Dvchap mvdaq we
Mt 5:27-32
Shóngshø̀ngwe Pe, Me, vnvm vchang maq dèniò mòngkà taq dòngnøt mvsø̀n sv̀ng shv̀nshér dø gv́lshì ràwe dang yv́nglún shìwe gø íe. Dèni vbat mònggv̀n vsv̀ngrì tiqgǿ vrv̀m nø vdè dè v́l vdu we shvrà rì taq cv̀ndøng ràwe dvrá, tvrà rì shvngbe taq vlwe wani íe. Vdèò shvnvng gùr gùr vsvng rì nvng vdu vbóng dø v́l ràwe, tónglaqyà rì svng cv́n dvgømwe, móngdàn, móngwv́l rì nvng singwe cv̀ndøng dvrá rì svng cv́n dvgøm dvzaqshì rà we nvng vsvng tiqgǿ nvng tiqgǿ dvgø̀ taq vpǿ kenø dvgùng vldø cúnshì rawe vsvngrì wa íshàe.
Mati mòngkà taq Gvrayí moshi svng dvkám ráà we dvrá (10) dang kèní 6 nvng 9 lòng taq vsv̀ng svma dvchap mvdaq we nvng vsvng svma/ chømpè rì svng nø:tní gø láshì mvyǿ we nøt v́m mvdaq we svng yv́ng lún shìwe íe.
vdèò vgomv́rcì síngrv́l nø:tní vyá shì nø v́lrà we dang dvkám ráà we íe. Vsv̀ng svma kaq láshì mvyǿ we nø:tní dvchap mvdaq nø vdèò nøt svng shv̀nshér dø gv́lshì lv́m, vsv̀ngò dvgùng svng vpǿ shálv́m nvng vdèò tiqgóng nøt mvsø̀n wawe nø shv̀nshér pvlàcè kǿrshì we tøngnø tiqlòng íwe svng dǿmshálv́m shvngøt dvtú wegø íe.
Yesu Kristu taqkèní døngku vkang mvdaq we nvng màdvrá dø dvgá døngku shvzøngshì mvdaq we tvrà rì svng gø dvkám nø shvngøt dvtú ráà wegø íe. Ya (21) àngyá mvzuq nǿng vbat taq tuqráshà we mònggv̀n dvjà taq mònggv̀n paqzí zìdangrì àngdang dang taq vtang shaq vháng á:mì we ínìgø Gvrayí dvkámkà, cv̀ndøng dvrárì svng nø cv́ndvgøm we dang vnǿn we svng yv́nglún shìwe írvt shvngkà tashàì we vnvm vchang maq nøngmaq shvngbe yadang rì svng dǿmsháì nø nøt mvsø̀n shv̀nshér dø cúnshì lv́m dèniò mòngkà kèní shvdǿm we íe.
