Angwà Nár (30) Sunday Homily(Oct 26.2025)
Shvngbe svng pàmvra. Gvray Jèjú kaqsvng nvmlat oqà waì. Ya lvbvn nø angwa nár (30) lvbán wa nár svng gòng bø’shà.
(1) Nidiqdedvna 35:12-14, 16-19,
(2) 2Timoti 4:6-8, 16-18
(3) Luka 18:9-14
Farisi pè nvng kùyà gún pè kàshvbóng ka vgo taqkení Cipshì nø døngman dø vjúrøtshìlvm shvdúm we íe.
Shvngømréí nøngmaq shvngbe svng vjúrøtlvm rvtø vrvm taq shvdúm dvshvt we dang íe. Nøngmaq rvcángcèrì vjúrøt we taq vde shvringshì vsvng ímá? Gvrayò Ngø̀rdvgùng svng vlø’mshàì nø cipnøt í, røtshàì má? dvdvmlvm waì. (1) Vde de kadø elánshìe. (2) Gvray kaq kadø elánòemá? (3) Tiqdvl vsvng kaq kadø elánòemá? Nøngmaq rvcángcèrì lvpat taq Gvrayí yv:ngò we dang, vdèí yv:ngò we dang nvng tiqdvl vsvngrìí yv:ngò dang màbúngnì nø Kàngpè Yesuò shóngnøt nvng màbúng mvdvmø Kàngpè Yesu svng vtū we dang ív:me.
Farisi wawe nø màngmán vl vsvngrì wa ang lvjøm íe. Angmaq nø Moshi dvrá svng tiq ka gø mvngámshì dø check wa cvn we tiq mvdò íe.
Yudá vsvngrì nø dvki vrè we vhømò rvt vkup vkàng maqò kámnøt tvrà dang svng gøwrò mvngoqshì we vsvngrì dø vl yv:ngà. Farasirì nø Shvrúngshú Jaù mví, shvngømré vsvngrì íe. Angmaq nø Yudá vsvngrìò kámnøt tvrà dang kámvrvm dø vl dvtvnlvm warì íe. Mèpvng nø shvngømré shølshú nvng shvngøtshúrì íráì. Íwe angmaq nø vdè dè shvringshì nø lánshì weí Moshi dvrá (10) lòng svng angmaqí jatòe. Dvrá shvngbe svng køt cvn ke wa gønshaq cúnshìlvm ílo:nge wae. Shvngømré vsvngrì dvpvt angmaqí dvtúshì we dvrá svng cvnlvm rvzaqe.
Wervt Farisirì nø lánshì we nøtí døngmanìe, dvgá vsvngrì nø mvtv́nshaq íe, mvrà vl vsvngrì wa nø angmaq káme (Yohan 7:49).
Kùyà kúnrì Israel vsvngrì taq kùyà kúnrì svng gvza mvwámshì we vní dang nø mvdøng mvman dø øp we Roma vsúyaqò gàmzølrì írvt gø, dvshà vsvngrì yv’ng kení màdvrá dø kùyà kúnò rvt íe.
Kùyà kúnrì taq vkùnkan chunk nvng taman vkùnkan dang taq cvnòe. Angmaqí dagá vsvng loksok mvdò kení gvza loqdø Gvmsòngrì kúnò nø mvdvm taq datmatshì dángtè wa apmò dá:ngí ngámshì dángtè nø angmaqí shvngbe lushìe. Wedø washìrvt angmaq nø dvshaqí vdá mvgàmrì íe.
Kùyà kúnrì svng mvrà vl vsvngrì wae. Shøn mvyø’ we nø mvrà vl we bvnlì wàò rvt íe. Angmaq svng vkø’ dvmyqrì, vsvng sat vsvngrì nvng góng nvmshì mèla nvng tiqdø màshvla vsvngrì wa datmatshìe.
