Yesu rvt nø vwálshì long we
23 Oct 25. Luke 12:49-53
Dèni nònggùn lùshì lvm Gvray móngkà nø Luka 12:49-53 vdòng taqkèní ínø Yesu rvt nø vwálshì long we, Mongkà mvshøl taqkèní íē
Kristu Gvray ínø Mongzøl lòng mø-í nø, Nønt vtøp lvm, mvdò vwángshì lvm lòng svng mvg rìòe, wā dvshvngòe. Mongzøl lòngò angkang pè, mvkok dvdí shóngnønt angkang, mvré zā shóngnønt dvnzøng pè, wàì nø shønì we, Gvray nø Mongzøl lòng mø-í nø, Parvt Nønt mvsøn mvdò vwálshì lvm lòng svng rí lú:ngà mà? (Mati 10:34) “Rvgaq tø̀m svng Ngàí mòng dvzø̀llv́m lòng èlv́nga daqshà mèlv́nnø̀ngni. Ngà nø mòng dvzø̀llv́m dvpvt dø̀ng dakngà we mø̀í; shv̀mshvnaq lv́ng dakngà we mv̀ng íe, wā dvkv’m yangì. Vrá nø, Kristu Gvray ínø àng mvdvm Døngku svng téwa shóngshì gø’ nø, ang zí mvyø’ lòng lún mà pø’ wā shangshang wā shø’n yangì.
Vrá nø Kristu mèpvng cvnè walòng taq, vzaqshi Nøntní, Nønt rvtshì lvm nø vchvkngè. Nønt rvtshì dø dø, Nønt mvrvtshì dø dø wáshì mvdaq. Kà shvbóng; Mung í kèní nø mung, Naq í kèní nø naq rvcvngshì lvm ra vchvkngè. Mèpvng ‘cvnè’ wàwe taq vpnóngshì lòng, røtnímshì lòng, dvshá kámshì lòng nø mvyòr walòng svng shø’n mvyø’ dang íe.
Gvray kaq shóngshìlvm nvng àng mèpvng cvn lvm rvt vchvk lúng dvgvp rvgaqtøm taq vl rì shvngbe nø mé v-ní taq wā vlē walòng svng shø’n mvyø’ dang íe. Kristu Gvray nø Døngman we Mongzøl lòng Svmi mvlá:mp dø vcór nø gá we Nønt mvsøn vjang laqyà rì svng dvtánòe. Vzing we nønt mø-í dø, Angí go ra dvgvp vzaqshi Nøntní, nønt rvtshì nø Gvray gvsang nvng màbóng mà tuk, shvrúng we mà-vl dø dvshér lúnlvm ègo íe. Wervt Gvray gvsang shvrúng we taq rvtø v-rvm cvndvgøm nø cúnshì laqlúnì, Shvkse wáshì laqlúni wvng dvshat mvyøngè. Shvngbe mvdvm Gvray mongzøl lòng laqtuqdaq.
