Chøm døngku rìò vlømrà shvnshér we døngkupè, døngkumè ní
Svrabín koqkvm taqkèní shvnshér we døngkupè, døngkumè ní Louis nvng Zélie Martin svng mvsat nø shìwvt vkønwe vdong taq vl vdu we chøm døngku rì svng paqzí lushì lvm dvkám we íe.
We shvnshér vsvng gø ní svng shvnshér vsvngrì wanø mvsat shì bøì we nø 10 nøng gøm bøì wegø íe. Àngní nø St. Yeresa ò àngpèní angmè íe l.
Deni vbatò døngku lvpat rì taq yaklvm shìwvtrì àngpvn pvn, angdang dang kèní vkøn we svng gø uvnglún shìnø mvngàng mvdøng, døngkurì vkang nø vcat we gø gvzà vlwe íe.
Wedø bøn ráì we àng dvjà mvtú nø Gvray àng shóngwám shìwe døngku tvrà svng mvcvn nø vdè èshöngshì dø wáshì, vrangshì we døngku rì taqkèní bønbung we svng Svrabín koqkvm pèí dvkám we íe.
We shvnshér we gøní svng 2015 nø Svrabín koqkvm Francis taqkèní mvsat ráà we ínø àngní svma svng tiqnøng, tiqni vdòng taq ni Catholic shvngømré ò shvnshér we døngkupè døngkumè ní wanø mvsat ráà we íe.
St. Teresa ò àngpèní angmè íwe we shvnshér vsvng gø ní nø kàciq ngàngdøng we, Gvray kaq kám vlømshì we, àngcø àngcèrì kaq Gvray tvrà kèní shvngøt dvtú nø mvkok dvdí we, vdu vbóng we dvrá tvrà rì svng cvn dvgøm we kadø íwe yalvm shìwvtrì dvhø taq ínìgø Gvray yvng svng kámnøt kèní dvzaqshì nø vle lúnwe tvrà rì svng dèni vbatò døngku rì svng yvngshì nø paqzí lushì lún lvm dvkám bøà we íe.
Gvray shóngshì we døngku wawe nø døngku vsvngrì shvngbe nø tiqchøm tinøt taq vzøm nø vjúrøt dvzaqshì we, ámjàm tiqlòng taq tiqdø ám, mvngushì we, ni vrvm tiqchøm vsvngrì mvngushì nø vjúrøt shìwe nvng vzvng kaq tuqrawe lvpat tvrà dvpvt tasvng mvtú lá nø vzøm we, byowe, uakwe tvrà shvngbe taq tiqdø vzøm we íe wanø dvkám ráà.
We shvnshér vsvng gø ní íwe døngkupè døngkumè nínø àngní shvnshér vsvngrì bøn lún lvm wanwe mvtú kèní døngku lvpat svng shvnvp dvzaqshì yv:ngì we møí, ínìgø àngníò døngku lvpat tvrà nø Gvray mvr taq vtangkèní dvgùng vldø vlráì nø Gvray tvrà taq kadø dvzaqshì ráì we svng àngníò lvpat mvshølrì kèní cvnshì shvla we svng gø shvdøm bøà we íe.
