November 2 ni shì vsv̀ngrì dvpvt vjúrøtā we bóy àngni taq Pope Leo XIV taqkèní dvtú mòngkà
November 2 ni shì vsv̀ngrì dvpvt vjúrøtā we bóy àngni taq Pope Leo XIV taqkèní dvtú mòngkà shø̀n we taq Yesu Kristuí èzí ráshà we chutcháng we jejú nvng àng taqkèní shìlòng svng jórlún bǿì we tvrà rì dang kèní nv̀mlat dvtú mòngkà shǿn vtàn bǿà we íe.
Wervt rvcángcè shvngø̀mré rì shvngbe nø Yesu shìlòng svng kámshì bǿì, Yesu shìlòng kèní vrá zun bǿì, Yesu Kristu nø dvgùng gùngshvngí vrá tuqlonge walòng svng kámì nø cúnshì lv́m vchvk we dang dvtú we íe.
Gvray àngyv́ng svng tuqlúnlv́m dvpvt nø shìlòng tvrà svng vle bǿì nø àng yv́ng svng tuqlúnlv́m íwe dang dvkám we íe. Svrabín koqkv́mpèí November 2 ni taq Missa kàgvp núng bǿà we dvgàm nø Verano dvgv̀m shvrà taq ínø we dvgv̀m nø 19 àngyá mvzuq nǿng cvr kèní vlráì we rvmø paqzírì í mvshǿl shøp rvmø shì shaq íwe dvgv̀m shvrà taq wáshì bǿì wegø íe.
Weshvrà taq shvngø̀mré vsv̀ngrì gorø 2500 rvzé gǿ kø̀mngǿm nø vjúrøt tvyø taq mvngushì bǿì we íe. Pope Leo XIV taqkèní shìbǿì vsv̀ngrì kaq nøngmaqí kadvgvp gø mvrøt shøngran nøt kèní vjúrøt dvbangā lv́m wàì wanø gø dvkám bǿà we íe. Wedø vjúrøtā we nø àngwà mvrøt mvshv́m vjúrøtā we ku wa mǿí làngdø̀m àngni taq àngmaq nvng tiqdø Yesuò shìyv́ngkèní zun bǿì we kámnøt tvrà taq Gvray àngmvr dàngø tiqni àngmaq nvng vhøm lúnlv́m íe wawe nøt kèní tasvng vjúrøt dvbangā kéì we dang shvdǿm we íe.
Wervtnø shì bǿì vsvng, vnvm vchvngrì dvpvt vjúrøt dvbangā we nø àng lvjøm rvnaq we tvrà ínø̀ làngdø̀m àngni wawe svng rvgaq mvdàmø cúnshàì we nøngmaq taqkèní gø síngshá lv́m, dvgǿshì lún lv́m làngdø̀m taq àngmaq nvng vhøm lv́m shóngnøt dvtan kéì we tvrà tiqlong íe. Nøngmaq shvngbe nø Yesu mèpvng cv̀nì nø àng yv́ngsvng tuqlv́m wawe manggá kèní cúnshàì we rvtø̀ cè taq dvgǿ dvcøp shì lúnlv́m nøngni nøng vràm shvdǿmā we bóy àngni gø íwe dang dvtú we íe.
We dvsháza shóngnøt rì taqkèní vjúrøt dvbangā we tvrà nø Gvrayí nøngmaq kaqsvng gø vrá tiqkvt shóngnøt ezílú:ngì nø nøngmaqò manggá tvrà svng mòngzø̀l dø tuqlúnlv́m tvrà taqgø dvzøm dvbangā nø jejú ezíì we íe.
Làngdø̀m àngni wani taq nøngmaq nvng shìbǿì we vsv̀ngrì Gvray àngyv́ng svng vhøm bǿì we ni kèní nø Gvray àngí shìlòng svng dvciq lvpvt cat bǿò nø àngmaq nvng nøngmaq nø dvciq lvpvt mòngzø̀l dø v́llún lv́m ílonge wanø̀ dvtú mòngkà vtàn bǿà we íe.
