvyaqlvm ngàngdøng dø dvzøpò we íe. Nøngmaqò tìløp Sacramento Kàngpè Yesu kaq kámì we kámnøt svng tiqnøt tiqmvyùng wáshàì nø vto ì, we dang íe. Misa kàgvp nóng we, scramentrì nvng vjúrøt noqngøm shàì we taqkení Gvray kaq shvringì we, Pvlacè nvnggùn kungà lūshìlvm shvrà noqngøm chøm svng dvzøpmò cúnshì we lúngrì íshàìe.
Deni Yohan dvbūshvng mòngkà taq Yesu nø Yerusalem shvlē bóy svng ngāngá:mì dvgvp Noqngø̀m Tø̀ngnø wáng vdòng taq, nungwà, vyv̀ng nvng kāø nvmke vsvng gø, gv̀msùng chèòrì rūng da we svng gø A:ngí yv̀ng bǿà. angmaq shvngbe svng gø, vyv̀ngrì nvng nungwàrì svng gø, Noqngø̀m Tø̀ngnø wáng kèní A:ngí lù:ngò nø, gv̀msùng chèòrì gv̀msùngrì gø upmāò nø, angmaq hapjv̀mrì gø ngaqa bǿà. Kāø nvmke rì svng gø A:ngí, “Yarì yayv́ng kèní èlv́ngke bǿnøng. Ngà Vpè chø̀m nø namaqò wùlaq chø̀m wàlv́m mø̀í,” a:lòe.
Yuda vsvng rìí Ang svng, “Yadv́ng pv̀n nàí wàlv́m vmíng èvl we nøngmaqí shálv́m, mvshv́lpvrá Nàí kapà dètānshàni ma?” a:lòe. Yesuí angmaq svng, “Shànshér Tø̀ngnø yachø̀m ècatnøng; vshø̀m ni taq rá Ngàí shvrip lóngòe,” a:lòe. Wervtnø̀ Yuda vsvngrì nø yapè kadø wapè ímá! nøngmaq í, “Shànshér Tø̀ngnø yachø̀m svng vbìcé chuq nǿng wàò ke wa dv́ng yà:ngà. Vshø̀m ni cèí Nàí kadø wá ledá:ngò ni?” wae (Yohan 2:19-20).
A:ngí shø̀:nò we Shànshér Tø̀ngnø nø Ang vdè góng svng tvnushi we svng angmaqí mvsháò (Yohan 2:21). Shì yv́ng kèní Ang svng dvzun lú:ngà mèpvng wa, A:ngí shø̀:nò we yakà svng Ang coqcv́nrìí dvdv̄m rǿ:nò nø, Shànshér Kàru svng gø, Yesuí shø̀n ráà kà svng gø angmaq kv́me (Yohan 2:22).
Góngsha shvlē taqwa shini ècúnshinøng rvtnø íe. Kadø íe wani namaq dvhø̀ taq, nē vzàkē we, vzi vrùng rvzòng we èv̀lnøng rvt, namaq nø góngsha shvlē taq wa shini ècúnshinøng we mø̀í má? Rvgaq tø̀m laqyà shvlē taq wa tènùngnøng dø vshv́m we mø̀í má?(1kor 3:3) taq dvzvr Poloí shvdúme. Kvtshú nvng tì vdø̄rshú nø dvcháchá dvzømshú wa íe. Inìgø vdè bv̀nlì kadø dèzaqshì nìnø wedø tiqdvchá, wegǿ nø wegǿ dvshá zìbè lúnlv́m í lōnge (1kor 3:8). Kadø íe wani nøngmaq nø, Gvray nvng tiqdø muqhǿm bv̀nlì wáshú íshàe. Namaq nø Gvray Ang rvmá, Gvrayí shvzøng we chø̀m èínønge (1kor 3:9) taq wae.
Namaq góng nø Gvray shànshér Tø̀ngnø èínø̀ng rvt, Gvray Pvlàcè gø namaq vdòng taq v̄l we svng mèshánøng ma? Gvray shànshér tø̀ngnø svng tiq gǿgǿí gvyaqò we lā v̄l kvt kèní nø, ang svng Gvrayí gø gvyaqlv́m íe. Pàwálv́m wani Gvray tø̀ngnø nø shànshér we íe; tø̀ngnø yalòng nø namaq ni èínønge.
Deni nø Catholic shvngømré mèò tiqnøt tiqmvyùng nøtkøm vrvm vráshìlvm dvtú mvsatshì we Roma wamà taq vl we Basilica noqngøm chøm døngò bóy angni taq nøngmaq shvngbe gø UK dvchet dédvpwiq dø shvzøng we taq bóy mèsvng nøtløm nøtshò we í, shvngømré mè taqkení tiq dvtvng Gvray kaq vlø’mshìlvm kámnøt ní, vjúrøt noqngøm shàì nø Pvlacè shvlut we vhø’mlvm oqà wa nø shvmán jèjú ìshøt gømpaq røtshìlvm waì wvng dvtit svle kà íe. Shvngbe kaqsvng oqà.
