Døngman dø vtoshì lòng nø kádvgvp gø Kagø’ svng gø shaq cvm mà dvzvr.
Døngku tiqlòng taq íni gø, Shóngnønt vzøm we tiqzø’m taq íni gø, tiqmaq nø tiqlang mà lé, vrá tiqmaq nø mvmè vlé dvgvp vzì vrung walòng nø lúwvtchet tiqlòng nø mø-í. Shv-ngarshì, shvngoshì, vtánshì rì nø tiqgø’ nvng tiqgø’ dvhø vdòng taq v-toq v-tìp vzøm vzap tvrà lòng svng dvróshào pàdø shvmna rí, Nønt mvshøm lvm gø bø’n sháòe. Shvmna gvzà rí v-du rvt tiqmaq nø Relationship v-toq v-tìp tvrà rì dvbé, dvtv’ng sháòe. Shvmna rí Vzing kélvm rì bøn bung ra dvgvp vyáshì lvm rì vlē.
Dènila lvpat Kà taqkèní èshøn lúngò kvt jø’ngjøngni bø’n we tvrà yv’ngkèní yílshì nø dvgá dang rì taqkèní dvtv’ng sháò tvrà mvmè yv’ng lúnshìe. Kà shvbóng, Døngku tiqzø’m íe laq wā, Kà vzi vrung wa taqsórí vshat dvgvp vle yangì we Nønt mvshøm lvm rì svng vrá vwang we, mvmè vlé yangì we í rvt yílshì, vshat mvbø’n lvm rì taqkèní vcar we, tiqmaq nø kadv’ngte yílshì we íni gø yílshì màshvla lvngdøm taq vrúm vcar yv’ng yílshì we, ngvmshi rì tiqmaq vdòng taq nø mé tiq taq banchvk rì bø’n nø pvrvnà we gø mà-vl, lvngdøm ngvmshi rì taq banchvk rì nø te nø bø’n sháòe.
Tiqmaq Døngku pè la nø angdèo Døngku vdòng taqø àngde taq nønt mvgørlvm rì tøn nø, vkvtdø rvtø mvmè tønshì tiqlvban, tiq shvlá rvtø rì vle ra dvgvp tønzv’n mvlúnò we i dvhárshì, Angò boiling point svng tuq bø’ we tiqmaq Døngku pè la nø tiqmaq nø bvnlì Wang taqkèní lo ra dvgvp Døngku vsvngrì kaq cip láè, pàwàlvm wàni bvnlì wang taqø mvjór rvt, Døngku vsvngrì køm dvgvp àng Nøntshøm tvrà rì vrá vchvngò, vkvt dvtán Shi rì mvdvm Døngku me la taq ya mvdvm Kømzøp dø vl.
Wervt Nønt mvshøm rvt vshat lvm tvle shvlá wace vrashì dvman lòng nø shvlá vtv’ng íe. Døngku pè nvng Døngku me vzøm ràe wā pàdø vshat lvm rì vl ra dvgvp gø yílshì lòng nø shvlá vtv’ng íe. Kadø i rì yílshì lún ra ma? Døngku me la taqkèní nø mvrshvm shaqcvm rì, mvtvn we Kà rì mvshøn lvm, mvláng lvm, vyá shì ràe. Vhaq vjang shì lòng nø tvrà vmvn sháò nø vyáshì ràe. Tiqmaq Døngku pè la nø vshat lvm lòng mvshóngshì. Vrá nø tiqni søngdø Nøwú nø vle. Vkvtdø íwe laqya rì gø banchvk rì svng vtv’ng we mà-vl. Tiqdvng vsvng nø shvmna rí dvgvp vmìng vkang tiqlòng èzíò. Vatang lvp kaq tiqlangce edì nø rvtø dèbéò. Èlo ra dvgvp shvlá wace na ra shì. Shvmna rí we taq vléshì sháòe.
Àngde taqkèní vlé shì we kadv’ng vl nìnø na toshì. Døngman dø vtoshì lòng nø kádvgvp gø Kagø’ svng gø shaq cvm mà dvzvr. Àngde Mvjò lòng svng kádvgvp gø mà toshì lòng nø mà-vl ni téwa shvlàe. Shvmna rí lúngì dvgvp angdèo nonggup svng wúmshàì. Shvmna lòng i Nønt tønshì lvm lòng svng lún dvzvrè. Wervt shòní gø bø’n mvyø’ lòng svng vrashì taqsórí shvla we tvrà taq dí lúnì nø angdèo lvpat svng krvtcøm lvm mà-vl, angdèo Døngku Rvmja nvng gø kádvgvp gø krvtcøm lvm mø-í walòng svng Massage zí nø dvtøm mvyø’è. Tuq ra rvtø rì taq vrá vhø’m dvmvn laqlúnì.
