Vmvng we vyv̀ngcè kàshvbóng
Wedvgvp kùyà gú:nò rì nvng mvrà v̄l vsvng* rì shvngbe nø, Ang kà tá lúnlv́m rvt Ang yv́ng dvkǿmshi ráì. Wervt Farisirì ó, dvrá svra mvdò nø, “Yesu yapèí nø mvrà vl rì svng vtōdv̀ng wàò nø, angmaq nvng tiqdø v́mpà v̄me,” wa vbønshie.
Vpø’ íwe pèmè vnvmchvngmaq, Svrabín Koqkvm Francis shøn yangì we taq, “v-toq v-tìp shóngnønt lòng nø Gvray gvsangò hang Dvla íe” ( Closeness is God’s Style) wā shvdøm yangì. Mvrà vl rì, dàm mà vl za yv’ngrì, mvkøm mvzø’prì kaq svng dì nø vriqshì lòng nø Farishi rì dvpvt Nønt vtøp ra dvdvm vtiq ra íe. Nítvp dø yv’ngshì lòng, Kūnga yú:m we vyvngré, Nònggùn yú:m we shvngømré dvpvt, gùn lvjv’ng we le í lúngì. Yvngroqshú wàwe nø, angdèo vyvngré Wang kaq gòng ra vyvngrì kaq svng wā roqgār nø rí:mòni, Tvrà v-man we vyvngce nø krvtcøm wèwa mvtaq, wè àng mèpvng cvn nø shvbóng shvmvtshì dvgá vyvngré rì gø krvtcøm sháòe. Gvray gvsangí nø vmvvng á:mì we vyvngrérì kaq svng lá lúnlvm dvpvt Longza pè Yesu Kristu kaq svng dvzvr yangà.
Kristu Gvray nø mvrà vl vsvng rì nvng tiqdø vmjvmp taq rungè wè wa mvtaq, vsvng ku shvléshì nø, nøngmaq vsvngrì kaq svng lá nø shingløm we shvra taq vrá shøle( Dvtan 23:23). Kristu nø Kristu Angò dvbùshang Sasvna chutchvng we bvnlì tvrà svng dvtut dvshvngò we í Gvray gvsang kaq vnvpshì rì, Nønt língshì taqsórí vwángshì ra rì rvt nø dvbù Nøntshøm ra íe. Wervt rvzvngcerì shvngbe nø vl we vyvngré rì nvng mvr vgang we mø-í dø, shvngømré kèní rá:lshì vsvngrì, shvngømréò shvngøt dvtú lòng svng vtoshì lvm rvzaq rì, Kristuò dvbùshang Mongkà shini vtoshì mvlúnò vsvngrì kaq svng Sasvna tvrà wáà, díà ràe. V-toq v-tìp vzøm vzapmì lòng nø Gvray gvsangò shvrúng we Hang Dvla ínø, wè vdòng taq nøngmaq Hang dvla gø dvtan lún ràe, wā shvdøm nø dekv’m dø tiqdvchá Kvmnønt tvrà taq lúnì we kūnga vzàm taqkèní Shvkse wáshì laqlúni. Shvngbe svng oqā.
