“Myanmar Móngdàn mvzvn rvt dvshá vhø’mò mongzøngcerì svng Svrabín Koqkvm Leo (14 )í vrá tiqkvt Mònggvn svng dvshvng we”
Svrabín Koqkvm Leo (14) í nø Nár vshøm ni Dvzvr Piter Noqngøm Chøm tøm taq Mònggvn Dø’ngtáng yv’ngkèní vjúrøt shì rì nvng vhø’m dvgvp Mònggvn Dø’ngtáng kèní banchvk bø’n we rvgaq yv’ngkèní mvzvn dàm vhø’mò we mongzøngcerì dvpvt dvdvm nø vjúrøt dvbvng pàdø Mònggvn taqkèní gø àngmaq dvpvt røtnímshìe.
Mònggvn gø àngmaq nvng tiqdø vjúrøt shì lvm rvt goè. Døngku mvzvn rvt dvshà mvhøt vhø’mò we Myanmar mongzøngcerì svng Mònggvn móngdàn vrvm yv’ngkèní mà ná lvm rvt nvng mv-gùr lvm rvt, Ra we zømdvng rì svng mvng dvshá zā tùbùm dvbvngshì lvm, Svrabín Koqkvm Leo (14) í dvkv’m nø røtnímshì bø’ì.
Vle á:mì we November (5) ni Dvzvr Piter Noqngøm Chøm tøm taq wàò we Nár vrvm nar vshøm ni vsvng mvngpòng nvng v-toq v-tìp vhø’m we nvng vyvng mvlung vjúrøt shì we taq Svrabín Koqkvm Leo (14)í vkvtdø røtnímshì nø dvkv’m bø’ì.
Móngdàn v-rvm yv’ngkèní Døngku cìl mvzvn nvng Vsvng shvdaq tāsvng tālè dvshá zā tùbùm dvbvngshì lvm nvng singdø Ra vchvk rì, dvshá vhø’mò we Myanmar mongzøngcerì svng mv-gùr lvm nvng mà ná lvm, tùbùm dvbvng lvm nvng vjúrøt dvbvngshì lvm røtnímshì nø dvkv’m bø’ì.
” Mònggvn Dø’ngtáng v-rvm taq cìl mvzvn rì rvt dvsháhoq vhø’mò rì dvpvt vjúrøt dvbvng lvm nvng nøngmaq nvng tiqdø lúm lúnlvm rvt go mvyø’è. Ngà taqkèní gø Myanmar Móngdàn tvrà svng téwa dvdvm nø Mònggvn móngdàn Dø’ngtáng taqkèní gø Myanmar mongzøngcerì svng mà ná lvm nvng zømdvng we Ra vchvk rì svng tùbùm dvbvngshì lvm rvt dvkv’m bø’ì wā Svrabín Koqkvm pè í Noqngøm vjúrøt bóy taq lúm bø’ì vjúrøt mvdò angking angmun mvrdvng yv’ngø vkvtdø dvkv’m nø shø’n bø’ì.
Lvtnak lang banchvk rì, mvdøng mvdaq vl shvra vséshì dvzvr we nvng mvdøng angdvja angké ri shaqcvm rvt dvtut dvshá vhø’mò we Myanmar mongzøngcerì dvpvt Svrabín Koqkvm Leo (14) Nønt dvshá dang dvtan nø dvkv’m bø’ì.
